Khiavdim 32:9-14
Nqe cim:
“Thov Koj ua siab ntev thiab txo Koj txojkev chim, tsis txhob tso kev puastsuaj los rau Koj haivneeg” (Khiavdim 32:12b).
Lus nug rau sawvdaws xav:
- Mauxes thov Vajtswv pab tus Tswv haiv neeg li cas?
- Ntu Vajluskub no qhia peb paub txog yam dab tsi ntawm Vajtswv thiab ntawm Mauxes kev thov Vajtswv pab sawvdaws?
- Vajtswv xav kom peb thov Vajtswv pab rau leejtwg?
Vim haiv neeg Yixalayees nchuav mlom pe, thiab saib Vajtswv zoo li tej mlom, Vajtswv thiaj chim heev rau Nws haiv neeg. Mauxes paub hais tias Vajtswv haiv neeg yeej yuav raug txim kom puastsuaj, tiamsis tus Tswv cog lus rau Mauxes hais tias Nws yuav kom Mauxes ciaj ua ib haiv neeg tseemceeb (nqe 9-10). Thaum paub tej yam uas Vajtswv yuav ua rau Vajtswv haiv neeg, Mauxes txhawj txog nws haiv neeg, vim Mauxes twb pom Vajtswv ua rau haiv neeg Iziv lawm. Yog li ntawd, Mauxes thiaj tas siab thov Vajtswv txo Nws kev chim txhob rau txim rau Nws haiv neeg.
Paub tseeb Vajtswv haiv neeg twb ua txhaum loj kawg lawm, tsimnyog raug txim tuag vim Vajtswv yog tus ncaj ncees, Nws tsis xaiv leejtwg ntsej muag txawm yog Nws haiv neeg los xij. Tiamsis Mauxes xav txog Vajtswv dej siab hlub tshua, thiab kev ua ncaj ncees los taij thov Vajtswv pab nws haiv neeg kom dim dhau Vajtswv kev rau txim. Tim ib, Tus Tswv hlub Nws haiv neeg thiaj cawm lawv dim nram tebchaws Iziv los ua haiv neeg tseemceeb rau Nws (nqe 11). Tim ob, vim tsis xav kom tej tebchaws ib ncig thiab lub tebchaws Iziv thuam txog tus Tswv lub npe, hais tias; tus Tswv coj Nws haiv neeg mus tua tu noob rho hauv ntiajteb (nqe 12). Tim peb, yog tus Tswv hlub Mauxes thiab pub nws ciaj ua ib haiv neeg tseemceeb, ces tus Tswv rov nco txog tej lus uas tau cog tseg rau Anplahas, Ixaj thiab Yakhauj lawm, zam txim pub rau tus Tswv haiv neeg (nqe 13). Tus Tswv teb Mauxes tej lus thov thiab hloov siab tsis rau txim rau tus Tswv haiv neeg li hauv (nqe 14). Mauxes yog ib tug thawjcoj uas muaj lub siab zoo li tus Tswv lub. Txawm hais tias nws tsev neeg dim tsis raug kev puastsuaj tiamsis nws muaj lub siab txhawj txog tus Tswv haiv neeg, tsis xav txog tus kheej xwb, tus Tswv thiaj teb nws tej lus thov.
Puas yog Vajtswv tsis paub lossis tsis nco txog tej uas Mauxes taij thov? Vajtswv yeej paub zoo. Tus Tswv yeej tsis cheemtsum leejtwg ntuas Nws, lossis qhia Nws, tiamsis Vajtswv xav kom peb muaj lub siab thov Nws thiab Nws xav mloog peb tej lus thov sib pab. Txawm hais tias peb ua txhaum tawm tsam Vajtswv, tsimnyog Vajtswv rau txim kom puastsuaj mus, tiamsis Vajtswv yeej npaj nroos zam txim thiab yuav hloov peb dua tshiab los ntawm Nws nplooj siab hlub tshua uas loj kawg nkaus. Dhau ntawd, Tswv Yexus twb tuag txhiv peb txhua tus lub txim txhaum lawm, thiab nimno Nws tab tom thov Vajtswv pab peb cov uas ntseeg Nws. Vajtswv yuav zam peb sawvdaws lub txim txhaum thaum peb txhua tus paub tas siab thov Vajtswv sib pab.
Thov Vajtswv,
Ua Vajtswv tsaug uas Koj yog tus ncaj ncees, muaj kev hlub thiab Dawbhuv. Thov Koj pab kom nyuam yaus muaj lub siab ncaj ncees los cuag Koj. Thov Koj zam txim rau nyuam yaus thiab lwm tus thaum muaj neeg los thov txog Koj. Amees.
Peb puas nco thov Vajtswv pab rau peb cov kwvtij ntseeg txhua tus?
Nyeem Vajluskub hauv peb lub xyoo: Tej Lus Qhia 5:1-6:12
Kênh Youtube BHKTHN:
