Klei Aê Diê Blŭ: II Klei Yăl Dliê 21:5-6
Êlan kliăng: “Đăm bi mđua knông hŏng phung amâo đăo ôh.” (II Kôrantô 6:14a)
Klei êmuh ksiêm mĭn: Si hdră êlan mtao Y‑Jôram kiă kriê lăn čar? Si ngă phŭn knhal klei anăn? Ya klei mñă kơ ih klei yuôm kơ klei dôk ung mô̆ hlăm Khua Yang?
Mtao Y‑Jôram kiă kriê knŏng sa păn thŭn hlăm ƀuôn Yêrusalem ƀiădah lĕ ñu “êbat tui hlue êlan phung mtao Israel,” jing ngă klei jhat msĕ si phung mtao Israel. Hlăm phung mtao Yuđa, mâo đa mtao jăk leh anăn wăt mâo đa mtao jhat ƀiădah bi jih jang phung mtao Israel jing phung mtao jhat sơăi ti anăp ală Aê Diê. Amâo djŏ knŏng dŭm anăn ôh, mtao Y‑Jôram wăt ngă klei “msĕ si sang Y‑Ahap ngă leh.” Mtao Y‑Ahap ngă leh “Mdơ̆ng knưl kơ yang Baal… ngă sa ƀĕ gơ̆ng kŭt rup yang Asêra… Ahap ngă êbeh hĭn kơ jih jang phung mtao Israel êlâo kơ ñu, čiăng mčhur Yêhôwa Aê Diê Israel ăl” (I Bruă Mtao 16:32-33). Êngao tinăn, mtao Y‑Ahap wăt bi mdjiê Y‑Nabôt kyua čiăng plah mă đang boh kriăk ƀâo gơ̆ (I Bruă Mtao 21:1-14).
Mtao Y‑Jôram wăt tơdah jing anak sa čô mtao huĭ mpŭ kơ Aê Diê hlăm ƀuôn ala mtao Yuđa ƀiădah ngă klei jhat ƀai snăk sơưn msĕ si ama mô̆ ñu jing mtao Y‑Ahap. Mtao Y‑Jôram ăt “ngă anôk dlông hlăm čar kngư Yuđa, leh anăn atăt phung dôk hlăm ƀuôn Yêrusalem kơ klei amâo dôk sĭt suôr, leh anăn brei phung Yuđa klah đuĕ mơ̆ng êlan Aê Diê” (II Klei Yăl Dliê 21:11). Ñu msĕ mơh bi mdjiê jih phung adei ñu pô digơ̆ amâo klei soh ôh (II Klei Yăl Dliê 21:13) leh anăn čih leh msĕ mơh “ñu ngă klei jhat ti anăp ală Yêhôwa ” (êlan 6).
Dua êlan Klei Aê Diê Blŭ anei brei thâo phŭn knhal kơ klei mtao Y‑Jôram êbat tui hlue êlan phung mtao Israel, tui hlue msĕ si sang Y‑Ahap ngă leh leh anăn ngă klei jhat ti anăp ală Yêhôwa “kyuadah anak mniê Y‑Ahap jing mô̆ ñu” (êlan 6). pruê̆ blŭ anei yơh jing phŭn kơ êlan 6, hưn klă jih jang klei soh jhat mtao Y‑Jôram ngă kbiă hriê mơ̆ng kyua klei “anak mniê Y‑Ahap jing mô̆ ñu”. Klei Aê Diê Blŭ brei thâo, êlâo dih mtao Y‑Ahap pô msĕ mơh, wăt thâo dưn mơh tơdah mă H’Jêsabel jing mô̆ ñu, srăng atăt lăn čar truh kơ klei kkuh kơ rup yang, ƀiădah ñu yap klei anăn jing điêt, hơăi mang, kyuanăn ñu ăt ngă klei bi kuôl hŏng H’Jêsabel, leh anăn mtao “nao mă bruă kơ yang Baal leh anăn kkuh mpŭ kơ yang anăn” (I Bruă Mtao 16:31).
Phung aê drei đưm mâo klei lač “dôk mô̆ dlăng kơ djuê ana” ƀiădah Klei Aê Diê Blŭ mtô klă mngač kơ phung đăo kơ Ñu: “Đăm bi mđua knông hŏng phung amâo đăo ôh” (II Kôrantô 6:14a). Sa čô mnuih tơdah leh mkŏ mjing gŏ huă, snăn mô̆ amâodah ung yơh mâo klei bi hmăi lu hĭn hlăm klei hdĭp pô anăn. Mtao Y‑Jôram wăt tơdah mâo sa čô ama thâo huĭ mpŭ kơ Aê Diê ƀiădah lĕ tŭ klei bi hmăi lu hĭn mơ̆ng sa čô mô̆ kbiă hriê mơ̆ng găp djuê kkuh kơ rup yang leh anăn jhat ƀai. Mtao Y‑Ahap, ama mô̆ ñu, ăt kyuadah bi kuôl hŏng sa čô anak mtao čar tue kkuh kơ rup yang atăt jih lăn čar lĕ hlăm klei kkuh mpŭ kơ rup yang kjham kjhuê̆. Phung đăo kơ Krist tơdah dôk ung mô̆ hŏng mnuih amâo đăo ôh srăng tŭ boh jhat amâo djŏ knŏng kơ hjăn pô ôh ƀiădah wăt kơ phung anak čô leh anăn ba rup bi hmô jhat kơ Phung Sang Aê Diê msĕ mơh. Brei drei hŏng jih ai tiê akâo kơ Khua Yang brei drei dưi jing ung, jing mô̆ thâo huĭ mpŭ kơ Aê Diê leh anăn atăt gai phung anak čô drei tui hlue êlan Khua Yang.
Ya klei drei čuăn hlăm klei dôk ung mô̆ leh hriăm klei hriăm anei?
Wah lač: Ơ Khua Yang, akâo Ih brei kâo mâo klei thâo mĭn čiăng thâo ruah kơ kâo pô leh anăn kơ phung anak čô kâo, ung mô̆ thâo huĭ mpŭ kơ Aê Diê čiăng đăm lĕ hlăm klei kkuh kơ rup yang, hdĭp tui si lăn ala leh anăn nao hlăm êlan rai luč.
Dlăng Klei Aê Diê Blŭ hlăm tlâo thŭn: Y‑Yôhan 18:25-40
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
