Klei Aê Diê Blŭ: Êphêsô 6:1-4
Êlan kliăng: “Mpŭ kơ amĭ ama ih, čiăng bi sui hruê ih dôk hdĭp hlăm čar Yêhôwa Aê Diê ih brei kơ ih.” (Klei Kbiă 20:12)
Klei êmuh ksiêm mĭn: Si hnơ̆ng yuôm klei bhiăn mrô êma jing? Si Klei Aê Diê Blŭ mtô kơ bruă čuăn phung anak, phung amĭ ama hlăm gŏ sang? Ya klei tŭ dưn drei mă tŭ tơdah ngă ênŭm bruă čuăn Khua Yang mtô?
Hlăm Pluh Mta Klei Bhiăn, klei bhiăn mrô êma jing klei bhiăn bruă čuăn kơ phung anak hŏng amĭ ama: “Mpŭ kơ amĭ ama ih, čiăng bi sui hruê ih dôk hdĭp hlăm čar Yêhôwa Aê Diê ih brei kơ ih” (Klei Kbiă 20:12). Anăn jing klei bhiăn tal êlâo hĭn kơ bruă čuăn ti krah mnuih hŏng mnuih mâo wăt klei ƀuăn hơêč hmưi hlue mbĭt. Sa ƀuôn sang jăk ktang brei dưm ti dlông atur phung gŏ sang jăk ktang, hlăm anăn, klei bi mguôp ti krah phung anak hŏng amĭ ama jing hnơ̆ng čuăn phŭn amâo dưi kƀah kơ sa boh gŏ sang jăk ktang.
Klei Aê Diê Blŭ mtô kơ phung anak êjai amĭ ama dôk čiêm rông răng kriê, brei gưt asăp klei amĭ ama mtô lač. Khua Yang Yêsu brei leh klei bi hmô, hlăk adôk hđeh ti ƀuôn Nasaret đup gưt kơ amĭ ama Ñu hlăm kđeh jing Y-Yôsep leh anăn H’Mari (Y-Luk 2:51). Tơdah hriê kơ prŏng leh, wăt tơdah dưi hdĭp mda hjăn leh anăn djăp klei thâo săng dưi čuăn ruah bruă pô ngă dưn, brei phung anak ăt djă pioh ai tiê mpŭ kơ amĭ ama tơl tuč klei hdĭp. Ai tiê mpŭ anăn brei bi êdah hŏng knhuah hdĭp mpŭ kơ amĭ ama hlăm klei blŭ leh anăn bruă ngă. Tơdah amĭ ama hriê kơ mduôn khua, asei mlei êdu awăt amâo lŏ suaih pral ôh, bruă čuăn kơ phung anak brei đru amĭ ama hlăm klei hdĭp grăp hruê, wăt đru prăk kăk leh anăn răng kriê digơ̆ tui si hnơ̆ng pô dưi. Khua ƀĭng kna Y-Pôl mtô leh hlăm hră čih mơĭt I Y-Timôthê 5:4, 8 snei: “Tơdah sa čô mniê djiê ung mâo anak amâodah čô, brei digơ̆ hriăm êlâo hĭn thâo ngă klei mpŭ kơ găp djuê diñu pô, leh anăn thâo hdơr knga kơ amĭ ama diñu. Kyuadah klei anăn bi mơak kơ Aê Diê… Tơdah hlei pô amâo uêñ đru kơ phung găp djuê, ñu boh nik nak kơ boh gŏ ñu pô, ñu hngah leh klei đăo leh anăn jing jhat hĭn kơ sa čô amâo đăo ôh.”
Bi tĭng kơ phung amĭ ama, boh nik nak phung ama jing khua kơ boh gŏ, “đăm mngal anak diih tơl krêñ ôh”, msĕ si đa ngă klei ktư̆ juă, yua ngă đa klei amâo djŏ găl,“ƀiădah čiêm rông digơ̆ hŏng klei mkra mjuăt leh anăn klei bi hriăm tui si klei Khua Yang čiăng” (Êphêsô 6:4b). Tơdah klei amĭ ama mkra mjuăt kñăm čiăng đru phung anak đĭ hriê kơ prŏng leh anăn kbiă mơ̆ng klei mtrŭt kyua klei khăp, phung anak srăng thâo săng amĭ ama čiăng ngă klei jăk kơ diñu, amâo djŏ ôh kyuadah klei ăl ngêñ. Brei phung amĭ ama tui hriăm mơ̆ng Khua Yang Yêsu klei mtô mjuăt mkra (Hêbrơ 12:1-11).
Phung anak leh anăn phung amĭ ama ngă bi ênŭm bruă čuăn kơ pô tui si Klei Aê Diê Blŭ mtô jing bi êdah klei đăo kơ Khua Yang, srăng dưi mă tŭ klei jăk mơak Khua Yang ƀuăn leh, leh anăn jing klei bi hmô kơ lu mnuih dưi thâo kral Khua Yang mơ̆ng klei hdĭp gŏ sang pô. Kdlưn hĭn, klei gưt asăp kơ amĭ ama ăt jing klei bi hriăm mjuăt phung anak srăng gưt asăp kơ Yang Krist jăk hĭn tơdah diñu đĭ hriê kơ prŏng.
Si ngă diih dôk hdĭp tui si Klei Aê Diê Blŭ mtô lač kơ gŏ sang leh mơ̆? Ya mta klei čiăng lŏ bi mlih?
Wah lač: Ơ Khua Yang, akâo kơ Ih đru kâo ngă bi ênŭm bruă čuăn hlăm gŏ sang tui si Klei Aê Diê Blŭ mtô čiăng dưi bi mơak kơ Khua Yang leh anăn gŏ sang kâo dưi bi guh kơang kơ Anăn Khua Yang ti krah anôk kâo dôk hdĭp.
Dlăng Klei Aê Diê Blŭ hlăm tlâo thŭn: Y-Markôs 6:30-56
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
