I Samuel 8:19-22
“Kơplah ahrei brei drâu oei tam, na rim năr iĕm athei pơlung dih băl, wă kơ đĭ-đăng kơ iĕm huay kơ lui kơ đe pơhlŭ pơlung iĕm pơm yoch jing arăng kơ̆l”(Hêbrơ 3:13)
Nơ̆r jet tơchĕng pơwao:
– Yua kơ kiơ kon pơlei Isơrael oei hơnơ̆ng kơ arăng kơ̆l đĕch mă khan ‘Bok Kei-Dei tơbăt lê̆ adrol tơdrong răm wă truh kơ lu sư?
– Kră Yang hlôi pơm kiơ kơ lu bơngai Isơrael yua kơ lu sư arăng kơ̆l noh?
– ‘Bai pơhrăm ‘nâu tơ’blŏk ăn kơ bơ̆n tơdrong kiơ?
Mă khan Kră Yang tơbăt tơdrong răm wă truh noh ră mă-lei kon pơlei Isơrael oei ưh kơ chu mơ̆ng hloi ‘mơ̆i, lu sư nhơ-nhit ‘maih wă kơ Kră Yang ăn kơ lu sư minh ‘nu pơtao pơgơ̆r lu sư. Bơ̆n băt kơnăl kơ lu tơdrong mă ba ăn lu kon pơlei Isơrael arăng jơhngơ̆m noh yua kơ dôm tơdrong tơ ala âu:
Mă minh, “kon pơlei sơngah ưh kơ wă mơ̆ng nơ̆r Samuel”(tr.19),tơpă sư, lu sư sơngah kuă kơ mơ̆ng Nơ̆r Kră Yang(tr.7-8).Bơ̆n băt thoi âu: Blŭng a,pơtơm rơdu tơdrong lui tơdrong arih gah bơhngol kơlih yua kơ jơhngơ̆m ngăl blah plơ̆ Nơ̆r Kră Yang noh. Jơhngơ̆m tơdrong tơchĕng pơang, iung blah plơ̆ Nơ̆r Kră Yang noh ling-lang lăng kơdih trŏ ngăl, kuă kơ mơ̆ng Yang Bơhngol ‘Lơ̆ng bơtho,kư̆m kuă kơ mơ̆ng nơ̆r lu bơngai mă hli yom kơ Kră Yang chă tơ’blŏk, bơtho khan. Mă ‘bar, lu sư “’maih wă thoi lu adrĕch nai”(tr.20).’Bơ̆t kon pơlei Isơrael kuă kơ pơđêng đon mơ̆ng Nơ̆r Kră Yang noh sĭt tơdrong bơngai ala teh âu ‘bơm kơ lu sư bơih, hơpoh tơ lu sư bơih. Mă pêng, kon pơlei Isơrael wă kơ kơdih lu sư rơih iŏk tơdrong lu sư arih, jang pơm noh, ưh kơ wă kơ Kră Yang, lu sư ‘maih wă wei pơgơ̆r tôm tơdrong, truh tơ ‘bok pơtao mă lu sư ‘maih wă kơ đe pơjing ăn kơ lu sư noh hai. (tr.20)!
Tơdrong arăng kơ̆l ‘nâu sư đei hơrĭ hơrĭ đơ̆ng ‘bơ̆t anih mă blah plơ̆ Nơ̆r Kră Yang, truh tơ jơhngơ̆m bơ̆n tơwih hnhoi tơ tơdrong ala teh, na tuch luch sư, bơ̆n lăng kơdih bơ̆n tơm, yŏng pơgơ̆r chăl arih bơ̆n kơdih! Bơ̆n athei mă kơchăng, mă pơ’lơ̆ng, ling-lang kơ ‘me rong păng pơdơ̆ng tơiung chăl arih bơ̆n kơdih hăm Nơ̆r Kră Yang, păng yua Nơ̆r Kră Yang tơrô̆ tơiung pơlung tơgŭm lu ‘nhŏng, mai oh bơ̆n. (Hêbrơ 3:13). Kră Yang tơl tơwih kơ lu bơngai Isơrael yua kơ đơ̆ng tơdrong lu sư arăng kơ̆l noh Kră Yang khan kơ Samuel: “Athei chu kiơ̆ dôm nơ̆r lu sư, păng ăn kơ lu sư minh ‘nu pơtao” (tr.22).
‘Nâu hei ưh kơ trŏ kơ tơdrong Kră Yang wă ôh.(tr.7-9),mă-lei ‘noh tơdrong Kră Yang ăn phep đĕch.Kră Yang ưh kơ tơdruh,ưh kơ lung tơdrong kơnê̆,tơdrong glăi kon pơlei ôh, mă-lei phŏ phŏ Kră Yang lê̆ kon bơngai bơ̆n arih lăm tơdrong răm lĕch đơ̆ng lu tơdrong kiơ mă bơ̆n rơih pơm ưh kơ trŏ noh.
Đei minh ‘bai hŏk mă bơ̆n kăl kơ băt kơnăl, thoi âu: ‘Bơ̆t anăp bơ̆n đei lơ tơdrong anat.Kơplah tơ’bơ̆p tơdrong anat ei,bơ̆n rơih iŏk tơdrong bơ̆n wă pơm,phŏ bơ̆n rơih ưh kơ trŏ ră,bơ̆n pơm hloi bơih, phŏ kơnh đei yua ăn kơ bơ̆n mơ̆n đơ̆ng bơ̆n pơm noh. Bơ̆n athei kơnăl kơ tơdrong noh mơ̆n. Kư̆m đei tơdrong anat ‘bơ̆t anăp bơ̆n thoi noh mơ̆n, bơ̆n rơih iŏk tơdrong bơ̆n wă pơm,bơ̆n rơih trŏ,bơ̆n pơm hloi,đei yua tih ăn kơ bơ̆n. Bơ̆n kư̆m athei kơnăl kơ tơdrong noh.
Tơdrong kon pơlei Isơrael nhơ-nhit apinh wă kơ đei minh ‘nu pơtao, na đơ̆ng rŏng kơ ‘noh kư̆m keh jing mơ̆n; keh jing mơ̆n thoi noh khan đêl lu sư apinh’nei trŏ bơih, ưh ôh. Wă kơ hlôh tơdrong noh bơ̆n pơtih tơdrong ‘bok Abraham: Tơdrong ‘Bok Kei-Dei dŏng pơklaih ‘bok Abraham ‘bơ̆t sư hơlĕnh khan Sara oh adruh sư noh. (Blŭng a 12:10-13) Tơdrong sư weh đơ̆ng dêh Kana an jăk tơ dêh Êjiptơ păng nơ̆r sư pơma hơlĕnh noh khan ‘nei trŏ bơih, ưh ôh.Pơtih thoi ‘nâu: Dah bơ̆n pơm glăi hăm nơ̆r Kră Yang na lĕch yua sư nhen thoi ‘lơ̆ng dêh mơ̆n, bơ̆n athei kơchăng hŏ, ‘nĕ kơ iŏk tơdrong ‘noh khan đơ̆ng bơ̆n rơih blŭng a noh trŏ bơih, ưh ôh.
Trong 21 tơ’bôh ăn kơ bơ̆n kơmĭl ‘bok Samuel, sư ling-lang tơkan tơ Kră Yang wă chă tơdrong Kră Yang bơtho tơ’bôh chông anhăk‘mơ̆i adrol kơ sư wă pơma tơwih kơ đe. Sư kư̆m bơngai tơnăp kơjăp hăm nơ̆r Kră Yang wơh athei, truh tơ tơdrong đe pơm kơ sư jĭ jơhngơ̆m ră, sư kư̆m drơ̆ng tơdrong noh đơ̆ng Kră Yang ăn (tr.22).Yua kơ Samuel drơ̆ng ăn kơ lu bơngai Isơrael đei minh ‘nu pơtao noh wă khan hơtŏ lei-lăi hăm tơdrong sư păng tơdrong bre kon sư, tơdrong jang lu sư tôch‘bơ̆t doh bơih.’Bok Samuel hlôi lăng tơdrong‘Bok Kei-Dei wă noh kăl hloh kơ tơdrong ‘mêm hnam dơnŏ, kăl hloh kơ jơhngơ̆m sư hiôk dah sơ’ngon noh.
Ơ Kră Yang, ‘bok Samuel sơ̆ pơm kơmĭl đêl sư rơih iŏk tơdrong sư pơm thoi Ih wă,
Apinh Ih tơgŭm inh rok kiơ̆ kơmĭl ‘bok Samuel gơh rơih iŏk tơdrong inh wă pơm wă jang trŏ thoi Ih wă lăm tôm tơdrong. Dah năr inh rơdu wă rok đêl kon pơlei Isơrael arăng kơ̆l, apinh Ih tơgŭm inh ‘brĕng ‘blŏk, inh hlôh kơnăl kơ tơdrong noh glăi na hơmet ming. Inh krao khan yua anăn Kră Yang Yêsu Krist, Amen!
Bơ̆n mơ̆ng nơ̆r bu wă gơh rơih iŏk tơdrong bơ̆n wă pơm bơ̆n wă jang kơplah đei dôm tơdrong anat lăm chăl arih bơ̆n?
Đŏk Sơ̆p Hla bơar ‘Bok Kei-Dei lăm pêng sơnăm: II Hơ’mon 13.
Kênh Youtube BHKTHN:
