Klei Aê Diê Blŭ: I Y‑Timôthê 4:12-16
Êlan kliăng: “Đăm ngă klei amâo uêñ ôh kơ klei brei ih mâo leh, Aê Diê brei leh kơ ih tui si klei hưn êlâo êjai phung khua mduôn ênă kngan kơ ih.” (I Y‑Timôthê 4:14)
Klei êmuh ksiêm mĭn: Ya mta klei khua ƀĭng kna Y‑Pôl mtă mtăn kơ khua pô mtô hlăk ai Y‑Timôthê? Ñu mñă kơ khua pô mtô Y‑ Timôthê si knhuah brei mâo hŏng klei brei mơ̆ng Khua Yang? Si drei dôk yua klei brei Khua Yang bi mbha pioh ngă bruă kơ Ñu?
Y‑Timôthê jing sa čô khua pô mtô mâo bruă jao brei kiă kriê Phung Sang Aê Diê ti ƀuôn Êphêsô êjai thŭn adôk mda (I Y‑Timôthê 1:3), kyuanăn khua ƀĭng kna Y‑Pôl čih hră mtă mtăn leh anăn bi mđĭ ai anak ñu rông ba hlăm mngăt kơ bruă jao. Ñu lač: “Đăm brei ôh arăng bi êmut kơ ih kyua ih jing hlăk ai, ƀiădah brei ih jing klei bi hmô kơ phung đăo hlăm klei blŭ, hlăm klei dôk dơ̆ng ƀơ̆ng huă, hlăm klei khăp, hlăm klei đăo, hlăm klei êngeh” (êlan 12). Êngao kơ êma mta klei brei ngă klei bi hmô kơ phung đăo, Y‑Timôthê ăt brei gĭr dlăng Klei Aê Diê Blŭ kơ phung bi kƀĭn, mtô, leh anăn gĭr bi hriăm (êlan 13). Mta klei yuôm hĭn dơ̆ng, ñu amâo dưi ngă klei amâo uêñ ôh kơ klei brei Khua Yang brei leh kyuadah tui si klei hưn êlâo êjai phung khua mduôn ênă kngan kơ ñu. Klei pap Khua Yang brei ƀiădah amâo yua ôh jing amâo mdê hĭn ôh hŏng sa čô dĭng buăl dơr mdăp hĕ talăng (Y‑Mathiơ 25:24-27).
Khua ƀĭng kna Y‑Pôl bi klă bruă jao kơ khua pô mtô Y‑Timôthê, brei leh kyua klei hưn êlâo leh anăn klei tiŏ nao, amâo djŏ jing bruă bi mđĭ mjing mă hjăn pô ôh. Hlăk Khua Yang jao bruă kơ khua pô mtô Y‑Timôthê Khua Yang ăt brei mbĭt mơh klei brei myang čiăng ngă bruă kơ Khua Yang, boh nik nak klei brei dưi mtô mblang. Klei pap anei khua ƀĭng kna Y‑Pôl mtă mtăn leh anăn mñă lu blư̆ hlăm kluôm hră ñu čih mơĭt. Khua pô mtô Y‑Timôthê amâo dưi ngă klei amâo uêñ ôh kơ klei brei dưi mtô mblang ƀiădah brei răng snăk leh anăn jao ñu pô kơ bruă mtô mblang čiăng kơ ñu pô leh anăn mbĭt hŏng phung dôk hmư̆ mâo klei bi mtlaih (êlan 16).
Tơdah Khua Yang jao ya mta bruă kơ hlei pô, Ñu ăt srăng brei nanao mbĭt klei brei čiăng dưi ngă bruă klam Khua Yang jao mơh, msĕ si klei blŭ hlăm sa klei mmuñ doh jăk: “Ñu brei thiăm klei pap, tơdah Ñu jao thiăm bruă klam yuôm.” Hlăk đưm, Khua Yang tiŏ nao Y‑Môis bi tuôm hŏng Pharaôn čiăng akâo kơ phung ƀuôn sang Israel dưi kbiă mơ̆ng čar Êjip, Khua Yang amâo djŏ knŏng brei klei pap ti ƀăng kƀông hjăn kơ Y‑Môis ôh ƀiădah wăt kơ Y‑Arôn mơh, ayŏng ñu kăp nao mbĭt hŏng ñu (Klei Kbiă 4:10-16). Klei yuôm jing, si ngă drei yua klei brei anăn pioh ngă bruă kơ Khua Yang leh anăn čiăng bi leh kluôm ênŭm bruă Khua Yang jao mơ̆?
Tơdah drei amâo wơr klei pap Aê Diê brei, ƀiădah thâo yua čiăng ngă bruă kơ Khua Yang mâo boh tŭ dưn, snăn Ñu srăng lŏ brei thiăm hĭn êjai klei pap kơ drei. Ƀiădah brei drei hdơr snei: “arăng srăng akâo lu hĭn mơ̆ng pô arăng jao leh lu hĭn” (Y‑Luk 12:48b). Kyuanăn, drei amâo dưi ngă klei amâo uêñ amâodah phưi lui hĕ ôh klei pap Aê Diê brei, msĕ si klei pô dĭng buăl ƀai leh anăn alah ngă leh hlăm klei yăl dliê bi hriêng kơ talăng. Bi mklăk, brei drei yua klei brei Khua Yang bi mbha leh anăn lŏ bi mđĭ hĭn kơ Ñu msĕ si pô dĭng buăl jăk leh anăn sĭt suôr Khua Yang (Y‑Mathiơ 25:14-30).
Si ngă drei ngă klei amâo uêñ leh anăn dlăng hơăi mang kơ klei brei Khua Yang brei kơ drei mơ̆?
Wah lač: Ơ Khua Yang, akâo Khua Yang pap brei kơ kâo đa kyuadah kâo tuôm ngă klei amâo uêñ kơ klei pap Ih brei. Akâo Khua Yang đru kâo thâo kral nanao leh anăn lŏ bi mđĭ hĭn êjai klei pap Khua Yang brei čiăng dưi mâo boh tŭ dưn jăk hĭn kơ Buôn Ala Mtao Ih.
Dlăng Klei Aê Diê Blŭ hlăm tlâo thŭn: Y‑Mika 1:1-2:5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
