Pajlug 24:30-34
Nqe cim:
“Mus pw ib pliag thiab tsaug ib tsig zog tso; khawm tes so ib pliag tso, tiamsis thaum koj tseem tabtom pw tsaug zog, kev txomnyem yuav los raug koj ib yam li tubsab nqa rawv qws tuaj huab koj lub neej ntag.” (Pajlug 24:33-34)
Lus nug rau sawvdaws xav:
– Nuj nqis rau tus neeg tub nkeeg yog dabtsi?
– Peb puas tabtom tub nkeeg lossis mob siab ua tes haujlwm tus Tswv txib?
– Peb yuav tsum hloov li cas txij ntawm kev xav mus txog kev ua tes haujlwm uas tus Tswv txib?
Vajntxwv Xalumoos qhia tej uas nws kawm tau txog tej nuj nqis uas tus tub nkeeg yuav raug. “Tus neeg tubnkeeg” yog hais txog tus uas tsis xav ua haujlwm, thiab raug suav ib yam nkaus li “tus neeg ruam” uas yog tus tsis paub qabhau. Cov neeg zoo li no tsis xav ua haujlwm, tsis xav siv lub hlwb xav txog yam yuav ua, thiab tsis nco xav tias yog ua haujlwm thiab saib xyuas zoo mas yav tom ntej thiaj tau qoob loo. Vim li ntawd, tus neeg tub nkeeg thiaj pheej ncua sijhawm, ua rau tej vaj txiv hmab uas tsimnyog yuav txi txiv qab zib, hloov mus ua tej lub vaj uas muaj pos thiab nroj fab puv nkaus; tsimnyog daim teb yuav tsum tau txhim ntsa zeb thaiv khov kho, tiamsis nimno tej ntsa zeb uas xov ncig daim teb puavleej pob tas rau hauv av. Thaum mus hla tus neeg tub nkeeg tej liaj teb, Vajntxwv Xalumoos thaum thawj tsuas “saib” xwb, tomqab ntawd nws pib muab “xav” thiab “kawm”, thiab thaum kawg nws thiaj qhia tawm “tej yam zoo ntawm zaj no” uas muaj nqis rau nws cov menyuam. Nws pom ib txoj cai nyob hauv lub neej hais tias: tus neeg tub nkeeg uas pheej ncua sij hawm yuav tau txais kev pluag sai heev thiab muaj zog ib yam li tus tub sab uas nqa rawv qws tuaj huab. Lo lus hais tias “Mus pw ib pliag thiab tsaug ib tsig zog tso; khawm tes so ib pliag tso tsaug zog me ntsis, khoov tes pw me ntsis” qhia pom ib tug cwjpwm ua xyemxyav, ncua sijhawm, tsis xav ua haujlwm; tsis ceevfaj tub sab thiab tej tsiaj tuaj rhuav. Qhov kawg, tus tub nkeeg yuav ntsib txoj kev pluag, kev tsis muaj dabtsi, thiab kev swb.
Nyob sab cev nqaij daim tawv tsuas muaj tsawg leej ntawm tus Tswv cov menyuam tub nkeeg ua haujlwm thiaj ua rau lawv dhau los ua neeg pluag, tiamsis hauv sab ntsujplig, mas tseem muaj coob leej ntawm peb uas pheej ncua sij hawm tsis ua raws li Tswv Yexus lo lus samhwm tshaj tawm Txojmoo Zoo. Twb txog lub sijhawm uas peb yuav tsum “saib, xav, pom thiab kawm” tej uas peb ua yuamkev kom peb rov txhim kho dua.
Mauxes hais tias: “Peb tsuas ua neej nyob txog xya caum xyoo xwb, tus uas khov kawg tsuas nyob txog yim caum xyoo…” (Ntawv Nkauj 90:10). Pivtxwv tias peb nyob tau txog xya caum xyoo, txhua hnub ua haujlwm 8 teev, txhua lub lim tiam ua 6 hnub, thiab ua haujlwm tau kwv yees li 40 xyoo. Yog txhua yam puav leej zoo, ces peb muaj li ntawm 12 lub xyoo los ua haujlwm hauv lub neej. Tiamsis, tsis muaj leejtwg qaij dhau mob nkeeg raug so haujlwm, so noj peb caug thiab lwm yam… Thaum kawg, tus uas ua neej 70 xyoo heev tshaj tsuas tshuav li yim, los yog cuaj xyoos los ua haujlwm tiag tiag lawm xwb. Peb lub sijhawm luv heev! Yuav tsum ceev faj, tsam peb dhau los ua neeg “txomnyem, neeg tub nkeeg, neeg ruam” thaum peb pheej ncua sijhawm tsis ua tes haujlwm uas tus Tswv samhwm. Vajtswv Txojlus qhia hais tias: “Nej rau siab ntso ua haujlwm tsis txhob tubnkeeg, thiab yuav tsum muab siab rau ua tes haujlwm uas Vajtswv kom peb ua” (Loos 12:11).
Thov Vajtswv,
Tus Tswv, ua tsaug uas Koj tau tuag theej nyuam yaus tej kev txhaum. Thov Vaj Ntsujplig qhuab ntuas thiab pub nyuam yaus muaj lub zog kom rau siab ntso ua txhua yam haujlwm. Thov pab nyuam yaus tsis txhob tub nkeeg ncua sij hawm ua tes haujlwm uas Koj muab cob, tshaj tawm Txojmoo Zoo kom coob leej paub Koj. Nyuam yaus tuav Yexus Khetos lub npe thov, Amees.
Peb puas rau siab ntso thiab kub siab rau txoj haujlwm uas tus Tswv muab rau peb thiab txoj haujlwm khwv noj khwv haus lawm tau?
Nyeem Vajluskub hauv peb lub xyoos: II Xwmtxheej 32
Kênh Youtube BHKTHN:
