Klei Aê Diê Blŭ: Klei Mtô Mñă Klei bhiăn 18:1-8
Êlan kliăng: “Phung khua ngă yang, jing phung Lêwi, leh anăn jih jang găp djuê Lêwi, amâo srăng mâo kdrêč lăn bi mbha amâodah ngăn dưn mbĭt hŏng phung Israel ôh; diñu srăng ƀơ̆ng jih mnơ̆ng myơr kơ Yêhôwa, jih mnơ̆ng jing ngăn dưn Ñu tui si klei bhiăn” (Klei Mtô Mñă Klei Bhiăn 18:1)
Klei êmuh ksiêm mĭn: Ya klei trăn Klei Aê Diê Blŭ anei kčah kơ bruă phung khua ngă yang leh anăn phung Lêwi hlăm phung ƀuôn sang Israel? Hlei jing ngăn dưn diñu? Klei anei ya jing? Si drei mkăp kơ phung mă bruă kơ Aê Diê?
Trăn Klei Aê Diê Blŭ anei mñă kơ phung ƀuôn sang Aê Diê hdơr khua ngă yang leh anăn phung Lêwi amâo dưi mâo lăn hjăn čiăng pla mjing hdĭp mda msĕ si dŭm djuê ana mkăn ôh. Aê Diê ruah diñu leh anăn pioh hjăn čiăng bi leh bruă Sang Aê mơ̆ng dŭm bruă kriê dlăng, bi hriăm klei đăo, ktrâo lač bruă kkuh mpŭ, hlue ngă klei mjuăt leh anăn dŭm bruă klam hlăm bruă mngăt mkăn. Kyua khua ngă yang leh anăn phung Lêwi brei kriê dlăng klei hdĭp mngăt kơ phung ƀuôn sang Aê Diê, anăn ñu kčah leh djăp klei čiăng êdi kơ mnơ̆ng dhơ̆ng diñu srăng mâo phung ƀuôn sang Aê Diê mprăp hlăm dŭm klei phung ƀuôn sang myơr. Anei ăt jing klei yuôm bhăn bruă Aê Diê lač Ñu jing ngăn dưn kơ diñu.
Tơdah phung ƀuôn sang Aê Diê amâo mkăp pioh brei kơ phung khua ngă yang leh anăn phung Lêwi msĕ si Aê Diê mtrŭn, digơ̆ srăng čŏng duah mă mphŭn mkăp pioh brei kơ digơ̆ pô mơ̆ng anôk mkăn, leh anăn klei anei ênưih atăt digơ̆ lui bruă klam. Leh anăn snăn grăp bruă ti anôk doh jăk srăng gun kpăk leh anăn phung ƀuôn sang Aê Diê srăng kƀah mnuih đru kơ klei hdĭp mngăt, kyua knŏng phung khua ngă yang kơh dưi myơr mnơ̆ng ngă yang, kriê dlăng pui kđen, jhưng dưm kpŭng, leh anăn myơr mnơ̆ng ƀâo mngưi ti knưl hŏng mah. Kyua anăn, phung ƀuôn sang Aê Diê sĭt hdĭp hlăm krĭng Lăn Aê Diê Ƀuăn brei sĭt suôr myơr mnơ̆ng ngă yang kơ Aê Diê kñăm bi êdah ai tiê hdơr knga leh anăn klei gưt asăp Aê Diê; mbĭt anăn ăt đru rơ̆ng klei hdĭp kơ phung mă bruă Aê Diê čiăng kơ diñu jih ai tiê ngă bi jăk bruă Aê Diê jao.
Sang Aê Diê hruê anei mâo bruă klam brei bi djăp mkăp pioh brei mnơ̆ng dhơ̆ng yua hlăm klei hdĭp kơ phung myơr klei hdĭp mă bruă kơ Aê Diê jih hruê mmông čiăng kơ digơ̆ dưi jih ai tiê kriê dlăng klei hdĭp mngăt kơ phung đăo leh anăn dŭm bruă mkăn hlăm Sang Aê Diê. Boh sĭt ară anei dŭm anôk kkuh mpŭ ti krĭng taih kbưi, dap kngư mâo lu phung khua pô mtô, pô mtô, phung khua dlăng bruă Sang Aê Diê dôk hdĭp kƀah lu mta kyua klei hdĭp duh mkra dŭm krĭng anăn kƀah anăn klei mkăp pioh brei mơ̆ng Sang Aê Diê ăt adôk ƀiă. Ƀiădah bi mni kơ Aê Diê, wăt tơdah klei hdĭp mâo klei dleh dlan diñu ăt sĭt suôr êbat hlue si Aê Diê iêô čiăng kơ digơ̆ jih ai tiê mkŏ mjing Sang Aê Diê leh anăn hiu hưn Klei Mrâo Mrang Jăk mtlaih mnuih. Grăp čô drei brei hdơr kơ digơ̆ hlăm klei wah lač, leh anăn bi đru klam klei ktrŏ kơ klei kƀah hlăm klei hdĭp sĭt mâo klei găl, kñăm đru kơ diñu jih ai tiê mă bruă Aê Diê jao.
Drei mđing mơ̆ kơ klei hdĭp phung mă bruă kơ Aê Diê?
Wah lač: Ơ Aê Diê, bi mni kơ Ih kyua mâo lu mnuih tui hlue asăp Ih, jih ai tiê kriê dlăng bruă Sang Aê Diê. Akâo kơ Ih đru kâo sĭt suôr myơr kơ Ih, leh anăn thâo mđing dlăng kơ klei hdĭp phung mă bruă kơ Aê Diê.
Dlăng Klei Aê Diê Blŭ hlăm tlâo thŭn: Y‑Yêrêmi 38:14–39:18
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
