II Kevcai 17:14-20
Nqe cim:
“Nws yuav tsum khaws phau ntawv no thiab niaj hnub nyeem mus tas nws simneej, nws thiaj li paub hwm tus Tswv thiab ua raws li txhua yam uas qhia tseg rau hauv phau ntawv ntawd” (II Kevcai 17:19).
Lus nug rau sawvdaws xav:
- Vim licas tus Tswv tso cai rau cov Yixalayees tsa vajntxwv?
- Yuav tsum xaiv raws txojcai twg? thiab tus uas yuav tau tsa los ua vajntxwv yuav tsum muaj txaus tej yam zoo twg?
- Keebkwm qhia pom tias cov Yixalayees tej vajntxwv zoo licas?
- Zaj kawm no qhuab ntuas txog yam dabtsi rau tus Tswv Pawg Ntseeg niaj hnub nimno?
Cov Yixalayees coj raws txojcai tswj uas yog Vajtswv kav, Vajtswv xaiv lawv thiab Nws ua lawv tus Vajntxwv, yog li ntawd qhov uas tsa ib tug los ua vajntxwv raws li txojcai vajntxwv kav ces tsis raws Vajtswv lub siab nyiam. Tiamsis, tus Tswv paub ua ntej hais tias cov Yixalayees yuav taij thov tsa muaj vajntxwv zoo li lwm lub tebchaws, Nws thiaj cia kom lawv tau raws li lawv kev ntshaw. Nyob hauv no, tus Tswv qhia txog tej txojcai thiab tej yam zoo cheemtsum muaj ntawm ib tug vajntxwv kom vajntxwv thiab nws haivneeg thiaj tau Vajtswv foom koobhmoov. Tim ib, vajntxwv yog tus tau Vajtswv xaiv, tsis yog xaiv raws cov pejxeem siab nyiam. Tim ob, vajntxwv yuav tsum xaiv tawm hauv Vajtswv haivneeg los, tsis txhob xaiv lwm haivneeg. Tim peb, tsis txhob muaj coob nees dhau rau nws cov tubrog vim yooj yim ua rau tus Tswv haivneeg rov mus nram tebchaws Iziv rau qhov tebchaws Iziv muaj cov nees zoo heev. Tim plaub, txhob muaj coob tug pojniam nyob tsam tso tus Tswv tseg. Tim tsib, txhob ua kom npluanuj, muaj nyiaj kub ntau dhau vim yooj yim qaug mus rau tej khoom ntiajteb. Tim rau yog yam tseemceeb dua ntais, vajntxwv yuav tsum muaj Vajtswv phau kevcai nrog nraim nws, thiaj yuav tau nyeem thiab xav txog txhua hnub hmo kom ua tau lubneej hwm tus Tswv thiab ceevfaj ua raws li Nws Txojlus.
Vajtswv hlub Nws haivneeg thiaj qhia txhua yam ua ntej rau lawv. Thaum uas Xamuyees laus lawm, tus Tswv haivneeg taij thov kom muaj ib tug vajntxwv zoo li lwm haivneeg (I Xamuyees 8:1-22). Tomqab ntawd, cov vajntxwv hauv keebkwm tebchaws Yixalayees ua txhaum tej kevcai uas tus Tswv txwv. Vajntxwv Xalumoos muaj coob nees, coob pojniam, thiab muaj ntau nyiaj kub… Feem ntau cov vajntxwv sawv los kav tebchaws puavleej ua raws neeg ntiajteb, tsis ua raws li Vajtswv Txojlus qhia, tsis siv tus Tswv txoj kevcai los ua qhov chaw tiag rau kev tswjkav tebchaws, thiaj ua rau tus Tswv haivneeg ntsib ntau yam teebmeem tsis zoo.
Kev txhaum ua rau tibneeg xav ua raws lub ntiajteb heev dua qhov uas cia siab thiab mloog tus Tswv lus. Yuav kom dim dhau tej uas lub ntiajteb muab los khi, ces Vajtswv Txojlus yuav tsum yog txojcai nyiaj kub rau cov ua thawjcoj thiab Vajtswv cov menyuam txhua tus, ib yam li Vajtswv tej lus qhuab ntuas Yausuas hais tias: “Thaum sawvdaws tuaj ua ke pehawm kuv, yuav tsum muaj neeg nyeem kuv phau Kevcai rau sawvdaws mloog. Koj yuav tsum niaj hnub niaj hmo kawm thiab ua raws li tej lus ntawd, koj tes haujlwm thiaj yuav tiav thiab vammeej” (Yausuas 1:8). Cov uas coj Pawg Ntseeg yuav tsum txhob nyob deb Vajtswv Txojlus, txhob cia siab rau meejmom, nyiaj txiag, khoom ntiajteb. Yuav tsum muaj lub siab hwm tus Tswv thiab ua raws Nws Txojlus mus tas sim neej thiaj yuav coj tau tus Tswv haivneeg mus rau hauv nras zaub ntsuab, pas dej ntshiab.
Thov Vajtswv
Tus Tswv, Koj yog tus uas loj dua ntais txhua tsav yam. Thov qhia nyuam yaus paub cia siab rau Koj thiab Koj Txojlus txhua hnub, nyuam yaus thiaj txais tau tej koobhmoov zoo ntawm kev mloog lus. Amees.
Peb qhia tshwm nplooj siab hwm tus Tswv thiab ua raws Nws Txojlus licas?
Nyeem Vajluskub hauv peb lub xyoos: Yaxayas 40:1-26
Kênh Youtube BHKTHN:
