II Xwmtxheej 18:1-3
Nqe cim.
“Cov neeg siab phem, nej tsis paub hais tias cov uas ua li neeg ntiajteb ua, yog lawv ua yeebncuab rau Vajtswv. Yog li ntawd, tus uas ua li neeg ntiajteb ua, yog nws txhob txwm ua yeebncuab rau Vajtswv” (Yakaunpaus 4:4).
Lus nug rau sawvdaws xav:
- Thaum muaj txiag npluanuj lawm, Vajntxwv Yehausafas tau ua dabtsi?
- Vajntxwv mloog Vajntxwv Ahaj lus licas?
- Peb tau qhuab ntuas licas dhau zaj kawm no?
Thaum Vajntxwv Yehausafas “muaj txiag npluanuj thiab koob meej nrov ncha heev lawm, nws txawm coj nws tsevneeg ib tug mus yuav cov Yixalayees tus Vajntxwv Ahaj tsevneeg ib tug”. Ntawm no yog zaum tim ob Phau Xwmtxheej hais txog kev npluanuj thiab tau koobmeej ntawm Vajntxwv Yehausafas (II Xwmtxheej 17:5), ntawm no xav qhia hais tias Vajntxwv tau tus Tswv pub muaj txhua yam tiamsis nws tsis vamkhom tus Tswv ntxiv, nws coj nws tsev neeg mus yuav tus Vajntxwv kav tebchaws Yixalayees uas ua phem, pe mlom tsev neeg ib tug (I Vajntxwv 16:29-33). Tej Vajntxwv thaum ub pheej cia lawv tej tub ntxhais sib yuav kom tau koom tes hauv kev ua rog thiab ua lag ua luam. Vajntxwv Yehausafas tsis tas yuav ua li ntawd, vim nws twb tau tus Tswv ua rau tej tebchaws ibncig ntshai tsis kam tuaj tua nws lawm thiab nws “muaj hwjchim heev zuj zus.” (II Xwmtxheej 17:10-12).
Xav ua kom tebchaws Yudas thiab Yixalayees muaj kev sib raug zoo thiab muaj kev thajyeeb tomqab 50 xyoo ua yeebncuab, Vajntxwv Yehausafas thiaj tuaj xyuas Vajntxwv Ahaj hauv nroog Xamalis. Vajntxwv Ahaj ua ib rooj mov loj tos txais thiab “yaum” Vajntxwv Yehausafas koom mus tua lub nroog Lamaus hauv cheebtsam Nkile-as, yog cov Yixalayees lub nroog raug poob rau cov Xilias tes. Lo lus “yaum” hais ntawm no muaj lub ntsiab hais tias haub ntxias, dag ntxias. Lo lus no nyob hauv Vajluskub yog siv los hais txog kev haub ntxias mus ua tej yam phem, xws li hauv II Kevcai 13:6, “yaum” mus pe mlom. Thaum sib raug zoo nrog tus neeg phem, Vajntxwv Yehausafas raug yaum mus ua yam phem. Vajntxwv tau teb hais tias “…peb yuav koom tes nrog koj” (nqe 3). Thaum kawg Vajntxwv raug poob kev thajyeeb, raug mus ntaus rog hauv tshav rog. Tsimnyog yuav tau thajyeeb thiab vammeej, tiamsis nimno Vajntxwv yuav raug poob tej no thiab tseem yuav luag raug tuag (II Xwmtxheej 18:31).
Vim ntaus phoojywg nrog Vajntxwv Ahaj, tomqab no Vajntxwv Yehausafas thiaj raug tus cevlus Yehus cem hais tias “pab cov neeg ua phem ua qias thiab hlub cov neeg uas ntxub tus Tswv” (II Xwmtxheej 19:2). Yakaunpaus kuj qhia hais tias “tus uas ua li neeg ntiajteb ua, yog nws txhob txwm ua yeebncuab rau Vajtswv” (Yakaunpaus 4:4b). Ua li neeg ntiajteb ua tsis yog hais qhov uas ua phoojywg nrog neeg ntiajteb tiamsis hais txog qhov uas ua lub neej zoo li neeg ntiajteb lossis ua zoo li cov neeg tawmtsam tus Tswv ua. Thaum xaiv mus raws neeg ntiajteb lub dawm, ntshaw lub ntiajteb thiab tej yam nyob hauv, ces yuav raug ntog toj nqis hav, poob tsag mus rau kev ua phem ua qias, ua yeebncuab rau tus Tswv. Thov tus Tswv pab peb ua tau siab tawv thiab muaj tswvyim tsis mloog ntiajteb tej lus haub ntxias. Tus ntseeg Tswv Yexus yuav tsum ua lub neej rau lwm tus pom tus Tswv, tsis yog yuav ua lub neej zoo li neeg ntiajteb lub.
Thov Vajtswv
Tus Tswv, thov qhia nyuam yaus paub tsis lees mus ua raws li neeg ntiajteb tej lus haub ntxias, thov pub nyuam yaus paub txaus siab rau tej uas Koj pub, nyuam yaus thiaj tsis poob mus ua koj tus yeebncuab. Amees.
Peb puas pom hais tias peb tabtom ua phoojywg nrog ntiajteb? Yog zoo li ntawd, peb yuav tsum hloov yam twg?
Nyeem Vajluskub hauv peb lub xyoos: Exekees 1
Kênh Youtube BHKTHN:
