Klei Aê Diê Blŭ: II Kôrantô 8:1-6
Êlan kliăng: “Êjai mâo klei lông dlăng hlăm klei knap mñai ktang, klei hơ̆k mơak bŏ dlai diñu leh anăn klei diñu ƀun ƀin êdimima mjing klei kmah snăk hlăm diñu.”( II Kôrantô 8:2)
Klei êmuh ksiêm mĭn: Si ngă knuih Phung Sang Aê Diê hlăm čar Masêdôn myơr hŏng klei kmah? Ya ngă diñu myơr hŏng jih ai tiê msĕ snăn lĕ? Ya klei hriăm drei mâo tơdah hriăm kơ ai tiê myơr hŏng klei kmah mơ̆ng Phung Sang Aê Diê hlăm čar Masêdôn?
Khua ƀĭng kna Y-Pôl čiăng kơ Phung Sang Aê Diê ti ƀuôn Kôrantô thâo snei, mơ̆ng hruê đăo kơ Khua Yang, phung đăo ti čar Masêdôn găn lu klei lông dlăng knap mñai, diñu amâo mâo rŭng răng ôh ƀiădah diñu “mơak bŏ dlai.” Wăt tơdah diñu ƀun ƀin êdimima dưn, ƀiădah tơdah hmư̆ kơ phung đăo ti ƀuôn Yêrusalem mâo klei kƀah knap, “diñu myơr tui si diñu dưi, leh anăn êbeh hĭn kơ anăn mơh, tui si ai tiê diñu pô čiăng. Diñu kwưh kơ hmei čiăng snăk mâo klei jăk jĭn dưi đru phung doh jăk” (êlan 3-4). Klei anei bi mđĭ ai Khua ƀĭng kna Y-Pôl lu snăk, leh anăn bi kčŭt ai tiê ñu mtrŭt Y-Tit nao kơ phung đăo ti ƀuôn Kôrantô “kyuadah ñu dơ̆ng leh bruă anei, brei ñu bi leh bruă klei pap anei” (êlan 6).
Phung đăo ti čar Masêdôn “mâo klei lông dlăng hlăm klei knap mñai ktang” kyua klei đăo, ƀiădah ya ngă diñu lui brei sa klei bi hmô kơ klei myơr hŏng klei kmah êbeh êbiêr msĕ snăn lĕ? Tal êlâo hĭn, diñu thâo kơ Aê Diê bi mtlaih leh diñu, anei jing klei jăk jĭn prŏng hĭn diñu mâo mă tŭ leh, kyuanăn hŏng ai tiê mơak Aê Diê brei, jih jang klei knap mñai diñu tŭ bi hgăm jih, hŏng diñu dê, ngăn dŏ mnơ̆ng dhơ̆ng amâo dưi bi mđơr ôh hŏng mnơ̆ng diñu mă tŭ leh mơ̆ng Aê Diê. Tui tluôn, diñu thâo săng klă kơ klei bi mguôp hdơ̆ng phung đăo jing ayŏng amai adei hlăm hnoh êrah bi mtlaih Yang Yêsu Krist, amâo bi kah mbha djuê ana, anôk dôk ôh…, kyuanăn diñu kwưh čiăng dưi bi mguôp đru phung đăo ti ƀuôn Yêrusalem.
Knuih phung đăo ti čar Masêdôn myơr hŏng klei kmah brei kơ phung anak čô Aê Diê mâo lu klei hriăm. Tal sa, drei khăng myơr hŏng klei kmah tơdah drei mâo lu êbeh prăk kăk, ƀiădah tinei brei drei ƀuh klei myơr hŏng klei kmah kyua ai tiê amâo djŏ kyua ngăn dŏ ôh. Tal dua, wăt sa Phung Sang Aê Diê prŏng dưn ăt srăng tuôm mơh hŏng klei dleh kjham tơdah phung đăo ti sang Aê Diê anăn bŏ hŏng klei ƀun ƀin. Tal tlâo, lu mnuih mĭn phung đăo knŏng myơr mă kơ Phung Sang Aê Diê pô, ƀiădah tinei brei ƀuh klei myơr hŏng klei kmah amâo djŏ ngă mă knŏng ti krĭng pô ôh ƀiădah brei drei ƀuh Phung Sang Aê Diê amâo mâo kdriêl ôh. Tal pă, klei myơr hŏng klei kmah bi mđĭ ai leh anăn mtrŭt lu mnuih đru bi mguôp ngă bi leh bruă klei pap anei. Akâo Aê Diê mtrŭt ai tiê drei thâo myơr hŏng klei kmah kơ bruă Sang Ñu.
Si ngă drei myơr kơ Aê Diê hŏng jih ai tiê hŏng klei kmah leh mơ̆?
Ơ Aê Diê Pô hmei khăp! Kâo mơak snăk tơdah hriăm kơ knuih myơr hŏng klei kmah mơ̆ng phung đăo ti čar Masêdôn. Đru kâo thâo bi mni kơ Ih, thâo yua mông myun pioh đru bruă Sang Ama amâo mâo kĭ kơ̆, amâo mâo tĭng yap ôh.
Dlăng Klei Aê Diê Blŭ hlăm tlâo thŭn: Y-Êskiêl 41:13-42:20.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
