Klei Aê Diê Blŭ: Rôm 1:24-32
Êlan kliăng: “Kyuadah diñu amâo čiăng djă pioh ôh klei thâo kral Aê Diê, snăn Aê Diê jao diñu kơ klei mĭn jhat tơl diñu ngă lu klei amâo năng ôh” (Rôm 1:28)
Klei êmuh ksiêm mĭn: Ya boh jhat mơ̆ng bruă anak mnuih tŭ klei “Aê Diê bi kmhal” hlue si klei soh? Tơdah amâo thâo kral Aê Diê, klei anăn atăt leh anak mnuih truh kơ ya klei hlăm klei bi mguôp hŏng hjăn ñu pô leh anăn hŏng phung riêng gah? Ya klei mñă kơ diih mơ̆ng klei hriăm hruê anei?
Kyua anak mnuih bi mlih leh klei guh kơang Aê Diê amâo dưi rai, mă klei blŭ luar, kkuh mpŭ leh anăn mă bruă kơ mnơ̆ng dhơ̆ng Ñu hrih mjing hrô kơ kkuh mpŭ kơ Pô Hrih Mjing, kyuanăn tlâo blư̆ Aê Diê lač “jao leh diñu”, mblang jing Aê Diê phưi diñu hlue si ai tiê diñu čiăng ngă klei čhŏ mrŏ tui si kđeh, klei knhông leh anăn ai tiê jhat diñu pô (êlan 24-28). Anak mnuih hưn mdah klei diñu bi kdơ̆ng hŏng Aê Diê wăt tơdah thâo leh dưn dŭm klei soh snăn jing năng djiê ƀiădah diñu ăt ngă soh, lŏ mtrŭt phung mkăn ngă soh msĕ snăn mơh (êlan 32). Klei soh ênưih tưp lar leh anăn đĭ lêč ƀrư̆ hruê ƀrư̆ kjham hĭn. Ƀrư̆ ngă soh anak mnuih ƀrư̆ kbưi hŏng Aê Diê leh anăn Aê Diê ăt kbưi hŏng drei mơh. Tơdah Aê Diê lui anak mnuih, amâo đru, amâo hưn brei răng amâodah ƀuah mkra snăn anak mnuih srăng hdĭp hlue si knuih čŏng mâo jing toh hroh hlăm klei soh. Aê Diê brei kơ anak mnuih klei êngiê (Klei Mphŭn Dơ̆ng 2:16) ƀiădah anak mnuih ruah êlan bi kdơ̆ng hŏng Ñu ngă kơ Ñu ruă ai tiê snăk.
Phung amâo kral Aê Diê khăng mâo klei mĭn ênưih đăo kơ klei blŭ luar čiăng bi hgăm klei čuôt klih, mđĭ kơ pô, hdĭp phưi tha leh anăn khăp dôk hlăm klei soh. Hŏng pô, diñu bi čhŏ asei mlei pô tơdah lĕ hlăm klei knhông, bi dôk hdơ̆ng êkei, hdơ̆ng mniê (êlan 26-27), sa klei soh Aê Diê bi êmut kheh (Bruă Lêwi 18:22). Ñu tuh leh pui čuh ƀuôn Sôđôm leh anăn Gômôrơ hlăk phung ƀuôn sang ngă soh klei anei (Klei Mphŭn Dơ̆ng 19). Aê Diê lač diñu srăng tŭ klei bi kmhal bi knar hŏng klei soh diñu ngă leh, anăn jing boh mơ̆ng bruă ngă (êlan 27). Kjham hĭn jing diñu amâo mđing ôh kơ klei hdĭp yuôm bhăn pô; wăt tơdah thâo klei soh snăn srăng djiê ƀiădah diñu amâo kmhal ôh (êlan 32).
Jih jang klei bi mguôp mơ̆ng ayŏng amai adei hlăm gŏ sang truh kơ phung ti êngao srăng kruh kyua “Diñu bŏ hŏng djăp mta klei wê, klei jhat, klei tluh, klei ăl. Diñu bŏ hŏng klei nač, klei bi mdjiê mnuih, klei bi mneh msao, klei mplư, klei krêñ; diñu jing phung yăl dliê klei jhat arăng, blŭ mčeh, bi êmut kơ Aê Diê, dlao wač, mgao, bi mni kơ pô, knhăk ngă soh, khăng kŏ hŏng amĭ ama, mluk mgu, amâo mâo klei đăo ôh, amâo thâo pap ôh, amâo uêñ kơ arăng ôh”(êlan 29-31). Sa čô mnuih amâo bi mguôp djŏ hŏng Aê Diê srăng amâo dưi mâo ôh klei bi mguôp djŏ klă hŏng pô leh anăn hŏng pô mkăn.
Dlăng bi nik êlan 29-31, diih ƀuh mơ̆ rup pô hlăm anăn? Ya klei diih ƀuăn?
Wah lač: Ơ Khua Yang! Kâo akâo kơ Ih pap brei kơ kâo tơdah kâo mluk mgu bi kdơ̆ng hŏng Aê Diê. Akâo kơ Ih đru kâo mkŏ mjing klei bi mguôp kjăp leh anăn djŏ hŏng Ih grăp hruê čiăng klei hdĭp kâo dưi mơak hlăm Ih leh anăn tŭ dưn kơ lu mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Kôrantô 10:1-11:15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
