Pajlug 20:30; Henplais 12:4-11
Nqe cim
“Raug ntaus thiab raug nplawm, ua rau peb hloov tau peb lub siab thiab ua lub neej zoo.” (Pajlug 20:30).
Lus nug rau sawvdaws xav:
– Pajlug 20:30 muaj lub ntsiab li cas?
– Lub homphiaj ntawm kev qhuab ntuas yog dabtsi?
– Yam dabtsi txhawb peb lub zog thaum raug tus Tswv ntuas?
Hauv Pajlug 20, Vajntxwv Xalumoos hais tias tus Tswv paub tagnrho tej kev txhaum uas zais ntshis puag hauv tibneeg lub siab thiab Nws yuav hais tawm (nqe 27). Vajntxwv yog ib tug neeg tswj teb kav chaw, nws zaum ntawm lub rooj txiav txim rau cov pejxeem (nqe 8), thiab vajntxwv muaj feem xyuam txiav txim tsis zam rau tus uas ua phem (nqe 26). Vajntxwv Xalumoos xaus lus ntawm tshooj 20 muaj lub ntsiab tshem tej kev txhaum tawm los ntawm qhov qhuab ntuas, “qeezaus, qhov uas peb raug ntaus thiab raug nplawm, kuj ntxuav tau tej kev phem hauv peb lub siab tawm.” (phau txhais tshiab)
Lo lus “ntxuav” muaj lub ntsiab hais tias txhuam lossis cheb, kaus tej khoom uas paug kom huv. Nqe 30a siv rau lub ntsiab ua pajlug hais txog ntxuav tej yam phem tawm hauv ib tug tibneeg lub neej mus. Lo lus “raug ntaus thiab plawm” muaj lub ntsiab hais txog kev qhuab ntuas zoo yuav ntxuav tau tej kev txhaum hauv tibneeg lub siab uas zais nkoos tawm. Yog li, kev qhuab ntuas nruj yuav ua rau cov tus neeg phem tso qhov tsis zoo povtseg thiab tig los ua neeg zoo, qeezaus kev ntuas ua rau mob, nqaij ntuag tiamsis yuav cob tau tus neeg tsis zoo dhau los ua tau neeg ncaj, dawbhuv.
Thaum qhia txog tus Tswv txojkev qhuab ntuas, tus uas sau tsab ntawv Henplais hais tias lub homphiaj tus Tswv qhuab ntuas Nws cov menyuam yog tus Tswv hlub peb thiab xav kom peb tso kev txhaum tseg. Tus Tswv ua kom zoo rau peb xwb yog li Nws thiaj qhuab ntuas kom peb ua tau neeg dawbhuv rau Nws (saib Henplais 12:4-11). Tus uas sau tsab ntawv Henplais txhawb tus Tswv cov menyuam lub zog kom tsis txhob poob siab thaum raug qhuab ntuas, vim: “Thaum luag qhuab ntuas peb, thaum ntawd peb tsis kaj siab, peb nyuaj siab xwb; tiamsis tom qab ntawd cov neeg uas khaws luag tej lus qhuab ntuas rau nruab siab, cov neeg ntawd yuav tsimtxiaj thiab yuav tau zoo nyob kaj siab lug.” (Henplais 12:11).
Peb tus Vajtswv yog tus uas muaj kev hlub thiab kuj yog tus dawbhuv, yog li tsis yog vim hlub es tus Tswv tsis qhuab ntuas thaum ua txhaum. Tsis yog li ntawd! Peb yog tus uas tau tus Tswv tsa los ua tus coj, txawm yog hauv lub tebchaws, Pawg Ntseeg, lossis tsevneeg, peb yuav tsum qhuab ntuas kom ncaj ncees los ntawm txojkev hlub thiaj ntxuav tau tej kev txhaum hauv txhua tus neeg thiab pab pawg kom huv. Peb txhua tus kuj yuav tsum txo hwjchim zeem paub tej kev txhaum yus ua thiab lees txim rau tus Tswv kom peb tau txais kev zam txim. Thaum raug kev qhuab ntuas tsis tsimnyog nyuaj siab tiamsis yuav tsum hloov lub siab. Thaum ntawd, peb lub neej thiaj li tawg paj txi txiv ncaj ncees thiab kaj siab, koom tau rau hauv tus Tswv txojkev dawbhuv.
Thov Vajtswv,
Vajtswv, thov Koj zam txim rau nyuam yaus vim ntau zaus nyuam yaus nyuaj siab, qaug zog hauv txojkev ntseeg thaum raug Koj qhuab ntuas. Thov Koj qhia nyuam yaus paub tswj lub neej thiab ntuas qhia cov kwvtij ntseeg kom txhua tus ua tau neeg dawbhuv nyob hauv Koj tsevneeg. Nyuam yaus tuav Tswv Yexus lub npe thov. Amees.
Ib tsoom cov mloog uas hmov thiab tshua,
Peb twb qhuab ntuas lwm tus thiab peb tus kheej zoo li cas lawm?
Nyeem Vajluskub hauv peb lub xyoo: Tshwmsim 1:1-2:7
Kênh Youtube BHKTHN:
https://www.youtube.com/c/bhkthn
