II Kevcai 21:18-21
Nqe cim:
“Tus tub uas txawj ntse yeej ua tib zoo mloog thaum nws txiv qhuab ntuas nws, tiamsis tus uas muab hlob yeej tsis kam lees nws tej kev txhaum” (Pajlug 13:1).
Lus nug rau sawvdaws xav:
– Feemxyuam ntawm menyuam ua rau niam txiv yog dabtsi?
– Niam txiv yuav tsum ua dabtsi thaum pom tej menyuam yim hnub yim tawv ncauj, tsis mloog lus?
– Vim licas raug lub txim hnyav npaum ntawd?
– Zaj kawm no qhia cov ntseeg yuav tsum qaij yam dabtsi?
Nyob hauv Kaum Nqe Kevcai, nqe kevcai hwm niam hwm txiv yog ib nqe nyob hauv tej feemxyuam uas tus Tswv cov menyuam yuav tsum ua nyob hauv kev sib txuas nrog lwm tus tibneeg (Khiavdim 20:12). Qhov no qhia pom hais tias menyuam hwm niam txiv yog yam cheemtsum ua xubthawj nyob hauv kev sib txuas nrog lwm tus hauv lub neej. Ib tes haujlwm qhia tshwm lub siab hwm niam hwm txiv yog ua raws niam txiv tej lus qhuab ntuas (Pajlug 1:7-9; 13:1). Ntu Vajluskub hnub no piav txog zaj teebmeem hais tias yog muaj tej menyuam tawv ncauj, ntxeev siab thiab tsis hwm niam txiv, txawm yog nws niam thiab nws txiv qhuab ntuas nws los nws tsis mloog li, tseem pheej muab tej nyiaj coj mus siv ua phuam lam tas, thiab ua neeg quav cawv. Yog muaj cov menyuam tawv ncauj qhia tsis tau li ntawd, ces “nws niam thiab nws txiv cia li coj nws mus cuag cov thawjcoj hauv lawv lub nroog, thiab kom nws mus sawv ntawm qhov chaw txiav txim” (nqe 19). Nyob rau tiam ntawd, cov thawjcoj tuaj nyob ntawm lub qhov rooj nroog txiav txim zoo li ib rooj txiav txim. Thaum taug pom hais tias niam thiab txiv tej lus yog lus tseeb lawm, ces tus menyuam ntxeev siab ntawd yuav raug cov pejxeem muab pobzeb ntaus kom tuag.
Tej zaum peb pom hais tias lub txim no hnyav heev rau tus menyuam. Tiamsis raws li Vajtswv pom, qhov no yog ib zaj teebmeem loj yuav tsum txiav txim hnyav. Vim yog tus menyuam ntawd pheej tawv ncauj ua neeg ntxeev siab, saib tsis taus niam txiv tej lus qhuab qhia, ua neej quav cawv ywj siab ces tsis yog tsuas tsis hwm niam hwm txiv xwb, tseem yog ua txhaum rau tus Tswv thiab, nws ua txhaum nqe kevcai tim tsib nyob hauv Kaum Nqe Kevcai. Ntawm no yog qhov kev txhaum hnyav heev yuav tsum txiav txim hnyav kom tsis muaj coob tug menyuam tawv ncauj nyob hauv lub cuabyig, ua rau zej zos muaj kev kub ntxhov thiab ua rau tus Tswv haivneeg dawbhuv puas koob puas npe.
Nyob hauv lub neej ua ib tug menyuam, peb yuav tsum mloog niam txiv tej lus qhuab ntuas. Niaj hnub nimno, coob tug hluas muaj lub siab xav hais tias niam txiv phaum ces poob qab lawm, yuav tsis totaub thiab qhia tsis tau phaum hluas. Ib txhia xav hais tias tej uas niam txiv qhia yog phim txheej laus xwb, tsis phim txheej neeg tiam tshiab zoo li niaj hnub nimno lawm. Lwm cov hluas ho xav hais tias lawv yuav kawm tau ntau yam hauv tsev kawm, saum internet heev dua kawm ntawm niam txiv… Twb yog vim tej kev xav zoo li no thiaj ua rau tej menyuam txav deb niam txiv, tawmtsam niam txiv tej lus qhia, tsis hwm niam hwm txiv. Yog ib tug ntseeg, peb yuav tsum qaij txhob poob mus rau zaj no.
Thov Vajtswv,
Tus Tswv, Koj yog tus cia peb nyob hauv tej lub cuabyig sib txawv, muaj lub neej sib txawv. Txawm yuav zoo licas los thov Koj pab kom nyuam yaus ua tau lub neej hwm niam hwm txiv li Koj tej lus qhia. Amees.
Peb puas mloog lus thiab qhia tshwm nplooj siab hwm niam hwm txiv lawm tau?
Nyeem Vajluskub hauv peb lub xyoo: Xakhaliyas 3:1-5:11
Kênh Youtube BHKTHN:
