Klei Aê Diê Blŭ: Klei Mmuñ Hđăp 94:12-15
Êlan kliăng: “Ti krah mlam kâo kgŭ čiăng bi mni kơ Ih kyua klei Ih phat kđi jing kpă.” (Klei Mmuñ Hđăp 119:62)
Klei êmuh ksiêm mĭn: Pô čih Klei Mmuñ Hđăp brei thâo hlei pô dưi mâo klei jăk mơak? Ya ngă? Ñu hưn mdah ya klei Aê Diê ƀuăn? Si ngă čiăng kơ drei thâo ƀuh klei jăk mơak leh anăn bi mni kơ Khua Yang tơdah tŭ klei Ñu mkra mjuăt?
Lu mnuih lač mtao Y‑Đawit yơh jing pô čih Klei Mmuñ Hđăp anei. Ñu tuôm tŭ leh klei Aê Diê mkra mjuăt kyua klei ñu ngă soh. Wăt ñu bi knal mơh klei khăp leh anăn klei kpă ênô Aê Diê hlăm klei mkra mjuăt snăn ñu hdơr knga bi mni kơ Aê Diê nanao. Kyuanăn, hlăm trăn anei ñu hưn klă: “Jăk mơak yơh mnuih Ih mkra mjuăt” kyuadah pô anăn srăng mâo klei mdei hlăm hruê jhat (êlan 12-13).
Mtao Y‑Đawit bi mni kơ Aê Diê kyua klei Ñu phat kđi kpă. Ñu hdơr knga kơ Khua Yang kyuadah Ñu djă pioh leh klei Ñu ƀuăn “Ñu amâo yap kpă ôh mnuih soh” (Klei Kbiă 34:7). Klei Aê Diê mkra mjuăt mtao Y‑Đawit kyua klei soh ñu, brei ƀuh Aê Diê mđing uêñ kơ phung anak Ñu tơdah digơ̆ dôk bi blah hŏng klei soh. Tơdah Khua Yang amâo mâo khăp, amâo mâo uêñ snăn Ñu amâo srăng mkra mjuăt ôh. Mtao Salômôn pô ăt mtă mtăn mơh: “Anak kâo, đăm bi êmut ôh kơ klei Yêhôwa mkra, leh anăn đăm êdu ai ôh kơ klei Ñu ƀuah; kyuadah Yêhôwa mkra hlei pô Ñu khăp, msĕ si sa čô ama ngă kơ anak ñu khăp” (Klei Bi Hriêng 3:11-12). Sĭt nik, tơdah sa čô ama ƀuah mkra anak ñu pô, amâo djŏ kyua bi êmut ôh ƀiădah kyua klei ñu khăp leh anăn čiăng kơ anak ñu jing jăk hĭn.
Hlăm Klei Mmuñ Hđăp anei, mtao Y‑Đawit brei thâo Aê Diê amâo srăng lui ôh ƀuôn sang Ñu (êlan 14). Aê Diê mkra mjuăt čiăng bi êdah klei kpă ênô Ñu ƀiădah Khua Yang amâo tuôm lui ôh. Leh klei ƀuah mkra “arăng srăng lŏ brei klei phat kđi kpă kơ phung kpă ênô” (êlan 15). Pô čih hră Hêbrơ ăt lač klă: “Êjai tŭ jih jang klei mkra mjuăt mâo klei ruă leh anăn amâo mơak ôh; ƀiădah êdei mâo boh klei êđăp ênang kbiă hriê mơ̆ng klei kpă kơ phung tŭ leh klei mkra mjuăt anăn” (Hêbrơ 12:11).
Tơdah tlă anăp hŏng klei Khua Yang ƀuah mkra, brei drei tui hriăm klei bi hmô mơ̆ng pô čih Klei Mmuñ Hđăp 119, amâo êran đuĕ dăp ôh, ƀiădah bi mni kơ Khua Yang kyua klei Ñu phat kđi jing kpă (Klei Mmuñ Hđăp 119:62). Khua Yang drei jing Pô kpă ênô leh anăn “Khua Yang mkra mjuăt hlei pô Ñu khăp” (Hêbrơ 12:6). Klei kñăm Khua Yang mkra mjuăt kyua čiăng đru anak ƀuôn sang Ñu thâo kral klei soh, thâo kmhal leh anăn lŏ wĭt kơ Khua Yang čiăng tlaih mơ̆ng klei phat kđi hlŏng lar. Drei hdơr knga kơ Khua Yang kyua Ñu ăt pap kơ drei čiăng mkra mjuăt. Ñu jing Pô “amâo srăng đih ôh, kăn pĭt rei” (Klei Mmuñ Hđăp 121:4). Kyuanăn, brei drei bi mni kơ Khua Yang kyua klei Ñu mđing dlăng leh anăn mkra mjuăt klei hdĭp drei. Ñu êbat mbĭt hŏng drei nanao čiăng bi mdih drei ti anăp klei phat kđi kpă Ñu, jih jang kyua klei tŭ dưn kơ drei leh anăn klei guh kơang Ñu.
Si ngă drei hmiêt mkăp tŭ drông klei Khua Yang mkra mjuăt hŏng klei thâo hdơr knga bi mni mơ̆?
Wah lač: Ơ Khua Yang, đru kâo thâo kral klei Ih kñăm mkra mjuăt kâo, čiăng kơ kâo mơak tŭ drông hŏng klei thâo hdơr knga bi mni leh anăn hmiêt mkăp mkra bi mlih čiăng bi knal klei jăk mơak Khua Yang brei. Bi mni kơ Khua Yang!
Dlăng Klei Aê Diê Blŭ hlăm tlâo thŭn: Y‑Êsai 60
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
