I Timôthê 1:3-11
“Inh wă kơ ih kư̆ oei tơ Pơlei Êphêsô, kư̆m thoi inh athei ih ki lăp inh wă năm đơ̆ng Pơlei Êphêsô tơ dêh char Masêđôn. Na inh athei ih oei tơ pơlei âu khŏm khŏm yua kơ đei lu bơngai tơ noh bơtho tơdrong ưh kơ trŏ tơdrong ‘Bok Kei-Dei tơpă. Na ih athei khă lu sư ‘nĕ pă bơtho thoi noh dơ̆ng. 4 Ih athei lu sư hŭt lê̆ tơdrong roi kư̆ kă gah adrĕch adrung yă ‘bok so sơ̆.” (I Timôthê 1:3-4a)
Nơ̆r jet tơchĕng pơwao:
– Khul Bơngai Lui tơ Êphêsô đei tơ’bơ̆p tơdrong anat yă kiơ?
– Yua kơ kiơ tơdrong oei dơ̆ng tơ lăm Êphêsô ‘noh jơ̆ tơdrong pơlong hăm ‘bok bơtho oei tơdăm thoi Timôthê?
– Pơm thoi yơ lu bơ̆n gơh oei kơjăp ‘bơ̆t anăp lu bơngai bơtho tơdrong ưh kơ trŏ đơ̆ng lu ‘bok bơtho hơlĕnh pơdăr?
Kơplah năm truh tơ dêh Masêđoan wă pơtrơp tơdrong năm chă bơtho, ‘bok Pôl băt nhen tơdrong đei truh lăm Khul Bơngai Lui tơ Êphêsô, tơ’bôh đei ‘bar nơ̆r “’nĕ”, sư tơbăt kơ lu bơ̆n băt tơdrong truh lăm kơplah noh:
Mă minh, “’Nĕ” pă bơtho tơdrong ‘noh dơ̆ng” (trong 3b) đei tơ’bôh lăm Khul Bơngai Lui gô đei lu bơngai oei bơtho tơdrong ưh kơ trŏ; Mă ‘bar, “’Nĕ” pă bơtho gah adrĕch adrung yă ‘bok so sơ̆” (trong4). Wă tơ’bôh oei đei bơngai lăm Khul Bơngai Lui gô đei tơdrong pơjah pơjăng dih băl ưh kơ tôch gah tơdrong mă ưh kơ đei yua kiơ. Pơma pơtôm, Khul Bơngai Lui tơ Êphêsô gô tơ’bơ̆p hăm tơdrong đei tơmơ̆t hăm lu bơngai bơtho hơlĕnh păng đei pơjah ưh kơ đĭ. Kơplah đei tơdrong noh, ‘bok Pôl sư ‘bôh băt na sư ưh kơ gơh iŏk đĭ lu bơngai bơ̆jang wă wơh năm tơ nai na lê̆ lu bơngai lui oei tơ âu hli tơrơ, hơwơ̆l hơwang păng tơklah dih băl, na sư đei nơ̆r athei bơngai kon gah bơhngol jơ̆ Timôthê “athei oei tơ pơlei Êphêsô.” Sư khan: “Na inh athei ih” pă minh ‘măng dơ̆ng (trong 3). Wă tơ’bôh sư đei athei păng bơwei nơ̆r noh mă tơpă pơma hăm bơngai tơdăm Timôthê mă kăl dêh oei tơ pơlei Êphêsô kơplah noh.
Tơdrong ‘bok Pôl kơnhăm tơdrong chă bơtho ăn kơ Timôthê athei oei dơ̆ng kơtă anih wă bơtho tơ’bôh lu bơngai lăp “pơm thây bơtho tơdrong juăt” mă “ưh kơ hlôh tơdrong sư bơtho” (trong 7). Athei khă lu sư, yua kơ Khul Bơngai Lui đei lơ bơngai “chă bơtho” lơ bơngai lui nai, lu bơngai ‘maih pơjah pơjăng dôm tơdrong ưh kơ đei tơgŭm đon lui wơ̆ tŏk lăm Khul Bơngai Lui. ‘Nâu bơih tơdrong pơlong tih păng ưh kơ layơ gơh pơm, ‘noh bơih tơdrong kơnhăm mă ‘bok Pôl bơtho ‘bok bơtho oei tơdăm athei đei jơhngơ̆m pran wă kơ tơ’bơ̆p hăm tơdrong bơtho ưh kơ trŏ wă kơ gơh bơwei triu lăm Khul Bơngai Lui (II Timôthê 1:7).
Dang ei, lăm păng ‘nguaih kơ Khul Bơngai Lui kư̆m đei lơ bơngai bơtho hơlĕnh pơdăr wă bơtho tơdrong ưh kơ trŏ, wă dui anhăk lu bơngai lui. Bơtho tơ lăm brŏ, tiwi, ưh kơ đei layơ mă ưh kơ đei lu ‘bai bơtho lu bơngai bơtho hơlĕnh pơdăr wă pơm rơdu đon lui lu bơngai lui kơ Kră Yang. Tơdrong pŭ iŏk trăp wă blah hăm lu bơngai bơtho hơlĕnh, ưh kơ sĭ lu bơngai wei lăng, pơgơ̆r lu bơngai lui đĕch ôh, mă ‘noh đĭ đăng bơngai lui athei pŭ iŏk. Lu bơ̆n ưh kơ gơh weh wer dah sơ’ngon na lê̆ lu bơngai bơtho hơlĕnh hơpoh ‘bơm pơm kơ khul bơngai mơ̆t kiơ̆ jing wơ̆ tŏk đơ̆ng khul bơngai lui bơ̆n, kư̆m ‘nĕ kơ nŏng pơjah wă chă jei ‘noh ưh kơ yua kiơ, mălei rim ‘nu athei kơchăng hơmet nơ̆r Kră Yang mă tơpă, gơnang kơ Yang Bơhngol ‘Lơ̆ng bơtho tơ’bôh wă kơ băt kơnăl trŏ, glăi. Đơ̆ng noh bơ̆n oei kơjăp lăm đon lui păng gơh tơgŭm bơngai nai dơ̆ng.
Ơ Kră Yang, apinh Ih tơgŭm inh hŏk iŏk nơ̆r Ih rim năr wă kơ inh đei Yang Bơhngol ‘Lơ̆ng bơtho tơ’bôh, ưh kơ sĭ mơ̆ng kiơ̆ kơ nơ̆r bơtho ưh kơ trŏ ‘bơm lăm tơdrong lui kơ Ih. Apinh Ih ăn kơ inh oei kơjăp yak kiơ̆ Ih păng bơ̆jang kơ Ih. Yua anăn Kră Yang Yêsu Krist, Amen.
Lu bơ̆n hăm adrin pơhrăm nơ̆r Kră Yang rim năr wă kơ gơh dơ̆ng kơjăp kơplah lu bơngai bơtho ưh kơ trŏ ưh?
Đŏk Sơ̆p Hla bơar ‘Bok Kei-Dei lăm pêng sơnăm: II Hơ’mon 31
Kênh Youtube BHKTHN:
