Thaum Ntsib Kev Tawmtsam – 25/4/2023

7176

 

 

II Kauleethaus 10:1-4, 9-11 

Nqe cim:

Peb yeej nyob hauv ntiajteb no tiag, tiamsis peb tsis tawmtsam li neeg ibtxwm tawmtsam. Thaum peb tawmtsam yeebncuab peb tsis siv tej cuabyeej uas neeg ibtxwm siv. Tiamsis peb siv tej cuabyeej uas Vajtswv tus uas muaj hwjchim muab rau peb, peb thiaj rhuav tau yeebncuab lub yeej kom puastsuaj” (II Kauleethaus 10:3-4).

 

Lus nug rau sawvdaws xav:

–       Timthawj Paulus ntsib kev thuam licas?

–       Timthawj Paulus ua licas?

–       Peb kawm tau dabtsi ntawm Timthawj Paulus thaum nws ntsib kev tawmtsam ?

Feem ntau cov ntseeg hauv Pawg Ntseeg Kauleethaus twb hloov siab thiab muaj kev xav ncaj ncees rau Timthawj Paulus lawm (II Kauleethaus 7:6-16). Tiamsis, tseem muaj qee leej xav hais tias Timthawj Paulus thiab cov nrog nws ua haujlwm xav “tau ntsej tau muag ib yam li neeg ibtxwm xav ua” (nqe 2), thiab Timthawj Paulus piav hais tias: “…muaj neeg hais tias thaum kuv nrog nej nyob kuv ntshai nej, tiamsis thaum kuv tsis nrog nej nyob lawm kuv ua tawv kawg li tuaj rau nej!” (nqe 1, saib ntxiv nqe 10). Lawv tseem hais tias nws ua lub neej raws li neeg ntiajteb ua xwb (nqe 2). Lawv thuam li ntawd kom txo Timthawj Paulus qis thiab yaum lwm tus ntseeg hauv Pawg Ntseeg Kauleethaus uas saib tsis taus Timthawj Paulus lub meejmom timthawj tuaj lawv tog.

Thaum ntsib kev tawmtsam zoo li no, qhov xubthawj Timthawj Paulus ua siab ntev, nws hais tias “…Yexus Khetos pub kuv muaj lub siab mos siab muag thiab lub siab hlub ib yam li nws, kuv thiaj thov ntuas nej…” (nqe 1), thiab nws hais ntxiv hais tias txawm nws tseem nyob hauv lub ntiajteb no tiag, los nws yeej tsis tawmtsam li neeg ibtxwm tawmtsam, nws tsuas siv tej cuabyeej uas Vajtswv muab pub los tawmtsam yeebncuab lub yeej kom puastsuaj, tawmtsam tej lus hais, tej uas neeg muab los thaiv tsis pub sawvdaws paub Vajtswv, ua cuam tshuam tus ntseeg lub neej (nqe 3-4).

Nyob hauv tej tsab ntawv uas Timthawj Paulus sau, nws pheej siv ntu thawj los hais txog nws tes haujlwm Timthawj. Dhau qhov ntawd, nws hais khov kho rau cov Pawg Ntseeg paub hais tias nws muaj txaus hwjchim, peevxwm tuaj cuag lawv. Tiamsis, qhov tseemceeb ntawm no yog nws tsis yuam kom sawvdaws yuav tsum nyob qab tswjhwm ntawm nws, tiamsis thaum ntsib kev tawmtsam nws kawm Tswv Yexus tus qauv (Mathais 11:29), siv Yexus “lub siab mos siab muag thiab lub siab hlub” qhuab ntuas cov ntseeg uas yuamkev. Timthawj Paulus paub hais tias thaum nws tsis siv tej cuabyeej sab nqaij tawv los tawmtsam, ces Vajtswv lub hwjchim yuav ua rau nws cov yeebncuab raug swb.

Nyob hauv kev ua tus Tswv haujlwm, muaj ntau zaug peb ntsib tej kev tawmtsam hauv Pawg Ntseeg tuaj, peb siv yam dabtsi los tawmtsam? Ntau zaug tswj tsis taus tus kheej peb “tawmtsam li neeg ibtxwm tawmtsam” thiab ua rau muaj ntau yam teebmeem nyuaj siab ntxhov plawv. Cia li kawm raws Tswv Yexus thiab Timthawj Paulus tus qauv, siv tus Tswv txojkev hlub, lub siab mos muag los daws tej teebmeem. Vajtswv lub hwjchim yuav ua rau yeebncuab lub yeej, tej lus hais tawmtsam raug puastsuaj.

 

Thov Vajtswv,

Vajtswv! Nyuam yaus ua Koj tsaug vim tau kawm txog Timthawj Paulus tus qauv. Thov pab nyuam yaus paub ua rau Koj tau koobmeej thaum ntsib tej kev tawmtsam, kom nyuam  yaus tsis tawmtsam li neeg ntiajteb tawmtsam, tiamsis siv txojkev hlub, lub siab mos muag zoo li Tswv Yexus tus qauv. Amees.

Peb pheej ua licas thaum ntsib kev tawmtsam?

Nyeem Vajluskub hauv peb lub xyoo: Malakis 2:1-3:6

Kênh Youtube BHKTHN:

https://www.youtube.com/c/bhkthn

Bài trướcĐăk Lăk: Điểm Nhóm Buôn Sah Chuyển Địa Điểm Sinh Hoạt Mới
Bài tiếp theoTlă Anăp Hŏng Klei Bi Kdơ̆ng – 25/4/2023