Klei Aê Diê Blŭ: Klei Mtô Mñă Klei Bhiăn 21:1‑9
Êlan kliăng: “Ơ Yêhôwa, pap brei kơ phung ƀuôn sang Israel Ih, phung Ih bi tui leh, leh anăn đăm yap ôh klei jing soh hŏng êrah amâo soh ti krah phung ƀuôn sang Israel Ih; ƀiădah pap brei kơ diñu klei jing soh hŏng êrah” (Klei Mtô Mñă Klei Bhiăn 21:8)
Klei êmuh ksiêm mĭn: Tơdah mâo sa čô mnuih arăng bi mdjiê ƀiădah amâo thâo pô bi mdjiê ôh, hlei pô srăng djŏ tuôm leh anăn ya klei brei diñu ngă? Ya jing klei kñăm čiăng leh anăn klei čiăng lač kơ bruă ngă anăn? Ti jing bruă klam kơ Phung Sang Aê Diê hlăm klei hdĭp yang ƀuôn hruê anei?
Tơdah ƀuh sa čô mnuih arăng bi mdjiê leh hlăm anôk lăn êhŏng amâo thâo pô bi mdjiê ôh, tui si djŏ bi klhao hĕ, ƀiădah phung Israel čoh čuăn ngă dŭm mta bruă. Phung khua mduôn leh anăn phung khua phat kđi srăng ngă bruă êlâo hĭn, diñu mkă ƀuôn giăm hĭn srăng klam klei anăn. Êdei tinăn, phung khua mduôn ƀuôn anei mbĭt hŏng phung khua ngă yang srăng kgŭ, mă sa drei êmô ana ra bi joh kkuê gơ̆ ti tlung êa, rao kngan ti dlông êmô ana ra bi joh leh kkuê, hưn bi sĭt kơ ƀuôn diñu amâo mâo klei soh ôh leh anăn kwưh akâo kơ Aê Diê pap brei kơ phung ƀuôn sang.
Sa klei bi mdjiê mnuih ka thâo ôh pô bi mdjiê srăng ngă klei amâo mâo hơĭt, klei bi đing, bi huĭ leh anăn klei rŭng răng kơ phung ƀuôn sang. Aê Diê amâo tŭ ôh êrah amâo mâo klei soh bi čhŏ čar doh jăk (Klei Yap 35:33) kyuadah jih jang ƀuôn ala mtao srăng dôk ti gŭ klei Aê Diê ngêñ. Jih jang phung ƀuôn sang hlăm anăn mâo khua gai gĭt klei đăo, mnuih djă klei bhiăn leh anăn mnuih ƀuôn sang srăng klam sơăi ti anăp klei djiê sa čô mnuih. Jih jang êlan hdră ngă hŏng klei bhiăn anei čiăng kơ phung ƀuôn sang Aê Diê thâo kơ diñu mâo klei răng čuăn hŏng mnuih arăng bi djiê giăm anôk diñu hdĭp. Phung khua gai gĭt klei đăo mbĭt hŏng mnuih ƀuôn sang srăng mŭt kma bruă anăn čiăng bi juh phung ƀuôn sang, hưn bi êdah klă jih jang phung ƀuôn sang amâo ngă klei soh bi mdjiê mnuih ôh, kăn thâo hlei pô bi mdjiê lei. Mbĭt hŏng klei anăn, diñu srăng myơr kdrêč amâo thâo anăn kơ Aê Diê hŏng klei đăo. Klei bhiăn leh anăn klei răng čuăn bi êdu klei Aê Diê ngêñ leh anăn khư̆ gang klei bi đing, klei ngă mtŭk mtŭl hlăm phung ƀuôn sang, mbĭt hŏng klei anăn čiăng djă pioh klei bhiăn leh anăn klei hơĭt ênang hlăm klei hdĭp phung ƀuôn sang. Phung ƀuôn sang Aê Diê jing sa phung kpă ênô, khư̆ gang klei soh bi rai klei hdĭp phung ƀuôn sang leh anăn ba hriê klei bi hlao. Pô ti krah kơ klei bi hlao anăn jing Aê Diê kơ klei kpă ênô.
Phung anak aneh Aê Diê dôk hdĭp hlăm ênuk bŏ hŏng klei jhat ƀai, klei amâo mâo bi mtăp mđơr leh anăn rŭng răng. Ênưih snăk drei kdŭn đuê̆ leh anăn ngă ngơi ti anăp klei truh kơ mnuih ƀuôn sang. Klei kpă ênô Aê Diê mtrŭt mjhar drei mă tŭ klei thâo răng čuăn kơ drei pô ti anăp klei jhat hlăm klei hdĭp yang ƀuôn. Drei amâo dưi yap drei pô jing mnuih amâo mâo djŏ tuôm ôh, ƀiădah brei drei bi êdah klei kpă ênô Aê Diê hŏng klei drei dôk dơ̆ng ƀơ̆ng huă, hŏng klei khăp leh anăn bruă ngă klă sĭt čiăng răng mgang klei mtăp mđơr. Brei Phung Sang Aê Diê leh anăn grăp čô phung đăo thâo hdĭp jăk leh anăn đru bi mguôp hlăm bruă djă pioh sa klei hdĭp yang ƀuôn kpă ênô hŏng knhuah dôk dơ̆ng ƀơ̆ng huă kpă ênô pô dê, leh anăn knang kơ Aê Diê jing Pô brei klei jăk jĭn kơ jih jang mnuih.
Ya drei ngă čiăng bi êdah bruă klam hŏng phung ƀuôn sang anôk Aê Diê dưm brei drei hdĭp?
Wah lač: Ơ Aê Diê Pô Kpă Ênô jing Pô kâo kkuh mpŭ leh anăn khăp, brei kâo hdĭp kpă ênô hlăm klei hdĭp kâo pô wăt hlăm klei hdĭp phung ƀuôn sang jing anôk Ih dưm kâo brei kâo jing sa kdrêč hlăm anăn, čiăng găn hŏng klei hdĭp kâo klei kpă ênô Ih dưi bi êdah kơ lu mnuih.
Dlăng Klei Aê Diê Blŭ hlăm tlâo thŭn: Y‑Ôsê 6:1‑7:16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
