Henplais 2:10-18
Nqe cim:
“Qhov uas Vajtswv tus uas tsim thiab saib xyuas ib puas tsav yam txib Yexus los raug kev txomnyem kom Yexus thiaj ua tau Yexus txoj haujlwm tiav, qhov ntawd Vajtswv ua yog lawm. Vajtswv ua li ntawd, nws thiaj yuav coj tau nws cov menyuam ntau leej los txais yuav nws txoj koob hmoov, rau qhov Yexus yog tus uas cawm lawv kom lawv dim lawv lub txim” (Henplais 2:10 PTQ).
Phau Txhais Tshiab HMONG SV hais tias:
“Thaum Vajtswv coj cov tub coob coob mus tau koob meej ci ntsa iab, kuj tsim nyog Vajtswv tus uas ua rau txhua yam muaj nyob thiab txhua yam nyob rau nws, ua rau tus uas rhawv txojkev dim rau lawv ntawd zoo kawg nkaus rau qhov uas nws raug tsim txom”
Lus nug rau sawvdaws xav:
- Tswv Yexus raug tsimtxom kom tau zoo kawg nkaus muaj lub ntsiab licas?
- Qhov uas Tswv Yexus los yug ua neeg thiab los ua tus Povthawj Hlob muaj qabhau licas rau peb hauv kev cawmdim thiab lubneej txhua hnub?
Tus sau tsab ntawv Henplais piav txog Tswv Yexus yog “tus uas rhawv txojkev dim”, Nws yog tus “zoo kawg nkaus rau qhov uas nws raug tsim txom” (nqe 10 – PTT). Tswv Yexus yog tus uas rhawv txojkev dim, muaj lub ntsiab hais tias Nws ua rau muaj txojkev cawmdim, qhib tau txojkev kom txhua tus tuaj txais tau kev cawmdim. Yog li ntawd, qhov uas “zoo kawg nkaus” no tsis yog hais txog Tswv Yexus tus cwjpwm ua zoo, tiamsis yog hais txog Nws tes haujlwm zoo. Tswv Yexus yog tus uas zoo kawg nkaus. Nws yeej ibtxwm zoo kawg nkaus ua ntej tsim ntuj tsim teb los lawm. Nws zoo kawg nkaus thaum tseem yog mos liab pw hauv dab zaub. Nws zoo kawg nkaus thaum nrog niam txiv nyob hauv zos Naxales. Tiamsis, tsuas yog thaum Nws ua haujlwm, tiv kev txomnyem saum tus ntoo khaublig, ces Nws tes haujlwm cawmdim thiaj suav hais tias zoo kawg nkaus.
Yuav kom tes haujlwm cawmdim zoo kawg nkaus, Tus Tsim Txhua Yam uas ibtxwm tsis txawj tuag thiaj los yug ua ib tug tibneeg tseeb uas muaj roj ntsha cev nqaij, nws thiaj txawj tuag thiab rhuav tau dab Ntxwgnyoog lub hwjchim uas ua kom neeg tuag puastsuaj mus (nqe 14). Vim Tswv Yexus yog tibneeg txaus nkaus, Nws thiaj sawv cev tau rau txhua tus tibneeg tabmeeg Vajtswv ntawm tes haujlwm ua Pov Thawj Hlob. Nyob tiam Vajluskub Qub, cov Yixalayees yuav tsum muaj cov povthawj nyob nruab nrab ntawm lawv thiab Vajtswv. Cov povthawj tsuas ua kevcai theej txhoj rau ib tug zus, tsuas yog tus povthawj hlob thiaj muaj cai fij tsiaj theej txhoj rau tag nrho cov pejxeem sawvdaws.
Dhau ntawm tes haujlwm ua Povthawj Hlob, Tswv Yexus thiaj daws tau tibneeg tej kev txhaum. Tiamsis, dhau ntawm kev cheemtsum loj uas yog kev cawmdim, ces tibneeg tseem tshuav ntau yam kev cheemtsum hauv lubneej txhua hnub. Ntau zaug ntsib kev txomnyem, nyuaj siab, peb xav nug hais tias “Vim licas tsis muaj leejtwg totaub kuv?” Peb pom hais tias tibneeg tej lus txhawb zog, tej tswvyim taw qhia saum huabcua, ntaub ntawv… pab tsis tau peb tej kev ntxhov siab. Tej lub sijhawm zoo li ntawd, yuav tsum nco ntsoov hais tias Tswv Yexus “paub pab cov neeg uas raug kev sim siab, rau qhov nws twb raug kev sim siab thiab kev tsimtxom los lawm” (nqe 18). Tsis yog Tswv Yexus tsuas pom tej uas peb ntsib xwb, tiamsis Nws kuj tiv dhau tej yam ntawd lawm thiab. Cia li los cuag tus Tswv kom txais tau Nws txoj kev pab cawm.
Thov Vajtswv
Tswv Yexus, nyuam yaus ua Koj tsaug, vim Koj tau txaus siab tiv kev txomnyem li ib tug tibneeg kom totaub thiab cawm tau tibneeg. Thaum pom hais tias tsis muaj leejtwg pab tau, thov qhia nyuam yaus txawj los cuag Koj thiaj tau txais Koj kev pab cawm. Amees.
Peb puas xav tau kev pab cawm ntawm tus uas “tiv kev txomnyem kom tau zoo kawg nkaus”?
Nyeem Vajluskub hauv peb lub xyoos: Yaxayas 37:1-20
Kênh Youtube BHKTHN:
