Ntawv Nkauj 94:12-15
Nqe cim:
“Ntuj teb tag hmo kuv sawv los qhuas Koj, vim Koj tej kevcai uas ncaj ncees” (Ntawv Nkauj 119:62).
Lus nug rau sawvdaws xav:
- Tus sau phau Ntawv Nkauj hais tias leejtwg thiaj yuav tau zoo? Vim li cas?
- Nws hais txog Vajtswv coglus tseg li cas rau tus ntawd?
- Yuav ua cas thiaj tau lub neej zoo thiab paub ua Vajtswv tsaug thaum Nws qhuab ntuas?
Ntau leej ntseeg hais tias vajntxwv Daviv yog tus sau tshooj Ntawv Nkauj no. Daviv yog tus tau ntsib Vajtswv kev cob qhia thaum nws ua txhaum. Nws kuj yog tus tau saj Vajtswv kev hlub thaum Vajtswv kev qhuab ntuas, nws thiaj ua Vajtswv tsaug. Yog li ntawd, nyob hauv ntu Vajluskub no nws thiaj hais tias: “Tus neeg uas Koj qhia thiab Koj muab Koj txoj kevcai cob rau mas muaj kev kaj siab”, vim tus ntawd tau so hnub uas muaj kev ntxhov siab (nqe 12-13).
Vajntxwv Daviv ua Vajtswv tsaug vim Vajtswv yog tus txiavtxim ncaj ncees. Daviv ua Vajtswv tsaug vim Vajtswv ua raws li Nws tej lus cogtseg uas hais tias: “Kuv txoj kev hlub yuav nyob nrog ntau txhiab tiam neeg, zam txim rau tej neeg ua phem thiab muaj txim, tiamsis Kuv yuav rau txim rau lawv tej xeebntxwv mus txog peb plaub tiam neeg” (Khiavdim 34:7). Qhov uas Vajtswv qhuab ntuas Daviv twb yog Daviv tej kev txhaum thiab qhia hais tias, Vajtswv saib ntsoov Nws tej menyuam thaum lawv yuam kev ua txhaum. Yog Vajtswv tsis hlub, tsis quavntsej ces Nws yeej tsis cob qhia leejtwg. Vajntxwv Xalumoos kuj qhia hais tias: “Me tub, thaum tus Tswv qhuab ntuas koj, ua tib zoo mloog thiab khaws nkaus nws tej lus rau nruab siab kom koj thiaj paub ceevfaj. Tus Tswv qhuab ntuas tus uas Nws hlub ib yam li leej txiv qhuab ntuas tus tub uas nws hlub” (Pajlug 3:11-12). Tseeb tiag, thaum ib leej txiv cob qhia, qhuab ntuas nws tej me nyuam yeej tsis yog nws ntxub lawv, tiamsis nws hlub lawv thiab xav kom lawv muaj lub neej zoo.
Hauv tshooj Ntawv Nkauj no, Vajntxwv Daviv kuj qhia paub hais tias Vajtswv yeej tsis tso Nws tej menyuam tseg (nqe 14). Vajtswv qhuab ntuas yog qhia tshwm txog Nws txoj kev ncaj ncees, tsis yog muab Nws tej menyuam tso tseg. Tomqab uas qhuab ntuas lawm, “Yuav muaj kev ua ncaj nyob hauv tej tsev tu plaub, cov neeg ncaj yuav ua ncaj mus li ” (nqe 15). Tus sau phau Henplais kuj hais tias: “Thaum luag qhuab ntuas peb, thaum ntawd peb tsis kaj siab, peb nyuaj siab xwb; tiamsis tom qab ntawd cov neeg uas khaws luag tej lus qhuab ntuas rau nruab siab, cov neeg ntawd yuav tsimtxiaj thiab yuav tau zoo nyob kaj siab lug” (Henplais 12:11).
Thaum peb ntsib Vajtswv cob qhia, peb yuav tsum xyaum raws li hauv phau Ntawv Nkauj 119 qhia, tsis khiav nkaum, tiamsis cia li ua Vajtswv tsaug rau Vajtswv tej kev cai ncaj ncees (Ntawv Nkauj 119:62). Vajtswv yog tus ncaj ncees thiab “tus Tswv qhuab ntuas tus uas Nws hlub” (Henplais 12:6). Vajtswv lub homphiaj uas qhuab ntuas Nws cov menyuam yog xav kom lawv zeem paub kev txhaum, lees kev txhaum thiab tig rov los cuag Vajtswv kom tsis raug rau txim. Peb ua Vajtswv tsaug vim Nws tseem hlub thiab qhuab ntuas peb. Vajtswv yog tus “yeej tsis ncaws dabntub lossis tsis tsaug zog li” (Ntawv Nkauj 121:4). Yog li ntawd, peb cia li ua Vajtswv tsaug rau Nws kev tiv thaiv, thiab Nws kev qhuab ntuas peb. Vajtswv yeej nyob nrog thiab cob qhia peb los ntawm Nws kev qhuab ntuas uas ncaj ncees kom muaj nqis rau peb lub neej thiab ua rau Nws tau ntsej muag.
Thov Vajtswv,
Vajtswv, thov pab nyuam yaus paub txog Koj kev qhuab ntuas, kom nyuam yaus zoo siab txais yuav, paub hloov siab ua zoo thiab paub ua Koj tsaug. Amees.
Peb puas npaj nroog txais tos Vajtswv kev qhuab ntuas thiab ua Vajtswv tsaug rau qhov ntawd lawm tau?
Nyeem Vajluskub hauv peb lub xyoo: Yaxayas 60
Kênh Youtube BHKTHN:
