Klei Aê Diê Blŭ: II Kôrantô 10:1-4, 9-10
Êlan kliăng: “Kyuadah wăt tơdah hmei dôk hdĭp hlăm kđeh, hmei amâo bi blah tui si klei bhiăn kđeh ôh. Kyuadah mnơ̆ng hmei yua bi blah amâo djŏ tui si mnơ̆ng kđeh ôh, ƀiădah mơ̆ng klei myang Aê Diê dưi bi rai kđông kjăp” (II Kôrantô 10:3-4)
Klei êmuh ksiêm mĭn: Ya klei arăng čhal lač Khua ƀĭng kna Y‑Pôl tuôm? Si bruă ñu ngă? Ya klei hriăm drei mâo mơ̆ng klei Khua ƀĭng kna Y‑Pôl tlă anăp hŏng klei bi kdơ̆ng?
Lu phung đăo hlăm Sang Aê Diê Kôrantô thâo kmhal leh anăn mâo klei mĭn djŏ kơ Khua ƀĭng kna Y‑Pôl (II Kôrantô 7:6-16). Khădah snăn, ăt adôk mâo ƀiă mnuih lač kơ ñu leh anăn phung mă bruă mbĭt “tui si klei bhiăn kđeh” (êlan 2), leh anăn bi mklă Khua ƀĭng kna Y‑Pôl “…kâo gơ̆ pô êdu êun tơdah kâo dôk mbĭt hŏng diih, ƀiădah khăng tơdah kâo êkŭt mơ̆ng diih” (êlan 1, dlăng thiăm hlăm êlan 10). Diñu lŏ lač gơ̆ hdĭp hlue si kđeh (êlan 2). Lač snăn kyua čiăng mdlưh kơhưm Khua ƀĭng kna Y‑Pôl leh anăn ktŭng lu mnuih dlăng hơăi mang klei dưi gơ̆ hŏng phung đăo ti Kôrantô.
Tlă anăp hŏng klei bi kdơ̆ng anei, êlâo hĭn Khua ƀĭng kna Y‑Pôl êdu êun “1Kâo gơ̆ Y‑Pôl kwưh kơ diih hŏng klei êdu êun leh anăn klei jăk Krist…” (êlan 1), leh anăn ñu lač wăt tơdah pô ăt dôk hlăm kđeh, ƀiădah amâo dưi bi blah hlue si kđeh ôh, ñu knŏng yua klei myang Aê Diê mjing mnơ̆ng bi kdơ̆ng leh anăn bi rai djăp kđông kjăp, klei mblang leh anăn djăp mta klei mgao ngă jhat kơ klei hdĭp klei đăo phung đăo (êlan 3-4)
Hlăm lu hră ñu pô čih, Khua ƀĭng kna Y‑Pôl khăng yua akŏ kdrêč hră čiăng hưn mthâo phŭn bruă ñu ngă Khua ƀĭng kna. Mơ̆ng anăn, ñu bi mklă hŏng phung đăo ti Sang Aê Diê alŭ wăl brei thâo ñu mâo djăp klei dưi čiăng dưi nao hŏng digơ̆. Khădah snăn, klei êdah êdi tinei jing amâo djŏ knŏng mgô̆ grăp čô mnuih gưt kơ klei dưi pô ôh, ƀiădah tơdah tlă anăp hŏng klei bi kdơ̆ng, ñu tui hlue Khua Yang Yêsu (Y‑Mathiơ 11:29), yua klei “ênang leh anăn mâo ai tiê luă gŭ mơ̆ng Krist” čiăng mblang kơ phung đăo dôk êbat hlăm êlan soh. Ñu thâo tơdah ñu amâo bi kdơ̆ng hŏng kđeh snăn klei myang Aê Diê srăng ngă bruă čiăng kơ phung bi kdơ̆ng srăng tŭ yap ñu.
Hlăm klei mă bruă kơ Aê Diê, mâo lu blư̆ drei tlă anăp hŏng klei bi kdơ̆ng hlăm Sang Aê Diê mtam, si hdră drei bi kdơ̆ng? Lu blư̆ kyua ƀah klei ênang anăn drei “bi blah tui si kđeh” leh anăn mâo lu klei ênguôt hnĭng. Brei tui hlue Khua Yang Yêsu leh anăn Khua ƀĭng kna Y‑Pôl , yua klei khăp, klei êdu êun, klei pap Aê Diê čiăng msir mgaih djăp mta klei truh. Klei myang Aê Diê srăng bi rai jih kđông kjăp, klei mblang kjăp.
Si drei khăng ngă tơdah tuôm hŏng klei bi kdơ̆ng?
Wah lač: Ơ Aê Diê pô khăp! Kâo bi mni kơ Ih kyua dưi hriăm klei thâo mơ̆ng Khua ƀĭng kna Y‑Pôl. Akâo kơ Ih đru kâo bi guh kơang Anăn Ih wăt tơdah tlă anăp hŏng klei bi kdơ̆ng, amâo ngă ôh msĕ si mnuih hlăm lăn ala, ƀiădah thâo luă gŭ leh anăn thâo pap msĕ si Khua Yang Yêsu.
Dlăng Klei Aê Diê Blŭ hlăm tlâo thŭn: Y‑Malaki 2:1-3:6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
