Yelemis 41:1-3
Nqe cim:
“Tiamsis kuv yuav foom koob hmoov rau tus uas cia siab rau kuv.” (Yelemis 17:7).
Lus nug rau sawvdaws xav:
- Nkedaliyas tos txais Yisamayees zoo li cas?
- Thaum kawg yog dabtsi?
- Qhov uas Nkedaliyas tuag ua hiam tus Tswv haivneeg txojkev cia siab li cas?
- Peb ua dabtsi thaum kev cia siab ploj mus?
Tsis mloog Yauhanas thiab cov thawj tubrog cov lus ceebtoom (Yelemis 40:13), tsis ntev tom qab no, Yisamayees coj kaum leeg tuaj cuag Nkedaliyas hauv Mixepas. Nws txais tos Yisamayees thiab cov neeg nrog nws tuaj, lawv noj mov ua ke (nqe 1). Tiamsis thaum Nkedaliyas ua zoo thiab ntseeg siab tagnrho rau Yisamayees, ces Yisamayees txawm dag, npaj lub siab phem. Nws thiab cov neeg uas nrog nws tuaj “txawm rho lawv tej ntaj tua Nkedaliyas tuag…tua cov Yixalayees txhua tus uas nrog Nkedaliyas nyob hauv Mixepas thiab cov tubrog Npanpiloos uas tuaj nyob hauv tuag tas huv tibsi” (nqe 2-3).
Yisamayees tau txais txojkev ua zoo, saib taus ntawm Nkedaliyas, tiamsis Yisamayees muaj lub siab phem thiab nws ua li nws xav. Tej zaum qhov vimchiv tua Nkedaliyas, ib feem twg yog cov neeg Amoos ntxias thiab txib kom tua, tiamsis ib feem twg yog kev khib thiab ntxub ntawm tus kheej, vim Yisamayees “yog caj ces vajntxwv” ua nomtswv loj (nqe 1), yog li tej zaum nws xav hais tias nws thiaj yog tus uas tsim nyog xaiv los ua thawj, tsis yog Nkedaliyas. Txawm yog qhov vimchiv twg los Nkedaliyas twb raug lub tswvyim phem tua tuag vim nws ntseeg siab yuam kev rau Yisamayees.
Peb muaj feem saib pom ua ntej ntawd nyob hauv lub nroog Yeluxalees muaj kev sib ntaus sib tua, suab quaj qw, ntes neeg… thaum lub sijhawm cov tubnrog Npanpiloos tuaj tua. Lub sijhawm ntawd yog ntu sijhawm uas txaus ntshai heev ua rau cov pejxeem nyob hauv nroog tiv tsis taus thiaj khiav tawm mus nyob rau tej qhov chaw thajyeeb. Tiamsis thaum hnov xov Nkedaliyas raug xaiv los kav cov pejxeem uas seem nyob hauv lub nroog Yeluxalees, ces ua rau cov pejxeem muaj kev cia siab, zoo siab rov los “rau hauv tebchaws Yudas. Lawv mus cuag Nkedaliyas hauv Mixepas, lawv sau tau cawv txiv hmab thiab txiv hmab txiv ntoo ntau kawg li.” (Yelemis 40:11-12). Tiamsis zaum no hnov xov Nkedaliyas raug tua tua tuag, ib zaum ntxiv ua rau cov pejxeem txojkev cia siab ploj ntais. Tus Tswv haivneeg txojkev cia siab los kuj ploj mus lawm!
Lub sijhawm nrog tus Tswv mus, ntau zaus tas kev cia siab thiab peb nug hais tias vim li cas tus Tswv ua rau peb tas kev cia siab. Yog nyob ntsiag to thiab tos, peb yuav ntsia pom hais tias tus Tswv xav kom peb cia siab rau Nws tib tug nkaus xwb. Tus Tswv haivneeg yuav ntseeg hais tias tom qab txhua yam xwmtxheej muaj Vajtswv tus uas muaj hwjchim loj kawg nkaus ua tus kav.
Thov Vajtswv,
Nyuam yaus tus Vajtswv! Thov Koj pab kom nyuam yaus txhob tas kev cia siab tej uas nyuam yaus pom, tiamsis ua kom nyuam yaus ntseeg Koj thiab pom yam zoo uas Koj pub hauv txhua lub sijhawm. Amees.
Peb puas cia siab tagnrho rau tus Tswv hauv txhua lub sijhawm?
Nyeem Vajluskub hauv peb lub xyoo: Yau-ees 2:18-32
Kênh Youtube BHKTHN:
