Klei Aê Diê Blŭ: Y-Tit 3:12-15
Êlan kliăng: “Brei grăp čô hlăm phung diih đăm mĭn kơ klei tŭ dưn knŏng kơ ñu pô ôh, ƀiădah mĭn wăt kơ klei tŭ dưn kơ phung mkăn msĕ mơh” (Philip 2:4)
Klei êmuh ksiêm mĭn: Hlăm knhal tuč hră mơĭt, ya klei Khua ƀĭng kna Y-Pôl mñă kơ Y-Tit leh anăn phung đăo brei ngă? Klei mñă anăn brei ƀuh si ai tiê khua ƀĭng kna Y-Pôl? Ya klei hriăm drei mâo mơ̆ng ai tiê Khua ƀĭng kna Y-Pôl?
Hlăm knhal tuč hră mơĭt, Khua ƀĭng kna Y-Pôl mñă kơ Y-Tit: “Tơdah kâo tiŏ nao kơ ih Y-Artêmas amâodah Y-Tisik, brei ih ruăt hriê bi tuôm hŏng kâo ti ƀuôn Nikôpôlis, kyuadah kâo čuăn leh čiăng dôk tinăn êjai yan puih.” (êlan 12). Hlăm bruă klam gĭt gai hlăm klei hdĭp mngăt, ñu mđing dăp bruă grăp čô mnuih bi djŏ hŏng grăp wưng Phung Sang Aê Diê đĭ kyar. Hlăm wưng anei, sa hlăm dua čô Y-Artêmas amâodah Y-Tisik srăng jing pô kriê dlăng kơ Phung Sang Aê Diê Kret, bi Y-Tit srăng wĭt hŏng Khua ƀĭng kna Y-Pôl. Bi hŏng Y-Sênas leh anăn Y-Apôlôs, jing phung ba hră, Khua ƀĭng kna Y-Pôl ăt mñă: “Duah đru bruă Y-Sênas, khua klei bhiăn, leh anăn Y-Apôlôs hlăm klei diñu hiu, đăm brei diñu kƀah sa mta mnơ̆ng ôh” (êlan 13). Hŏng phung đăo ti plao êa Kret, Khua ƀĭng kna Y-Pôl mtă: “Brei phung đăo tinăn gĭr ngă bruă jăk čiăng dưi đru mtam tơdah mâo klei kƀah jêč, snăn đăm diñu kƀah mboh klei thâo đru” (êlan 14).
Klei Khua ƀĭng kna Y-Pôl mtă mtăn brei ƀuh klei mđing uêñ, jih ai tiê mơ̆ng sa čô mă bruă kơ Aê Diê. Ñu amâo mĭn ôh kơ klei čiăng pô ƀiădah jih ai tiê mđing kơ pô mkăn, mơ̆ng klei čiăng hlăm mngăt Phung Sang Aê Diê truh kơ klei čiăng hlăm asei mlei ayŏng adei mă bruă hŏng ñu. Ñu ăt kăn mđing mñă kơ phung đăo brei lŏ dơ̆ng ngă bruă jăk, hŏng klei kñăm čiăng kơ diñu mâo boh tŭ lu hĭn kơ Aê Diê. Mbĭt anăn ăt mđĭ ai Y-Tit leh anăn phung đăo ti plao êa Kret diñu amâo hjăn păn ôh hlăm klei đăo kyua “Jih jang phung dôk mbĭt hŏng kâo mơĭt klei čhưn kơ ih. Brei ih čhưn hŏng phung khăp kơ drei hlăm klei đăo. Brei klei pap dôk mbĭt hŏng jih jang diih” (êlan 15). Hlăm klei wah lač knhal tuč hră, Khua ƀĭng kna Y-Pôl brei ƀuh klei mđĭ ai prŏng hĭn ñu čang hmăng kơ Y-Tit leh anăn phung đăo ti Kret, anăn jing diñu dưi dôk hlăm klei pap êbeh dlai Aê Diê.
Mơ̆ng klei Khua ƀĭng kna Y-Pôl mtă, drei ƀuh ai tiê ñu brei kơ Y-Tit leh anăn Phung Sang Aê Diê ti plao êa Kret, anăn jing ai tiê mđing uêñ leh anăn bi đru hlăm Sang Aê Diê. Mnuih mă bruă kơ Aê Diê amâo djŏ knŏng mđing kơ bruă mkŏ mjing hră mơar ôh, ƀiădah ăt brei mđing kơ knuih jăk hŏng phung pô mă bruă, bi mđĭ ai ngă bruă jăk, wah lač hdơ̆ng pô čiăng kơ grăp čô dôk sơăi hlăm klei pap bi mtlaih Aê Diê. Čang hmăng grăp čô drei hdĭp nanao hlue si Klei Aê Diê Blŭ mtô, mđing nanao kơ boh tŭ kơ phung mkăn, boh nik hlăm Phung Sang Aê Diê (Philip 2:4).
Drei mđing, đru, mđĭ ai hdơ̆ng pô mă bruă kơ Aê Diê mơ̆?
Wah lač: Ơ Aê Diê, bi mni kơ Ih kyua Ih bi mtlaih leh kâo mơ̆ng klei soh, brei kâo mâo klei găl mă bruă kơ Ih. Akâo kơ Khua Yang đru kâo mâo nanao ai tiê mđing uêñ kơ klei tŭ phung mkăn, jih ai tiê mă bruă kơ Aê Diê, mă bruă kơ ayŏng adei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Bruă Mtao 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
