Henplais 5:7-9
Nqe cim:
“Txawm yog Yexus yog Vajtswv tus Tub los nws tseem kawm mloog lus los ntawm txojkev uas tiv kev txomnyem” (Henplais 5:8).
Lus nug rau sawvdaws xav:
- Nyob hauv tsab ntawv Henplais hais licas txog Tswv Yexus kev mloog lus?
- Tomqab uas mloog lus tuag nthi lawm, Tswv Yexus pub dabtsi rau cov uas mloog Nws lus?
- Peb kawm tau dabtsi dhau ntawm Vajtswv Leej Tub kev ua haujlwm?
- Yuav ua licas peb thiaj ua tau lubneej mloog tus Tswv lus tuag nthi?
Txhua xyoo thaum Pawg Ntseeg ua koob tsheej nco txog Tswv Yexus raug kev txomnyem, peb txhua tus puavleej tau qhia nco txog tus Tswv kev mloog lus tuag nthi. Vaj Leej Tub mloog Vaj Leej Txiv lus txaus nkaus thiaj los tuag saum tus ntoo khaublig vim noobneej kev txhaum. Vim yog ua raws Vaj Leej Txiv lub siab nyiam, Tswv Yexus thiaj raug saib tsis taus thiab raug txojkev tuag uas txaus ntshai tshajplaws.
Nyob hauv ntu Vajluskub no, tus sau tsab ntawv qhia peb paub hais tias Tswv Yexus tau “kawm mloog lus” ntawm tej kev tsimtxom uas Nws raug. Nws yog Vajtswv Leej Tub, vim licas yuav tsum “kawm mloog lus”? Peb nco txog lub sijhawm nyob hauv lub vaj Khexemanes thaum Tswv Yexus kawg siab kawg ntsws thov Vajtswv peb zaug, Nws cov hws nrog li ntshav. Thiab thaum kawg Tswv Yexus xaiv ua raws li Vaj Leej Txiv lub siab nyiam, Nws thov hais tias: “Kuv Txiv, yog koj tsis pom zoo muab lub khob no tshem ntawm kuv mus, yuav cia kuv haus xwb, ces cia ua raws li koj lub siab nyiam” (Mathais 26:36-46). Nyob hauv no, tus sau tsab ntawv Henplais rov piav hais tias “Thaum Yexus tseem nyob hauv ntiajteb no, nws thov Vajtswv tus uas pab tau kom nws dim kev ploj kev tuag. Thaum nws thov nws quaj thiab los kua muag kawg li” (nqe 7). Txawm tias Nws yog Vajtswv Leej Tub thiab Nws muaj cai tsis txais “lub khob iab daw” txomnyem, los Nws tseem kawm mloog lus los ntawm tej kev txomnyem uas Nws raug (nqe 8). Vim kev mloog lus txaus nkaus ntawd, Nws thiaj tau los ua tus uas pub txojsia ntev dhawv mus ibtxhis rau cov uas mloog Nws lus (nqe 9).
Tswv Yexus kev mloog lus ua qauv rau peb txog kev mloog Vajtswv lus. Peb kuj yuav tsum kawm mloog tus Tswv lus vim mloog lus tsis yog yoojyim. Ntau zaug, kev mloog lus yuav ua rau peb raug ntau yam kev txomnyem, tej zaum yuav raug ploj raug tuag, los peb yuav tsum saib ntsoov Tswv Yexus tus uas zoo siab hlo kwv tus ntoo khaublig, peb thiaj yuav ua tau raws li Vajtswv lub siab nyiam. Tswv Yexus ntsib ntau yam kev txomnyem hauv kev mloog lus, Nws thiaj totaub zoo tibneeg thiab yog lub zog pab kom peb hla dhau tej kev txomnyem thiaj ua tau lubneej mloog tus Tswv lus.
Mloog lus yog ib yam nyob hauv tej uas Vajtswv teem cia rau tibneeg puag thaum Chivkeeb los. Tiamsis poj koob yawm txwv yeem mloog dab lus, tsis ua raws li tej lus Vajtswv samhwm. Txij thaum ntawd los, kev txhaum muaj nyob hauv txhua tus tibneeg raws roj ntsha, thiaj ua rau tibneeg nyuaj mloog lus. Niaj hnub nimno, yuav ua tau lubneej mloog lus, peb yuav tsum muaj kev ntseeg Tswv Yexus. Tsuas yog Tswv Yexus tibleeg xwb thiaj yog Tus ua zoo txaus nkaus thiab Nws txojkev mloog lus kuj txaus nkaus. Thiab tsuas muaj Nws thiaj yuav pab tau peb ua tau lubneej mloog Vajtswv lus thaum peb los ntseeg Nws.
Thov Vajtswv
Tus Tswv, thov pab nyuam yaus coj tau tus cai tswj hauv kev mloog Koj lus. Thov qhia nyuam yaus paub kawm mloog lus txhua hnub hauv txhua txoj haujlwm loj me. Thov Koj txhawb nyuam yaus lub zog kom niaj hnub ua tau lubneej mloog Koj lus. Amees.
Peb puas tau kawm mloog Vajtswv lus raws li Tswv Yexus tus qauv mloog lus lawm tau?
Nyeem Vajluskub hauv peb lub xyoos: Yaxayas 27
Kênh Youtube BHKTHN:
