I Timautes 4:12-16
Nqe cim:
“Tsis txhob muab lub tswvyim uas koj muaj tso tseg. Lub tswvyim ntawd twb muab rau koj thaum uas cov cev Vajtswv lus thiab cov txwjlaug tsa tes thov Vajtswv rau koj lawm” (I Timautes 4:14).
Lus nug rau sawvdaws xav:
– Timthawj Paulus ntuas Xibhwb hluas Timautes txog yam dabtsi?
– Nws qhia kom Xibhwb Timautes yuav tsum muaj tus cwjpwm zoo licas rau tej koob hmoov uas tus Tswv pub?
– Peb tabtom siv koob hmoov tus Tswv pub los ua Nws haujlwm licas?
Timautes yog ib tug xibhwb tau muab cob saibxyuas Pawg Ntseeg hauv nroog Efexus thaum nws tseem hluas heev (I Timautes 1:3), yog li ntawd Timthawj Paulus thiaj sau tsab ntawv mus qhuab ntuas thiab txhawb nws tus tub sab ntsujplig ntawd txojkev ua haujlwm. Nws hais tias: “Koj tsis txhob pub leejtwg thuam hais tias koj tseem hluas, tiamsis koj yuav tsum ua koj lub neej rau cov ntseeg xyaum, tsis hais tej lus uas koj hais, tej haujlwm uas koj ua, hlub lwm tus, muab siab rau ntseeg thiab ua neeg zoo” (nqe 12). Nrog rau tsib yam yuav tsum ua qauv zoo rau cov ntseeg, Timautes kuj yuav tsum niaj hnub qhuab qhia, cob qhia lawv (nqe 13). Yam tseemceeb tshaj ntxiv yog Timautes yuav tsum tsis txhob muab tej koob hmoov tso tseg lossis hnov qab tej koob hmoov tus Tswv muab pub, vim nws tau tej ntawd thaum cov cevlus thiab cov txwjlaug tsa tes thov Vajtswv rau nws. Koob hmoov yeej yog tus Tswv muab pub tiamsis yog tsis siv kuj zoo ib yam li tus tubtxib uas muab nyiaj faus cia (Mathais 25:24-27).
Timthawj Paulus lees hais tias Timautes teg haujlwm saibxyuas Pawg Ntseeg tau muab pub los ntawm cov cev Vajtswv lus thiab yog tau txib thiaj ua, tsis yog cim civ sawv ua. Thaum tau tus Tswv muab cob haujlwm, Timautes kuj tau tus Tswv pub koob hmoov sab ntsujplig los ua haujlwm, tshwjxeeb yog koob hmoov qhuab qhia. Yam koob hmoov no tau Timthawj Paulus txhawb zog thiab rov hais txog ntau zaug hauv tsab ntawv. Xibhwb Timautes yuav tsum tsis txhob saib tsis taus koob hmoov qhuab qhia tiamsis yuav tsum xyuamxim thiab ua tib zoo qhuab qhia kom nws tus kheej thiab cov uas mloog nws qhia tau dim txim (nqe 16).
Thaum Vajtswv muab tes haujlwm cob rau ib tug twg, Nws yuav pub koob hmoov rau tus ntawd ua tiav lub luag haujlwm, zoo li ib zaj nkauj qhuas Vajtswv muaj ntsiab lus hais tias: “Nws pub koob hmoov ntxiv, thaum muab cob tej haujlwm tshiab.” Hnub thaud, Mauxes tau tus Tswv txib tuaj cuag Falaus thov tso cov Yixalayees tawm hauv tebchaws Iziv, tus Tswv tsis yog tsuas pub Mauxes muaj tswvyim hais lus xwb tiamsis tseem pub rau Aloos uas yog nws tus tijlaug thiab, kom ob tug ua ke mus (Khiavdim 4:10-16). Qhov tseemceeb yog peb puas siv tej koob hmoov ntawd los ua tus Tswv tes haujlwm thiab ua tiav lub luag haujlwm Nws muab pub xwb?
Thaum peb tsis hnov qab tej koob hmoov tus Tswv muab pub ua Nws haujlwm, ces Nws yuav pub koob hmoov txhab ntxiv rau peb. Tiamsis peb kuj yuav tsum nco hais tias: “Tus uas tau ntau dua, tus ntawd yuav tsum pauj ntau dua” (Lukas 12:48b). Vim li ntawd, peb tsis txhob hnov qab lossis muab tus Tswv tej koob hmoov tso tseg li tus tubtxib tsis ncajncees thiab tub nkeeg tau ua hauv zaj lus pivtxwv hais txog tej choj nyiaj. Tiamsis, peb yuav tsum siv tej koob hmoov tus Tswv muab pub thiab ua kom tsam rau Nws li tus Tswv tus tubtxib uas zoo thiab ncaj ncees (Mathais 25:14-30).
Thov Vajtswv,
Tus Tswv, thov zam txim rau nyuam yaus vim nyuam yaus tau hnov qab tej koob hmoov Koj muab pub. Thov pab nyuam yaus zeem paub thiab ua kom tej koob hmoov Koj muab nthuav dav,ua tau haujlwm tawg paj txi txiv rau Koj lub tebchaws. Amees.
Peb puas hnov qab thiab ua saib tsis taus koob hmoov tus Tswv muab pub rau tus kheej?
Nyeem Vajluskub hauv peb lub xyoo: Mikhas 1:1-2:5
Kênh Youtube BHKTHN:
