Klei Aê Diê Blŭ: Hêbrơ 5:7‑9
Êlan kliăng: “Wăt tơdah Ñu jing Anak Aê Diê, Ñu hriăm klei gưt asăp hŏng klei knap mñai Ñu tŭ leh” (Hêbrơ 5:8).
Klei êmuh ksiêm mĭn: Ya klei pô čih hră Hêbrơ lač kơ klei Khua Yang Yêsu gưt asăp? Leh Ñu gưt asăp kluôm ênŭm, ya klei Ñu jing kơ phung gưt asăp kơ Ñu? Ya klei drei hriăm kơ rup bi hmô klei gưt asăp mơ̆ng Anak Aê Diê? Si drei ngă čiăng dưi gưt asăp Khua Yang kluôm ênŭm?
Grăp thŭn tơdah Phung Sang Aê Diê bi hdơr kơ klei Khua Yang Yêsu tŭ klei knap mñai, grăp čô drei mâo klei mñă kơ klei Khua Yang gưt asăp kluôm ênŭm. Aê Diê Anak đup gưt leh klei Aê Diê Ama čiăng, tŭ klei djiê ti kyâo bi kal kyua klei soh jih jang mnuih. Knŏng hŏng klei gưt asăp klei Ama čiăng, Khua Yang Yêsu tŭ jih jang klei hêñ mlâo leh anăn klei ruă knap huĭ mduĭ hĭn.
Hlăm trăn Klei Aê Diê Blŭ anei, pô čih brei drei thâo Khua Yang Yêsu “hriăm klei gưt asăp” Ama leh anăn hŏng klei knap mñai Ñu tŭ leh. Ñu jing Anak Aê Diê, si ngă ăt lŏ “hriăm klei gưt asăp” mơh? Drei lŏ hdơr wĭt mmông dôk hlăm war Gêtsêmanê hlăk Khua Yang Yêsu jih ai tiê wah lač truh kơ tlâo blư̆ tơl êa kơhŏ ƀlĕ msĕ si hdrah êrah. Leh anăn ti knhal tuč Ñu tŭ gưt klei Ama čiăng kluôm dhuôm, Ñu wah lač: “Ơ Ama tơdah Ih amâo dưi mă atŏ anei ôh mơ̆ng kâo tơl kâo mnăm leh, brei truh tui si Ih čiăng” (Y‑Mathiơ 26:36-46). Tinei, pô čih hră Hêbrơ lŏ mñă mơh “Yêsu wah lač leh anăn kwưh hŏng klei ur ktang leh anăn hŏng êa ală” (êlan 7). Wăt tơdah jing Anak Aê Diê, Ñu mâo klei dưi hngah “kčok phĭ” klei knap mñai, ƀiădah Khua Yang Yêsu hriăm leh klei gưt asăp hŏng klei knap mñai Ñu tŭ leh (êlan 8). Leh anăn kyua hŏng klei gưt asăp kluôm dhuôm anăn yơh Ñu jing phŭn kơ klei bi mtlaih hlŏng lar kơ jih jang hlei pô gưt asăp kơ Ñu (êlan 9).
Klei Khua Yang gưt asăp kluôm ênŭm lui pioh kơ drei sa rup bi hmô klei gưt asăp Aê Diê. Brei drei hriăm gưt asăp Khua Yang kyua klei gưt asăp amâo êlưih ôh. Klei gưt asăp ngă kơ drei lu blư̆ tŭ klei dleh knap, đa tơl săn asei mlei ƀiădah drei ăt dlăng kơ Khua Yang nanao, Pô mơak klam kyâo bi kal, čiăng gưt ngă tui si klei Ama čiăng. Khua Yang Yêsu găn leh klei knap mñai hlăm klei gưt asăp čiăng pap brei kơ anak mnuih leh anăn jing phŭn mtrŭt đru drei dưi găn hgao tơdah tlă anăp hŏng klei dleh dlan čiăng gưt asăp Khua Yang.
Gưt asăp jing sa hlăm dŭm mta klei Aê Diê jao kơ anak mnuih dơ̆ng mơ̆ng hlăk mphŭn dơ̆ng. Ƀiădah phung aê aduôn anak mnuih hmư̆ gưt hlue asăp yang jhat, amâo gưt asăp Aê Diê mtă ôh. Dơ̆ng mơ̆ng anăn yơh, klei soh mŭt čuê hlăm phung mnuih kyuanăn klei gưt asăp jing dleh dlan hŏng anak mnuih. Hruê anei, čiăng dưi gưt asăp, brei drei mâo klei đăo kơ Khua Yang. Knŏng hjăn păn Khua Yang Yêsu jing Pô doh jăk leh anăn klei Ñu gưt asăp jing kluôm ênŭm. Leh anăn knŏng hjăn Ñu dưi đru drei gưt asăp kơ Aê Diê tơdah drei đăo knang kơ Ñu.
Si ngă drei hriăm gưt asăp Aê Diê tui si rup bi hmô klei gưt asăp mơ̆ng Khua Yang Yêsu mơ̆?
Wah lač: Ơ Khua Yang, akâo Ih đru kâo krơ̆ng klei kpĭ mjuăt pô hlăm klei gưt asăp. Akâo Ih bi hriăm kâo thâo gưt asăp grăp hruê dơ̆ng mơ̆ng bruă điêt hĭn. Akâo Khua Yang lŏ thiăm klei ktang kơ kâo čiăng kơ kâo dưi hdĭp gưt asăp Ih nanao.
Dlăng Klei Aê Diê Blŭ hlăm tlâo thŭn: Y‑Êsai 27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
