II Xwmtxheej Vajntxwv 21:5-6
Nqe cim:
“Tus uas ntseeg Vajtswv tsis txhob mus nrog tus uas tsis ntseeg koom kwv ib tug quab” (II Kauleethaus 6:14a).
Lus nug rau sawvdaws xav:
– Vajntxwv Yehaulas kav lub tebchaws raws li txoj kev twg?
– Vim qhov twg vajntxwv Yehaulas ua phem li tej tus vajntxwv ua ntej?
– Koj tau lus ntuas li cas txog kev sib yuav raws li Vajtswv siab nyiam?
Vajntxwv Yehaulas nyob hauv nroog Yeluxalees tsuas kav tau yim xyoo, tiamsis nws tseem ua raws txoj kev uas txhua tus vajntxwv ua ntej nws ua thiab, txhais hais tias nws ua phem ua qias ib yam li lwm tus vajntxwv uas kav tebchaws Yixalayees tau ua los lawm. Hauv haiv neeg Yudas tej vajntxwv, muaj cov vajntxwv zoo thiab muaj cov vajntxwv phem tiamsis haiv neeg Yixalayees txhua tus vajntxwv puavleej yog tej vajntxwv phem ntawm Vajtswv lub xub ntiag. Tsis yog li ntawd xwb, vajntxwv Yehaulas tseem ua yam uas vajntxwv Ahaj twb ua los lawm thiab. Vajntxwv Ahaj “ua…lub tsev teev Npa-as… puab mlom pojniam Aselas … Nws ua rau tus TSWV uas yog cov Yixalayees tus Vajtswv chim rau nws tshaj cov Yixalayees tej vajntxwv txhua tus uas tau kav tas los lawm thiab” (I Vajntxwv 16:32-33). Vajntxwv Ahaj tseem tua Nanpaus uas yog ib tus neeg tsis muaj txim dabtsi thiab txeeb Nanpaus lub vaj txiv hmab ua vajntxwv tug (I Vajntxwv 21:1-14).
Vajntxwv Yehaulas yug los ntawm ib tus vajntxwv hauv tebchaws Yudas uas hwm tus Tswv, tiamsis nws ua phem ua qias ib yam li tus vajntxwv Ahaj uas yog nws yawm txiv. “Tsis tas li ntawd xwb, Yehaulas tseem ua ib co chaw teev dab rau saum tej roob siab hauv tebchaws Yudas, nws coj cov Yudas thiab cov neeg uas nyob hauv lub nroog Yeluxalees mus ua txhaum tawm tsam tus TSWV” (II Xwmtxheej Vajntxwv 21:11). Thiab nws tseem muab nws cov kwv uas tsis muaj txim dabtsi tua povtseg, (II Xwmtxheej Vajntxwv 21:13). Ua tej ntawd yog tus neeg ua txhaum rau tus Tswv (nqe 6).
Ob nqe Vajluskub no qhia paub lub vimchiv uas vajntxwv Yehaulas mus ua raws haiv neeg Yixalayees tej vajntxwv txojkev, ua tej yam uas vajntxwv Ahaj ua thiab ua txhaum tawm tsam tus Tswv los ntawm qhov uas “nws yuav Ahaj tus ntxhais los ua pojniam” (nqe 6). Qhov uas Vajntxwv Yehaulas pib ua txhaum yog thaum “nws yuav Ahaj tug ntxhais los ua pojniam”. Vajtswv Txojlus qhia paub hais tias, vajntxwv Ahaj kuj zoo ib yam li ntawd, txawm yog paub hais tias yuav tau Yexenpees ua pojniam yuav ua rau lub tebchaws poob rau txoj kev pe mlom los nws tsi quavntsej “nws mus yuav… Yexenpees los ua pojniam thiab mus pe tus mlom Npa-as” ib yam li Yexenpees thiab (I Vajntxwv 16:31).
Cov laus hais tseg hais tias; “Yuav pojniam saib cajces” tiamsis Vajtswv Txojlus qhia meej hais tias, tus ntseeg “tsis txhob mus nrog tus uas tsis ntseeg koom kwv ib tug quab” (II Kauleethaus 6:14a). Thaum ib tug tibneeg muaj cuabyig lawm ces tus pojniam lossis tus txiv yuav xyaum tau ntau yam hauv yus tus txij nkawm. Vajntxwv Yehaulas muaj ib leej txiv zoo uas hwm Vajtswv, tiamsis nws ho mus xyaum ua li nws tus pojniam uas yug los ntawm tsev neeg ua phem thiab pe mlom. Vajntxwv Ahaj thiab nws yawmtxiv, nyias muaj nyias kev ntseeg sib txawv thiab tsis yog tib haiv neeg. Ahaj mus yuav lwm haivneeg tus vajntxwv uas pe mlom li ntxhais los ua pojniam thiaj ua rau nws lub teb chaws poob mus rau txoj kev pe mlom lawm. Ib tus ntseeg yog yuav pojniam, yuav txiv uas tsis ntseeg, ces tsis yog ua rau yus thiab yus cov menyuam raug kev puastsuaj xwb, tiamsis tseem yog ib tus qauv tsis zoo rau Pawg Ntseeg thiab. Cia li thov Vajtswv pab kom peb yog ib tus pojniam, ib tus txiv uas muab siab rau ntseeg thiab hwm Vajtswv thiab qhia tau peb cov menyuam mus raws li tus Tswv txoj kev.
Thov Vajtswv
Vajtswv, thov pab kom nyuam yaus txawj ntse, paub xaiv tus txij nkawm uas ntseeg thiab hwm Koj, kom nyuam yaus thiab nyuam yaus cov menyuam tsis poob rau txoj kev teev dab pe mlom, tsis ua neej zoo li neeg ntiajteb thiaj tsis poob rau txoj kev puas tsuaj. Amees!
Thaum kawm dhau zaj no peb txiav txim siab li cas rau txoj kev xaiv txij nkawm?
Nyeem Vajluskub hauv peb lub xyoos: Yauhas 18:25-40
Kênh Youtube BHKTHN:
