Yelemis 38:17-23
Nqe cim:
“Tsis txhob pub leejtwg ntxias tau nej. Tus uas mus nrog tus uas ua phem nyob ua ke, nws yeej yuav ua phem li tus ntawd” (I Kauleethaus 15:33).
Lus nug rau sawvdaws xav:
- Tus cevlus Yelemis rov piav qhia rau vajntxwv Xedekiyas yam dabtsi?
- Yog tsis ua raws, vajntxwv yuav raug dabtsi? “Vajntxwv tej phoojywg” yog leejtwg?
- Lawv ua licas thaum pom vajntxwv mag lawv lub voj hluas lawm?
- Yuav ua cas peb thiaj ruaj siab ua raws tus Tswv tej lus thaum lubneej ntsib teebmeem?
Tomqab uas rov piav qhia tus Tswv tej lus uas hais tias, yog mus thawj cov tubrog Npanpiloos ces vajntxwv yuav tsis raug tuag thiab lub nroog yuav tsis raug hlawv, thiab yog tsis kam mus thawj ces vajntxwv thiab lub nroog yuav khiav tsis dhau kev puastsuaj, tus cevlus Yelemis pom vajntxwv tseem ua xyem xyav vim ntshai poob ntsejmuag thaum mus thawj cov Npanpiloos (nqe 19), nws thiaj nplig vajntxwv siab hais tias, “Yuav tsis muaj leejtwg muab koj cob rau cov neeg ntawd. Kuv thov kom koj ua raws li tus Tswv tej lus uas kuv qhia rau koj no; koj thiaj tsis raug luag tua thiab nyob tso siab plhuav” (nqe 20). Nws kuj hais ntxiv hais tias, yog vajntxwv ntshai poob ntsejmuag tsis kam mus thawj, ces vajntxwv haj yam yuav poob ntsejmuag thaum luag ntes vajntxwv cov pojniam, menyuam coj mus rau cov Npanpiloos tej tubrog. Nyob tiam ntawd, tej pojniam menyuam raug ntes coj mus yog ib qhov kev txajmuag loj ntawm tej vajntxwv thiab tej thawj tubrog uas swb tsam.
Tus cevlus Yelemis kuj qhia rau vajntxwv Xedekiyas paub txog tus Tswv tej lus hais tias, cov pojniam hauv vajntxwv lub loog yuav raug ntes coj mus thiab qhia rau vajntxwv hais tias: “Vajntxwv tej phoojywg tau dag ntxias nws lawv yuam nws ua raws li lawv siab xav. Nimno nws ob txhais kotaw zom pas av lawm, nws tej phoojywg khiav tas thiab tso nws tseg” (nqe 22b). Lo lus “vajntxwv tej phoojywg” yog hais txog cov xibhwb cevlus cuav, lawv tau hais tej lus dag ntxias vajntxwv txhob mus thawj cov Npanpiloos, nimno lawv dag tau lawm, thaum pom vajntxwv ntsib teebmeem, txhais kotaw zom pas av uas yog txojkev dag, ces lawv khiav tas thiab tso nws tseg. Peb pom hais tias tus Tswv muaj kev hlub kawg li, Nws ua siab ntev siv tus cevlus Yelemis los qhuab ntuas vajntxwv Xedekiyas ntau zaug, tiamsis vajntxwv tsis ntseeg thiab tsis ua raws li tus Tswv hais, nws mus ua raws li cov cevlus cuav tej lus haub ntxias, nws saib lawv zoo li tej phoojywg uas tso siab tau.
Thaum ntsib teebmeem, peb yeej yuav tau tej phoojywg thiab cov neeg ibncig qhuab ntuas, txhawb zog. Peb cheemtsum tej lus ntuas thiab txhawb zog ntawm sawvdaws tiamsis yuav tsum ceevfaj nco txog tej lus qhuab ntuas hais tias: “Tsis txhob pub leejtwg ntxias tau nej. Tus uas mus nrog tus uas ua phem nyob ua ke, nws yeej yuav ua phem li tus ntawd” (I Kauleethaus 15:33). Peb yuav tsum nyeem, kawm Vajtswv Txojlus txhua hnub, thiaj paub tus Tswv lub siab nyiam thiab tau Nws pub tswvyim kev txawjntse zeem paub cov phoojywg tej lus qhuab ntuas puas raws li Vajtswv Txojlus qhia. Txhob ua li vajntxwv Xedekiyas, vim ntshai poob ntsejmuag thiaj qi muag nti mus mloog cov phoojywg phem tej lus, thaum kawg thiaj raug tej teebmeem txaus tu siab.
Thov Vajtswv
Vajtswv tus uas muaj kev hlub! Thov pab nyuam yaus nrog nraim Koj Txojlus txhua hnub, kom nyuam yaus muaj tswvyim thiab lub pobntseg hnov tseeb Koj tej lus qhia, nyuam yaus thiaj tsis poob rau tej phoojywg phem tej lus dag ntxias. Amees.
Peb puas xyuam xim muab cov phoojywg tej lus ntuas los sib piv rau Vajtswv Txojlus ua ntej txiav txim siab ua raws lawm tau?
Nyeem Vajluskub hauv peb lub xyoos: Yaxayas 45:18-46:13
Kênh Youtube BHKTHN:
