Loos 1:24-32
Nqe cim zaj kawm:
“Twb yog vim neeg tsis kam lees hais tias muaj Vajtswv, Vajtswv thiaj li cia lawv mus ua phem ua qias raws li lawv lub siab nyiam; yog li ntawd, lawv thiaj mus ua tej uas tsis tsimnyog ua” (Loos 1:28).
Lus nug rau sawvdaws xav:
– “Vajtswv cia” lawv mus ua phem ua qias raws li lawv lub siab nyiam yog dabtsi?
– Tsis zeem paub Vajtswv, tibneeg txoj kev sib raug zoo rau yus tsev neeg thiab lwm tus sab nraum zoo li cas?
– Zaj kawm hnub no ntuas koj dabtsi?
Vim tibneeg muab Vajtswv txojlus tseeb hloov mus txais yuav tej lus dag. Twb tsimnyog lawv pehawm Vajtswv tus uas tsim ib puas tsav yam, tiamsis lawv ho mus pe thiab teev tej uas Vajtswv tsim xwb, yog li ntawd, tus Tswv thiaj hais 3 zaug hais tias, “Vajtswv thiaj cia” lawv mus ua phem ua qias raws li lawv lub siab nyiam, lawv ua kev nkauj kev nraug tsis paub txajmuag li (nqe 24-28). Tibneeg ua txhua yam kev txhaum tsis zais los tawmtsam Vajtswv, thaum ua txhaum, lawv yeej paub hais tias yuav raug txim tuag, tiamsis lawv yeej ua kev txhaum tsis paub ntshai thiab tseem txhawb lwm tus mus koom nrog ua kev txhaum ntxiv (nqe 32). Txoj kev txhaum yoojyim tsuas kis heev thiab pheej fuam loj zuj zus hauv txhua hnub. Tibneeg mus ua txhaum npaum li cas ces tibneeg nyob quas deb Vajtswv npaum li ntawd. Thaum uas Vajtswv tso tibneeg tseg lawm, nws tsis quavntsej ceebtoom thiab tsis qhuab ntuas tibneeg, thaum ntawd tibneeg yuav ua neej raws nraim li tus yam ntxwv uas twb poob kev txhaum lawm. Vajtswv pub tibneeg muaj kev ywjpheej (Chivkeeb 2:16) tiamsis tibneeg xaiv txoj kev uas tawmtsam Vajtswv, ua rau Vajtswv chim rau tibneeg kawg nkaus.
Tus neeg uas tsis zeem paub Vajtswv, nws nyiam ntseeg raws li tej lus dag, nyiam ua kom nws tau qhuas, nyiam ua neej raws li nws lub siab nyiam thiab ntshaw ua neej tsau tsawv rau hauv txoj kev txhaum. Lawv cim civ ua rau lawv tus kheej mob thaum uas lawv sib deev, tej txivneej deev txivneej, tej pojniam deev pojniam tsis paub txajmuag li (nqe 26-27), ntawd yog tej kev txhaum uas Vajtswv ntxub ntxaug kawg li (Levis Kevcai 18:22). Vajtswv tau tso hluavtaws los hlawv lub nroog Xaudoos thiab lub nroog Kaumaulas vim tej kev phem kev qias uas zoo li ntawd (Chivkeeb 19). Vajtswv yuav rau txim rau lawv kom tsimnyog tej kev txhaum uas lawv ua (nqe 27). Qhov uas txaus ntshai tshaj yog lawv saib lawv lub cev tsis muaj nqis thiab txawm yog paub hais tias ua txhaum yuav raug tuag los lawv tsis kam tso kev txhaum tseg (nqe 32).
Tus neeg uas tsis zeem paub Vajtswv, tagnrho txhua txoj kev sib raug zoo hauv nws lub tsev neeg thiab lwm tus sab nraum yeej tsis muaj li lawm vim, “lawv ua txhua yam kev phem, lawv ua limhiam, siab hlob, ua nruj ua tsiv, sib khib, tua neeg, sib cav sib ceg, dag ntxias thiab xav phem. Lawv taug xaiv thiab ib leeg hais lus phem rau ib leeg; lawv saib tsis taus Vajtswv, thuam lwm tus, khavtheeb, muab hlob, lawv niaj hnub tuav tswvyim ua phem thiab lawv tsis mloog niam txiv lus; lawv tsis paub qhov phem qhov zoo; lawv tsis ua raws li lawv tau coglus tseg, lawv ib leeg tsis hlub ib leeg thiab lawv ib leeg tsis ua zoo rau ib leeg” (nqe 29-31). Yog li ntawd, tus tibneeg tsis muaj kev sib raug zoo nrog Vajtswv lawm, yeej tsis muaj kev sib raug zoo nrog yus tsev neeg thiab lwm tus sab nraum ib yam nkaus.
Thov Vajtswv
Vajtswv, thov zam txim rau nyuam yaus, uas ua neeg ruam tawmtsam Koj. Thov pab kom nyuam yaus paub ceevfaj tsis txhob ua ib yam dabtsi twg ua rau Koj chim siab, tiamsis pab kom nyuam yaus muaj txoj kev sib raug zoo nrog Koj txhua hnub kom muaj kev sib raug zoo rau nyuam yaus tsev neeg thiab tej phoojywg txhua tus thiaj tau txais tej koob hmoov uas Koj pub. Nyuam yaus tuav Tswv Yexus Khetos lub npe thov, Amees.
Thaum uas nyeem Loos 1:29-31, peb puas pom peb nyob rau hauv thiab? Yog muaj no peb yuav txiav txim siab li cas?
Nyeem Vajluskub hauv peb xyoos: 2 Kauleethaus 10:1-11:15
Kênh Youtube BHKTHN:
