Daniyees 6:1-10
Nqe cim:
“Nws mus txhos caug tig xubntiag rau ntawm lub qhovrai ntawd thiab thov Vajtswv ib hnub twg peb zaug raws li nws ib txwm thov” (Daniyees 6:10b)
Lus nug sawvdaws xav:
- Daniyees tabtom nyob qhov twg thiab nws tuav teg haujlwm licas?
- Vim licas tej nom uas nrog Daniyees ua haujlwm thiaj nrhiav kev kom Daniyees?
- Nyob rau lub tsamthawj uas ntsib kev nyuaj, Daniyees pheej tseem ua dabtsi?
- Daniyees ua tus qauv zoo txog yam dabtsi rau peb?
Daniyees yog ib tug menyuam hluas uas raug ntes mus rau tim tebchaws Npanpiloos. Los ntawm ntseeg cia siab tuag nthi rau Vajtswv, Daniyees thiaj tau Vajtswv foom koobhmoov tshwjxeeb thaum nyob hauv luag lub tebchaws. Vim li ntawd, Daniyees thiaj tau ua nom nrog tej vajntxwv kav tebchaws dhau plaub tiam vajntxwv (Daniyees 1:3-21). Hauv tiam vajntxwv Dali-us kav tebchaws, Daniyees tau tsa ua ib tug nom loj ntawm peb tug nom uas nyob qab tswjhwm ntawm vajntxwv. Vim Daniyees muaj Vajtswv tus Ntsujplig nyob nrog, nws thiaj ntse dua lwm tus nomtswv, vajntxwv thiaj tsa nws ua tus saibxyuas tagnrho tej nomtswv hauv lub tebchaws (nqe 1-3). Vim tau vajntxwv siv ua nom loj, Daniyees thiaj raug tej nomtswv khib thiab nrhiav kev kom nws, tiamsis tej nomtswv yeej nrhiav tsis tau Daniyees ib qhov ua txhaum. Thaum kawg, lawv thiaj nrhiav kev tav Daniyees txojkev ntseeg uas ntsigtxog nws tus Vajtswv (nqe 5). Lawv thov vajntxwv tawm ib txojcai txwv tsis pub sawvdaws thov ib tug vajtswv twg uas tsis yog vajntxwv hauv peb caug hnub. Yog leejtwg tsis ua raws li txojcai txwv ces tus ntawd yuav raug muab pov rau hauv qhov tsov ntxhuav. Vajntxwv Dali-us pom zoo sau nws lub npe rau txojcai txwv ntawd.
Tej nomtswv txhob txwm npaj txojcai ntawd los nrhiav kev ntes thiab tua Daniyees. Txawm paub hais tias yuav ntsib teebmeem, los Daniyees yeej tsis txhawj ntshai txog nws txojsia thiab tsis tso Vajtswv tseg. Thaum hnov txog txojcai txwv ntawd, Daniyees yeej muaj lub siab kub lug thov Vajtswv txhua hnub ib yam li nws ib txwm ua los lawm. Vajluskub qhia hais tias, txhua hnub Daniyees yeej qhib lub qhov rai tig mus rau nroog Yeluxalees, txhoscaug thov Vajtswv thiab qhuas Vajtswv ib hnub peb zaug li nws pheej ua dhau los lawm (nqe 10). Vajntxwv txojcai txwv, tej yeebncuab lub tswvyim cuab kev yeej tav tsis tau Daniyees kev sib tham lus nrog Leej Txiv saum ntuj. Los ntawm muaj lub siab kub lug txuas nrog Vajtswv thiaj ua rau Daniyees muaj lub siab tawv thiab muaj zog txaus tawmtsam tej teebmeem uas txaus ntshai. Txawm raug pov mus rau hauv qhov tsov ntxhuav los Daniyees yeej tsis tso Vajtswv tseg.
Nyob hauv lub tsamthawj ntsib teebmeem txaus ntshai, yuav tsis muaj leejtwg lossis lub dag zog twg pab tau peb dim. Yim ntsib kev txomnyem peb yuav tsum yim huab los cuag Vajtswv, los txuas lus nrog Nws, kom tau Vajtswv txhawb zog, pub kev txawjntse thiab muaj siab tawv hla dhau teebmeem. Daniyees tau ua tus qauv zoo tseg rau peb txhua tus txog kub siab lug los txuas lus nrog Leej Txiv saum ntuj txawm yuav ntsib teebmeem npaum twg los xij. Peb txhua tus yuav tsum tseg sijhawm los nrog Leej Txiv saum ntuj tham lus tsis tseg, kom muaj lub siab tawv, sawv ruaj khov thaum ntsib teebmeem nyuaj siab hauv lubneej.
Thov Vajtswv,
Tus Tswv, txawm yuav ntsib teebmeem npaum twg, thov pab kom nyuam yaus xyaum Daniyees tus qauv, los txuas nrog Koj tsis tseg. Kom nyuam yaus tau txais lub dag zog ntawm sab ntsujplig ua neej hla dhau txhua yam teebmeem, nyuaj siab hauv lubneej. Amees.
Peb puas kub siab nrog Vajtswv tham lus txhua hnub lawm tau? Puas muaj yam kev txhawj ntshai twg tuaj raug rau peb?
Nyeem Vajluskub hauv peb lub xyoo: Exekees 27:28-28:10
Kênh Youtube BHKTHN:
