Klei Aê Diê Blŭ: II Klei Yăl Dliê 18:1-3
Êlan kliăng: “Diih jing phung knhông yơh! Diih amâo thâo hĕ klei ngă mah jiăng hŏng lăn ala jing roh hŏng Aê Diê? Kyua anăn hlei pô čiăng jing mah jiăng hŏng lăn ala mjing ñu pô roh hŏng Aê Diê.” (Y‑Yakơ 4:4)
Klei êmuh ksiêm mĭn: Tơdah jing mdrŏng sah leh, ya klei mtao Y‑Jôsaphat ngă? Si klei ñu gưt kơ mtao Y‑Ahap? Ya klei hriăm drei mâo mơ̆ng klei hriăm anei?
Tơdah mtao Y‑Jôsaphat “mâo klei mdrŏng prŏng leh anăn klei mpŭ; leh anăn ñu ngă klei bi mguôp hŏng Y‑Ahap hlăm klei bi kuôl ung mô̆.” Anei jing blư̆ tal dua hdruôm hră Klei Yăl Dliê mñă kơ klei mdrŏng leh anăn klei guh kơang mtao Y‑Jôsaphat (II Klei Yăl Dliê 17:5), čiăng lač Aê Diê brei leh kơ mtao mâo djăp mta mnơ̆ng ƀiădah ñu amâo lŏ knang kơ Aê Diê ôh, siămdah lĕ, ngă djuê bi rông ênông bi dôk hŏng mtao Israel jhat ƀai, kkuh rup yang (I Bruă Mtao 16:29-33). Phung mtao ênuk đưm khăng brei anak diñu bi dôk ung mô̆ čiăng ngă klei bi mguôp bruă lĭng kahan leh anăn bi hgŭm bruă čhĭ mnia. Mtao Y‑Jôsaphat amâo guôn ngă klei anăn ôh, kyuadah Aê Diê pô bi truh klei huĭ kơ jih jang čar riêng gah tơl digơ̆ amâo jhŏng hriê bi blah hŏng ñu ôh leh anăn ñu “đĭ jing prŏng hĭn nanao” (II Klei Yăl Dliê 17:10-12).
Čiăng bi kjăp klei bi mguôp leh anăn klei êđăp ênang plah wah dua ƀuôn ala mtao Israel hŏng Yuđa tloh êma pluh thŭn bi roh, mtao Y‑Jôsaphat nao čhưn hŏng mtao Y‑Ahap hlăm ƀuôn Samari. Mtao Y‑Ahap mkra klei huă mnăm prŏng leh anăn “mtrŭt” mtao Y‑Jôsaphat đĭ nao blah ƀuôn Ramôt – Galaat mbĭt hŏng ñu, jing sa boh ƀuôn Israel phung Siri plah mă leh. Boh blŭ “mtrŭt’’ tinei lŏ mblang jing mtrŭt mčhur. Boh blŭ anei khăng yua hlăm Klei Aê Diê Blŭ lač kơ klei mtrŭt mnuih mkăn ngă klei wê, msĕ si hlăm Klei Mtô Mñă Klei Bhiăn 13:6, “mplư” mnuih mkăn brei kkuh rup yang. Tơdah bi mguôp hŏng mnuih ƀai, mtao Y‑Jôsaphat srăng ngă klei jhat ƀai msĕ mơh. Ñu lŏ wĭt lač, “Hmei srăng nao mbĭt hŏng ih hlăm klei bi blah”(êlan 3). Boh knhal tuč mtao bi luč hĕ klei êđăp ênang, ksŭng drŭng kơ kdrăn blah. Angdah mâo klei rơ̆ng srăng mâo lu klei êđăp ênang, klei mdrŏng sah lĕ, ară anei mtao tlă anăp hŏng klei srăng luč jih klei anei, wăt ñu pô păt čiăng djiê mơh (II Klei Yăl Dliê 18:31).
Kyua ngă mah jiăng hŏng mtao Y‑Ahap, êdei tinăn Y‑Jêhu pô thâo bi ƀuh ƀuah Y‑Jôsaphat đru pô ƀai, khăp kơ phung bi êmut kơ Aê Diê (II Klei Yăl Dliê 19:2). Msĕ mơh, Y‑Yakơ lač: “Hlei pô čiăng jing mah jiăng hŏng lăn ala mjing ñu pô roh hŏng Aê Diê” (Y‑Yakơ 4:4b). Ngă mah jiăng hŏng lăn ala amâo čiăng lač kơ klei bi mguôp hŏng phung amâo đăo ôh, ƀiădah čiăng lač kơ klei dôk dơ̆ng ƀơ̆ng huă tui si lăn ala, ngă msĕ si phung bi kdơ̆ng hŏng Khua Yang. Tơdah čuăn êbat leh tui si lăn ala, khăp kơ mnơ̆ng lăn ala khăp čiăng dưi mă tŭ klei tŭ dưn mơ̆ng lăn ala, snăn amâo dưi tlaih ôh mơ̆ng klei toh hroh truh kơ anôk rai luč, jing pô roh hŏng Aê Diê. Akâo Aê Diê đru drei mâo klei jhŏng leh anăn klei thâo mĭn čiăng drei khut khat hngah hĕ kơ klei lăn ala mtrŭt mčhur. Brei klei hdĭp phung đăo kơ Krist bi êdah kơ arăng ƀuh Khua Yang hlăm klei hdĭp ñu pô, amâo djŏ hdĭp msĕ si lăn ala ôh.
Si ngă diih ƀuh kơ diih pô dôk ngă mah jiăng hŏng lăn ala mơ̆? Tơdah mâo, ya klei brei diih bi mlih?
Wal lač: Ơ Khua Yang, đru kâo thâo hngah jih klei lăn ala mtrŭt leh anăn mplư, hdĭp mơak hŏng jih jang mnơ̆ng Ih brei leh kơ kâo čiăng kơ kâo amâo jing sa čô pô roh hŏng Ih ôh.
Dlăng Klei Aê Diê Blŭ hlăm tlâo thŭn: Y‑Êskiêl 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
