Pajlug 18:14; II Kauleethaus 12:5-10
Nqe cim:
“Ua neej nyob koj nyiaj taus kev mob, tiamsis tsis muaj leejtwg tiv taus txojkev nyuaj siab?” (Pajlug 18:14 Phau Txhais Qub).
Phau Txhais Tshiab HMONGSV hais tias:
“Neeg lub siab thev taus kev mob nkeeg, tiamsis leejtwg thev taus txojkev lwj siab?”
Lus nug rau sawvdaws xav:
- Vajntxwv Xalumoos qhia tej menyuam txog lub siab thiab lub cev zoo licas?
- Los ntawm yam dabtsi Timthawj Paulus thiaj zoo siab thiab khav txog nws tej kev qaug zog?
- Yuav ua cas thiaj muaj lub siab tawv txhua lub tsamthawj?
Vajntxwv Xalumoos qhia menyuam ua lubneej muaj tswvyim los ntawm muaj lub siab xav mus rau yam zoo. Nws hais txog kev sib txuas ntawm neeg lub siab xav thiab lub cev ntaj ntsug.Nws hais tias“Neeg lub siab thev taus kev mob nkeeg, tiamsis leejtwg thev taus txojkev lwj siab?” (nqe 14 PTT). Thaum raug mob, lub siab xav mus rau yam zoo yuav pab tau kom zoo mob sai. Tiamsis yog poob siab, qaug zog, lub cev yuav tsis muaj kev cia siab thiaj ua rau mob ntev. Peb txojkev xav cuam tshuam rau peb lub zog thiab tej yam hauv nruab siab cuam tshuam rau lub cev. Thaum zoo siab, tibneeg ntsejmuag luag ntxhi, tiamsis thaum ntxhov siab ntsejmuag mluas mlob (Pajlug 15:13). Lub siab xyivfab kuj yog cov tshuaj zoo kho tau ntau yam mob, tiamsis kev poob siab ua rau tej pob txhab qhuav (Pajlug 17:22). Yog li ntawd tus uas muaj tswvyim yuav tsum niaj hnub vamkhom tus Tswv txoj koobhmoov, xyaum ua neeg muaj kev xav mus rau yam zoo, muaj lub siab tawv txhua lub tsamthawj.
Timthawj Paulus hais txog tej kev mob hauv nws lub cev zoo li ib tug pos chob (II Kauleethaus 12:5-10 PTT). Tiamsis thaum raug mob zoo li ntawd, tus Tswv pab nws zeem paub tus Tswv txoj koobhmoov zoo kawg nkaus uas muab pub rau nws. Yog li ntawd, nws thiaj zoo siab thiab khav txog nws tej kev qaug zog kom sawvdaws pom txog Tus Cawmseej lub hwjchim hauv nws lubneej. Yog li ntawd nws thiaj hais tias thaum nws qaug zog ces kuj yog thaum nws muaj zog.
Peb lubneej yeej khiav tsis dhau tej zaug lub cev qaug zog, lossis raug mob nkeeg. Peb yuav tsum muaj lub siab tawv, cia siab ntsoov rau tus Tswv kev tswjkav hauv yus lubneej thiab tuav ruaj kev sib raug zoo nrog tus Tswv. Los ntawm Vajtswv kev pab, yuav pauv hloov tau peb txojkev xav. Peb yuav muaj lub siab tawv thaum vamkhom tus Tswv lub hwjchim uas tsis paub kawg. Kuj txhob ntshai qhia rau tus Tswv txog peb tej kev qaug zog sab ntsujplig thiab tej kev mob sab nqaij tawv, vim thaum qaug zog li ntawd, peb yuav xam pom tus Tswv tej koobhmoov zoo kawg nkaus uas Nws pub rau peb. Thov tus Tswv pub rau peb xam pom tus kheej kev qaug zog thiab tas siab ntsws vamkhom Nws zoo li Timthawj Paulus hais tias: “Vim Yexus Khetos txhawb kuv lub zog, kuv thiaj tiv taus txhua tsav yam huv tibsi” (Filipis 4:13).
Thov Vajtswv
Leej Txiv tus uas dawbhuv, thov ua Koj tsaug vim Koj pub dag zog rau nyuam yaus. Thov pab nyuam yaus niaj hnub zeem paub tus kheej kev qaug zog kom nyuam yaus paub vamkhom Koj lub zog. Thov pub nyuam yaus muaj kev cia siab rau Koj lub hwjchim tswjkav, vamkhom Koj txoj koobhmoov kom xyaum ua lubneej muaj siab tawv txhua lub tsamthawj. Amees.
Peb yuav tsum ua dabtsi thiaj pab tau tus kheej muaj lub siab tawv thiab lub cev muaj zog?
Nyeem Vajluskub hauv peb lub xyoos: Yaxayas 47
Kênh Youtube BHKTHN:
