Klei Aê Diê Blŭ: II Klei Yăl Dliê 21:1-7; 22:1
Êlan kliăng: “Đăm brei arăng mplư diih ôh; arăng amâo dưi mưč kơ Aê Diê ôh. Kyuadah ya mjeh arăng rah, ñu srăng wiă boh anăn mơh.” (Galati 6:7)
Klei êmuh ksiêm mĭn: Hlei pô jing ama mtao Y‑Ahasia? Ya ngă ñu bi mdjiê jih jang phung adei ñu? Ya klei truh kơ phung anak ñu? Ya klei mñă kơ phung jing ama amâodah anak?
Mtao Y‑Ahasia jing mtao tal 6 kơ ƀuôn ala mtao Yuđa leh anăn jing anak êkei mda hĭn mtao Y‑Jôram. Ama mtao Y‑Jôram jing mtao Y‑Jôsaphat leh anăn aê ñu jing mtao Y‑Asa. Wăt tơdah jih dua čô mtao anei ngă soh sơăi hŏng Aê Diê ƀiădah diñu ăt jing dua čô mtao jăk, huĭ mpŭ kơ Aê Diê Ƀuôn Ala Mtao Yuđa.
Mtao Y‑Jôsaphat mâo kjuh čô anak êkei, hlăk ñu djiê ñu jao kơ Y‑Jôram anak êkei ñu tal êlâo hĭn kiă kriê čuê ñu. Ƀiădah lĕ, mtao mrâo đĭ anei đing huĭ kơ phung adei êkei ñu plah mmiă snăn ñu bi mdjiê jih phung adei êkei ñu čiăng răng mgang jhưng mtao ñu (êlan 4). Êngao tinăn, hră čih pioh klei yăl dliê hƀuê ênuk ăt hưn mơh, phŭn knhal mrô dua ñu bi mdjiê phung adei ñu kyuadah jih jang digơ̆ jing jăk hĭn kơ ñu (II Klei Yăl Dliê 21:13). Mnuih jhat ƀai, mnuih mgao kreh amâo dưi tŭ ôh mâo mnuih mkăn jing jăk hĭn kơ ñu. Mtao Y‑Jôram mă tŭ boh mơ̆ng klei ñu ngă tơdah phung Arap bi mdjiê jih phung anak êkei ñu khua hĭn, kyuanăn yơh Y‑Ahasia, anak ñu mda hĭn jing pô kiă kriê čuê ñu (II Klei Yăl Dliê 22:1). Kdlưn hĭn mơh, mtao Y‑Jôram wăt bi kuôl hŏng H’Athali, anak mniê mtao Y‑Ahap leh anăn H’Jêsabel mô̆ mtao Israel jhat êdimima. Kyua bi hmăi mơ̆ng mô̆ ñu snăn mtao Y‑Jôram amâo kiă kriê lăn čar tui si êlan ama ñu mtao Y‑Jôsaphat, leh anăn aê ñu mtao Y‑Asa, ƀiădah ñu tui hlue êlan jhat ƀai Mtao Israel. Mtao Y‑Jôram dưi dôk hdĭp knŏng kyuadah klei Aê Diê sĭt suôr hŏng mtao Y‑Đawit đuč yơh (êlan 6-7).
Klei Aê Diê Blŭ brei thâo, grăp čô tŭ sơăi bruă klam klei jhat ƀai pô (Y‑Êsêkiêl 18:20). Snăn mtao Y‑Jôram tŭ bruă klam klei jhat ƀai ñu pô ngă kyuadah ama ñu leh anăn aê ñu huĭ mpŭ kơ Aê Diê sơăi, leh anăn anak ñu jing mtao Y‑Ahasia ăt tŭ bruă klam klei jhat ƀai ñu pô ngă mơh kăn bi lĕ klei soh kơ ama ñu rei. Ƀiădah lĕ, Klei Aê Diê Blŭ ăt hưn mthâo mơh Yêhôwa srăng “bi lĕ klei wê phung ama kơ phung anak tơl truh ti ênuk tal tlâo leh anăn tal pă” (Klei Yap 14:18), brei ƀuh klei bi hmăi mơ̆ng klei soh jing sui tơl truh kơ ênuk lŏ čuê. Hlăm klei truh anei, klei jhat ƀai mtao Y‑Jôram ngă bi hmăi kơ anak ñu jing mtao Y‑Ahasia wăt hlăm klei ngă bi hmô leh anăn klei tăm pah.
Klei hriăm mñă kơ drei, jing sa čô ama, sa čô khua sang, brei răng kơ klei hdĭp drei pô, brei dôk hdĭp huĭ mpŭ kơ Aê Diê leh anăn atăt gai phung anak hlăm êlan Ñu čiăng dưi pioh sa ngăn drăp jăk mơak hlăm mngăt kơ ênuk lŏ čuê (Klei Kbiă 34:6-7a). Jing sa čô anak, brei thâo mpŭ kơ amĭ ama, ƀiădah brei ăt thâo kral mơh ya mta klei bhiăn hlăm găp djuê amâo bi mơak kơ Aê Diê ôh leh anăn ya mta klei bi hmăi jhat mơ̆ng amĭ ama kơ drei, čiăng wah lač akâo kơ Khua Yang bi mtlaih leh răng mgang drei tlaih mơ̆ng mta klei anăn.
Si knhuah brei drei dôk hdĭp čiăng dưi jing sa čô ama, sa čô anak jăk?
Wah lač: Ơ Khua Yang, akâo kơ Ih đru kâo jĕ giăm hŏng Khua Yang leh anăn hŏng Klei Ih Blŭ nanao, čiăng kơ kâo êbat tui êlan Ih hŏng klei huĭ mpŭ, atăt gai phung êbat tui êlan Ih leh anăn dưi pioh sa ngăn drăp jăk mơak hlăm mngăt kơ phung anak čô kâo.
Dlăng Klei Aê Diê Blŭ hlăm tlâo thŭn: Y‑Luk 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
