II Kauleethaus 8:1-6
Nqe cim:
“Tej kev txomnyem uas lawv raug twb yog sim saib lawv puas muab siab rau ntseeg. Txawm yog lawv txomnyem npaum li ntawd los lawv tseem zoo siab kawg li. Lawv yeej yog cov neeg uas pluag heev, tiamsis lawv muaj nplooj siab dawb paug muab lawv tej nyiaj pab lwm tus” (II Kauleethaus 8:2)
Lus nug rau sawvdaws xav:
- Cov ntseeg hauv Pawg Ntseeg Makedaunias tus qauv fij nyiaj zoo licas?
- Vim licas lawv fij nyiaj siab dav li ntawd?
- Peb tau qhuab ntuas yam dabtsi thaum kawm txog cov ntseeg hauv Pawg Ntseeg Makedaunias tus qauv fij nyiaj?
Timthawj Paulus xav kom cov ntseeg hauv Pawg Ntseeg Kauleethaus paub hais tias, txij thaum ntseeg Tswv Yexus, cov ntseeg hauv Pawg Ntseeg Makedaunias tau tiv dhau ntau kev sim siab txomnyem, los lawv yeej tsis poob siab tiamsis lawv tseem “zoo siab kawg li”. Txawm hais tias lawv pluag heev, los thaum hnov hais tias cov ntseeg hauv Yeluxalees ntsib kev txomnyem, lawv tau “sau lawv tej nyiaj pab lwm tus raws li uas lawv pab tau. Tsis yog li ntawd xwb, lawv tseem muab tshaj tej ntawd thiab. Lawv niaj hnub thov… cia lawv xa nyiaj mus pab cov ntseeg Vajtswv uas nyob nram lub xeev Yudas. Yeej tsis muaj leejtwg yuam lawv ua li ntawd, lawv cia li ua lawv xwb” (nqe 3-4). Qhov no txhawb Timthawj Paulus lub zog heev, thiab ua rau nws txib Titus maj nroos tuaj cuag cov ntseeg hauv nroog Kauleethaus, pab lawv txoj haujlwm zoo uas lawv zoo siab ua ntawd kom tiav (nqe 6).
Cov ntseeg hauv Pawg Ntseeg Makedaunias tabtom ntsib “tej kev txomnyem” sim siab vim kev ntseeg, tiamsis vim licas lawv ho ua tau qauv zoo fij nyiaj siab dav li ntawd? Qhov xubthawj, lawv nco tus Tswv txiaj ntsig cawm lawv dim, ntawd yog txoj koobhmoov loj tshajplaws uas lawv txais tau, vim li ntawd, los ntawm txojkev zoo siab tus Tswv pub, ua rau lawv tej kev txomnyem raug plooj lawm, raws li lawv, tej qhov txhia chaw hauv ntiajteb piv tsis tau tej uas lawv yuav txais tau ntawm Vajtswv. Qhov txuas ntxiv, lawv totaub txog kev sib raug zoo ntawm cov ntseeg yog cov uas tau Tswv Yexus cov ntshav cawmdim, tsis saib leejtwg ntsejmuag, chaw nyob,… lawv thiaj thov kom tau koom tes pab cov ntseeg hauv nroog Yeluxalees.
Cov ntseeg hauv Makedaunias tus qauv fij nyiaj siab dav qhia rau tus Tswv cov menyuam ntau zaj kawm. Thib ib, peb tsuas fij nyiaj siab dav thaum muaj nyiaj ntau, tiamsis nyob ntawm no peb pom hais tias, kev fij nyiaj siab dav yog nyob ntawm nplooj siab, tsis yog nyob ntawm qhov uas muaj nyiaj txiag ntau. Thib ob, cov Pawg Ntseeg me pheej tos kev pab ntawm cov Pawg Ntseeg loj, tiamsis nyob ntawm no qhia pom hais tias ib Pawg Ntseeg loj tej zaum kuj ntsib kev txomnyem thaum cov ntseeg muaj lubneej pluag. Thib peb, coob tug xav hais tias, tus Tswv cov menyuam yuav tsum fij nyiaj rau yus Pawg Ntseeg xwb, tiamsis ntawm no qhia pom hais tias kev fij nyiaj siab dav tsis yog hais nqaim nqaim ntawm qhov chaw yus nyob xwb tiamsis yuav tsum xam pom txog tus Tswv Pawg Ntseeg yeej tsis muaj nrim. Thib plaub, kev fij nyiaj siab dav txhawb tau lwm tus koom tes ua txoj haujlwm zoo no. Thov tus Tswv pab kom peb tau txhawb zog fij nyiaj los ntawm lub siab dav fo ua tus Tswv tes haujlwm.
Thov Vajtswv,
Vajtswv! Nyuam yaus zoo siab heev thaum kawm tau cov ntseeg hauv Pawg Ntseeg Makedaunias tus qauv fij nyiaj siab dav. Thov pab kom nyuam yaus nco ntsoov Koj tej txiaj ntsig, siv sijhawm los koom tes ua Koj tes haujlwm txhob ua xyem xyav, txhob xav txog qhov uas yuav poob lossis yuav tau. Amees.
Peb puas fij nyiaj los ntawm lub siab dav fo rau tus Tswv lawm tau?
Nyeem Vajluskub hauv peb lub xyoo: Exekees 41:13-42:20
Kênh Youtube BHKTHN:
