Klei Aê Diê Blŭ: Y-Đaniel 9:20-27
Êlan kliăng: “Tơdah ih dơ̆ng wah lač, mâo leh sa klei wĭt lač, leh anăn kâo hriê hưn klei anăn kơ ih, kyuadah ih jing pô Aê Diê khăp snăk.” (êlan 23a).
Klei êmuh ksiêm mĭn: Klah čŭn klei blŭ dĭng buăl jăk Y-Gabriel. Ya klei truh bi êdah mơ̆ng êlan 24-27? Si ngă klei bi êdah anei jing “klei thâo mĭn leh anăn klei thâo săng” kơ khua pô hưn êlâo Y-Đaniel? Ya ngă Khua Yang bi êdah klei hgăm kơ hruê êdei anăp hŏng ñu? Hruê anei hŏng hlei phung Khua Yang mơak bi êdah hdră êlan Ñu?
Hlăk wah lač hưn klei soh leh anăn akâo kơ Aê Diê lŏ mdơ̆ng ƀuôn prŏng Yêrusalem, Khua Yang wĭt lač kơ khua pô hưn êlâo Y-Đaniel hŏng klei bi êdah kjuh pluh hruê kăm (êlan 22‑23). Aê Diê bi kčah kjuh pluh hruê kăm pioh lăm klei soh leh anăn “bi truh klei kpă ênô hlŏng lar”. Kjuh pluh hruê kăm mbha jing dua gưl: gưl kjuh hruê kăm leh anăn năm pluh dua hruê kăm; leh anăn gưl sa hruê kăm (êlan 24‑27). Gưl kjuh hruê kăm leh anăn năm pluh dua hruê kăm kčưm mơ̆ng hlăk phung ƀuôn sang Aê Diê mă tŭ klei mtă brei mkra tơl truh hruê Pô Tŭ Klei Trôč Êa Ƀâo Mngưi jing Mtao (êlan 25). Hlăm gưl anei ƀuôn prŏng srăng lŏ mdơ̆ng. êdei kơnăn, “arăng srăng bi mdjiê hĕ Pô arăng Trôč Êa Ƀâo Mngưi” , ƀuôn prŏng doh jăk leh anăn Sang Yang Doh Jăk arăng srăng bi rai, klei myơr mnơ̆ng ngă yang mjưh ruê̆, klei bi blah truh (êlan 26‑27). Hruê kăm knhal tuč srăng tuč ruê̆ hlăm ênuk knhal tuč Khua Yang bi kčah leh (êlan 27).
Anei jing sa hlăm lu klei blŭ khua pô hưn êlâo dleh thâo săng hlăm Klei Aê Diê Blŭ. Phung thâo mblang Klei Aê Diê Blŭ mblang mdê mdê kơ klei truh anei. Ƀiădah, jih jang hdră êlan mblang tŭ ư sơăi msĕ snei kjuh pluh hruê kăm jing ênuk Aê Diê srăng lŏ rŭ mdơ̆ng Israel hlăm kđeh wăt hlăm mngăt. Ktuê jih “kjuh pluh hruê kăm” amâodah “kjuh pluh blư̆ kjuh” jing 490 thŭn anei, đa mta klei srăng bi sĭt: Sang Yang hlăm kđeh dưi lŏ mdơ̆ng êdei anăn ăt arăng lŏ bi rai mơh (êlan 25‑26), phung ƀuôn sang Aê Diê amâo srăng lŏ ngă soh ôh, klei soh srăng rai luč, klei kpă ênô hlŏng lar lŏ mkŏ mdơ̆ng (êlan 24).
Si ngă klei bi êdah dlăng jing “klei thâo mĭn leh anăn thâo săng” kơ khua pô hưn êlâo Y-Đaniel (êlan 22)? Kyuadah anăn jing klei bi êdah kdlưn êgao hĭn kơ klei ñu čang guôn, bi mĭn (jing klei Israel hlăm kđeh lŏ mdơ̆ng), čiăng dưi mâo klei čang guôn yuôm bhăn, klei hdĭp mngăt kdlưn hĭn, jing klei lŏ mdơ̆ng ƀuôn doh jăk Aê Diê. Kyuadah ñu “jing pô Aê Diê khăp snăk” (êlan 23), snăn Khua Yang bi êdah, kah mbha hdră êlan prŏng prĭn Ñu kơ Y-Đaniel. Hdruôm hră Y-Amôs 3:7 kñăm: “Sĭt nik Aê Diê Yêhôwa amâo ngă sa mta klei ôh tơdah ñu amâo hưn klei hgăm Ñu kơ phung dĭng buăl Ñu, phung khua pô hưn êlâo” . Msĕ si sa čô mah jiăng sĭt suôr, Aê Diê bi êdah leh klei hgăm, klei ñu bi kčah hlăm hruê êdei anăp kơ khua pô hưn êlâo Y-Đaniel, leh anăn Ñu mơak bi êdah klei Ñu čiăng, hdră êlan Ñu kơ phung “Ñu khăp snăk” jing grăp čô drei yơh.
Si drei ngă čiăng mâo msĕ klei dlăng, klei căng guôn yuôm bhăn, klei hdĭp mngăt hŏng Khua Yang? Si ngă drei jing ding buăl, jing mah jiăng sĭt suôr Khua Yang mơ̆ amâodah ka?
Wah lač: Ơ Khua Yang, bi mni kơ Ih kyua Ih mơak kah mbha klei hgăm, bruă Ih srăng ngă hŏng phung dĭng buăl Ih. Akâo Ih đru kâo khăp blŭ hrăm, mđing hmư̆ asăp Ih grăp hruê.
Dlăng Klei Aê Diê Blŭ hlăm tlâo thŭn: Y‑Êsai 3:16 – 5:7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
