Klei Aê Diê Blŭ: Y-Đaniel 6:1-10
Êlan kliăng: “Leh anăn tlâo blư̆ grăp hruê ñu čuôn kơŭt wah lač leh anăn bi mni kơ Aê Diê ñu msĕ si ñu bhiăn ngă leh.”( Y-Đaniel 6:10b)
Klei êmuh ksiêm mĭn: Ti anôk Y-Đaniel dôk hlăk anăn leh anăn ya anôk bruă ñu djă? Ya ngă dua čô khua prŏng leh anăn phung khua krĭng čiăng ngă jhat kơ ñu? Ti krah klei truh huĭ hyưt kơ klei hdĭp, ya klei ñu ăt sĭt suôr ngă mơh? Ya klei bi hmô tloh ênoh Y-Đaniel lui kơ drei?
Arăng mă ba Y-Đaniel jing mnă kơ čar Ƀabilôn dơ̆ng mơ̆ng hlăk ñu adôk êdam ngiêk. Kyua klei ñu đăo kơ Aê Diê khut khat snăn Aê Diê hơêč hmưi kơ ñu klei mdê hjăn ti čar tue. Kyuanăn, ñu ngă bruă leh truh kơ pă ênuk mtao (Y-Đaniel 1:3-21). Hlăm ênuk mtao Y-Đarius, mtao mdưm ñu jing sa čô hlăm tlâo čô khua prŏng ti dlông phung khua krĭng. Kyuadah ñu mâo mngăt myang Aê Diê dôk mbĭt snăn jih bruă ñu ngă jing kdlưn hĭn nanao hŏng phung khua prŏng leh anăn phung khua krĭng mkăn, kyuanăn mtao mĭn bi mđĭ ñu brei kiă kriê jih ƀuôn ala mtao (êlan 1-3). Kyuadah mâo klei mtao mơak yua ñu hlăm bruă prŏng yuôm, snăn phung khua prŏng, phung khua krĭng nač iăng leh anăn duah êlan čiăng kčŭt kơ ñu, ƀiădah diñu amâo ƀuh klei wê amâodah ya mta klei dưi ngă kơ ñu ôh. Ti knhal tuč diñu mkra mnêč duah knŏng hlăm klei ñu đăo kơ Aê Diê kơh dưi ngă jhat kơ ñu (êlan 5). Diñu akâo kơ mtao čih hră klei bhiăn mtrŭn ghă ktang tĭt amâo mâo pô dưi kwưh kơ yang mkăn amâodah mnuih mkăn êngao kơ mtao êjai tlâo pluh hruê. Hlei pô amâo ngă tui si klei mtrŭn arăng srăng hwiê hlăm war êmông gu. Mtao Y-Đarius tŭ ư čih anăn ñu hlăm hră mtrŭn kăm ghă anăn.
Anei jing sa kđông ƀêč mkra kăp mă leh anăn bi mdjiê Y-Đaniel. Wăt tơdah thâo klei anăn dưn, ƀiădah ñu kluôm dhuôm amâo huĭ ôh, kyuadah anak mnuih khăng huĭ kơ klei hdĭp pô snăn lui hĕ Aê Diê ñu. Tơdah hmư̆ klei mtrŭn anăn, hrô kơ klei rŭng răng, huĭ hyưt, Y-Đaniel ăt dôk jhŏng leh anăn sĭt suôr djă pioh klei ñu bhiăn wah lač leh anăn blŭ hrăm hŏng Khua Yang grăp hruê. Klei Aê Diê Blŭ brei thâo, grăp hruê ñu pŏk ƀăng bhă điêt phă ƀuôn Yêrusalem čuôn kơŭt leh anăn bi mni kơ Aê Diê tlâo blư̆ msĕ si ñu bhiăn ngă (êlan 10). Klei bhiăn mtao mtrŭn, mnêč phung roh ăt kăn dưi bi kgăn rei klei ñu blŭ hrăm hŏng Ama Ti Adiê Dlông. Klei sĭt suôr bi mguôp hŏng Khua Yang yơh lŏ thiăm kơ Y-Đaniel klei ktang leh anăn ai tiê jhŏng čiăng tlă anăp hŏng klei dleh dlan huĭ hyưt. Wăt tơdah arăng hwiê hlăm war êmông gu ñu ăt kăn hngah kơ Khua Yang rei.
Tlă anăp hŏng klei jhat truh huĭ hyưt, dleh dlan, amâo mâo hlei pô amâodah ya mta klei ktang dưi bi mtlaih drei ôh. Ktang tuôm hŏng klei dleh dlan drei ktang hĭn mơh êran nao kơ Khua Yang, blŭ hrăm hŏng Ñu akâo kơ Khua Yang thiăm brei klei ktang, klei thâo mĭn leh anăn ai tiê jhŏng brei drei dưi hgao. Y-Đaniel lui sa klei bi hmô tloh ênoh kơ klei sĭt suôr blŭ hrăm hŏng Ama Ti Adiê Dlông wăt tơdah ya mta klei truh dưn. Grăp čô drei brei pioh mnĭt mmông blŭ hrăm hŏng Ama čiăng kơ drei dưi dôk kjăp ti anăp jih jang klei truh hlăm klei hdĭp.
Si ngă drei sĭt suôr blŭ hrăm hŏng Khua Yang grăp hruê mơ̆? Mâo mơ̆ ya mta klei huĭ hyưt plah mă hĕ mnĭt mmông drei nao kơ Ama?
Ơ Khua Yang, wăt tơdah ya klei truh dưn, akâo Ih đru kâo tui hriăm mơ̆ng Y-Đaniel bi hmô ăt dôk sĭt suôr blŭ hrăm, bi mguôp hŏng Khua Yang grăp hruê, čiăng kơ kâo dưi mă tŭ klei ktang hlăm mngăt myang dưi hgao jih klei truh hlăm klei hdĭp.
Dlăng Klei Aê Diê Blŭ hlăm tlâo thŭn: Y-Êsêkiêl 27:28-28:10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
