Henplais 7:11-22
Nqe cim:
“Yog li ntawd, yog cov povthawj uas yog xeem Levis coj tau neeg los cuag Vajtswv lawm, ces tsis tas yuav muaj dua ib tug povthawj uas muaj yam ntxwv zoo li Mekhixedes los hloov cov povthawj uas muaj yam ntxwv zoo li Aloos?” (Henplais 7:11).
Lus nug rau sawvdaws xav:
– Tes haujlwm povthawj ntawm cov Levis muaj qabhau licas?
– Vim licas tes haujlwm povthawj ntawd zoo tsis txaus?
– Vajtswv tau ua dabtsi daws qhov teebmeem no?
– Qhov twg thiaj yog txojhau kev zoo txaus nkaus uas peb yuav tsum mus raws?
Thaum tsim ntuj tsim teb, Vajtswv txaus siab rau tej yam uas Nws tsim, txhais tau hais tias Vajtswv yeej tsim txhua yam zoo txaus nkaus. Tiamsis txij thaum kev txhaum los txuam yuaj, hauv ntiajteb tsis tshuav ib yam twg zoo txaus nkaus lawm. Vajtswv pub Nws Txoj Kevcai rau cov Yixalayees kom lawv paub Nws lub siab nyiam, thiab paub hais tias tibneeg ua tsis tau zoo thaum muab piv rau Vajtswv kev zoo txaus nkaus. Lub hauv paus tseemceeb ntawm Txoj Kevcai yog tes haujlwm povthawj ntawm cov Levis, yog txoj haukev kom coj tau tibneeg txhaum los cuag Vajtswv tus uas dawbhuv los ntawm kev hlawv khoom fij. Tiamsis tseeb tiag tes haujlwm povthawj ntawm cov Levis raws li kevcai yeej pab tsis tau kom tibneeg zoo txaus nkaus (nqe 11), “Mauxes txoj kevcai ua tsis tau kom neeg ua tau zoo kawg nkaus” (nqe 19). Raws li Timthawj Paulus piav qhia, txawm Txoj Kevcai yog zoo thiab ncaj ncees, tiamsis tsuas pab tau kom tibneeg zeem paub kev txhaum xwb, pab tsis tau kom dim kev txhaum (Loos 7:7).
Tus sau tsab ntawv Henplais piav qhia hais tias Vajtswv muaj txoj haukev daws qhov teebmeem ntawd dhau ntawm lwm tes haujlwm povthawj tsis khom rau Txoj Kevcai. Thaum xubthawj, lossis ua ntej muaj Txoj Kevcai twb muaj Mekhixedes tes haujlwm povthawj lawm. Nyob hauv nqe 17, tus sau tsab ntawv Henplais kuj siv Ntawv Nkauj 110:4 los hais txog qhov uas Vajtswv yuav txhim muaj ib tes haujlwm povthawj mus ibtxhis raws li Mekhixedes tau ua los lawm. Tswv Yexus yog tus tuav tes haujlwm povthawj ntawd, tes haujlwm ntawd tsis yog tsuas zoo dua cov Levis tes haujlwm povthawj xwb, tseem yog tes haujlwm povthawj zoo txaus nkaus thiab. Txhais tau hais tias dhau ntawm tej uas Tswv Yexus ua, txhua yam yuav zoo txaus nkaus, vim Tswv Yexus yog tus qhwv tej lus cogtseg no (nqe 22).
Cov neeg Yudais ib txwm khav txog qhov uas lawv muaj Txoj Kevcai, muaj kev hlawv khoom fij. Tseeb tiag, tej ntawd puavleej yog tej yam zoo thiab ua rau cov pejxeem tau txais ntau yam koob hmoov. Tiamsis txojkev ntawd ua tsis tau kom lawv ua tau neeg zoo kawg nkaus, kuj cawm tsis tau lawv dim. Muaj ib txhia neeg thaum tau lwm tus piav qhia txog Tswv Yexus, lawv tsis txais yuav vim xav hais tias tus kheej txojkev twb zoo lawm, ntseeg Tswv Yexus ua dabtsi? Tiamsis qhov tseeb “muaj ib txojkev uas neeg xav hais tias yog txoj zoo, tiamsis txoj ntawd coj mus raug kev ploj kev tuag” (Pajlug 14:12). Tej zaum nyob hauv qub kev ntseeg kuj muaj yam zoo, muaj nqis rau peb, tiamsis qhov tseemceeb yog txojkev ntseeg ntawd cawm tsis tau leejtwg dim. Tsuas muaj Tswv Yexus txojkev xwb thiaj pab peb ua tau neeg zoo txaus nkaus, tau txais txojsia ntev dhawv mus ibtxhis. Txojkev ntawd yog los ntawm Vajtswv txojkev tabncuab thiab peb kev ntseeg tej uas Tswv Yexus tau ua saum tus ntoo khaublig.
Thov Vajtswv,
Tus Tswv, thov ua Koj tsaug vim thaum nyuam yaus tas kev cia siab hauv txojkev txhaum, Koj tau hlub thiab pub txoj haukev zoo txaus nkaus kom nyuam yaus tau cawmdim los ntawm kev ntseeg tej uas Koj tau ua. Thov pab nyuam yaus muaj kev ntseeg txhua hnub thiab txiav tu nrho nrog nyuam yaus txojkev qub. Amees.
Peb puas tabtom vamkhom Vajtswv txojkev hlub los ua lubneej ntseeg Nws txhua hnub?
Nyeem Vajluskub hauv peb lub xyoo: Hakais 1
Kênh Youtube BHKTHN:
