Klei Aê Diê Blŭ: Klei Kbiă 32:9-14.
Êlan kliăng: “Lui bĕ klei Ih ngêñ hlơr leh anăn bi mlih klei mĭn Ih čiăng ngă jhat kơ phung ƀuôn sang Ih.” (Klei Kbiă 32:12b).
Klei êmuh ksiêm mĭn: Si Y‑Môis wah lač brei kơ phung ƀuôn sang Aê Diê leh anăn si klei tŭ? Ya klei trăn Klei Aê Diê Blŭ anei brei drei thâo kơ Aê Diê, Y‑Môis leh anăn klei wah lač brei? Kơ hlei pô Aê Diê čiăng drei wah lač brei hruê anei?
Kyua phung ƀuôn sang Israel tuh rup êmô mah, kkuh mpŭ kơ ñu leh anăn dlăng kơ Aê Diê msĕ hŏng rup yang, anăn Aê Diê ngêñ leh anăn brei Y‑Môis thâo Ñu srăng bi kmhal phung ƀuôn sang khăng kŏ leh anăn ƀai anei ƀiădah Aê Diê ƀuăn hŏng Y‑Môis srăng mjing mơ̆ng ñu sa găp djuê prŏng (êlan 9‑10). Leh thâo klei Aê Diê čiăng, Y‑Môis huĭ snăk kơ phung ƀuôn sang Israel kyua tuôm ƀuh leh Aê Diê bi kmhal phung ƀuôn sang Êjip kjham snăk! Ñu jih ai tiê wah lač brei kơ digơ̆, akâo kơ Aê Diê bi mlih klei ngêñ đăm bi kmhal ôh phung phung ƀuôn sang Ñu.
Klă sĭt phung ƀuôn sang Aê Diê ngă soh kjham, năng hŏng klei Aê Diê bi kmhal kyua Ñu jing Pô doh jăk leh anăn kpă ênô, Ñu amâo dlăng kah mbha hlei ôh wăt phung ƀuôn sang Ñu ruah. Ƀiădah Y‑Môis kƀĭn hlăm knuih klei khăp, klei pap leh anăn klei sĭt suôr Aê Diê čiăng wah lač brei kơ phung ƀuôn sang Ñu tlaih mơ̆ng klei bi kmhal kjham. Tal sa, Aê Diê mtă kơ phung ƀuôn sang Israel si ngă Ñu yua leh kngan myang ba diñu wĭt mơ̆ng čar Êjip, ruah diñu jing phung ƀuôn sang pioh hjăn kơ Aê Diê (êlan 11). Tal dua, kyua Anăn Ñu prŏng prĭn ti krah phung ƀuôn sang ti êngao, amâo brei kơ phung ƀuôn sang Êjip tlao mưč kơ Aê Diê ba leh phung ƀuôn sang Israel kbiă mơ̆ng čar diñu čiăng bi rai diñu hlăm lăn (êlan 12). Tal tlâo, tơdah Aê Diê khăp kơ ñu ƀuăn leh kơ gŏ sang ñu dưi hdĭp leh anăn jing sa phung ƀuôn sang lu, snăn ñu lŏ mñă wĭt klei khăp leh anăn klei Aê Diê ƀuăn leh hŏng Y‑Apbraham, Y‑Isăk leh anăn Israel ñu akâo Aê Diê pap brei kơ phung ƀuôn sang Aê Diê ruah (êlan 13) Yêhôwa Aê Diê hmư̆ asăp leh anăn bi mlih klei mĭn amâo lŏ ngă jhat ôh kơ phung ƀuôn sang msĕ si Ñu lač leh (êlan 14). Klă sĭt Y‑Môis jing khua gĭt gai ba klei mĭn Aê Diê. Hlăk êjai ñu leh anăn gŏ sang dưi tlaih klei truh tal anei, ƀiădah ñu khăp kơ phung ƀuôn sang Israel, ñu amâo knŏng mĭn kơ pô amâodah čiăng klei tŭ knŏng kơ hjăn pô ôh. Kyua anăn Aê Diê mơak leh anăn hmư̆ klei Y‑Môis wah lač.
Djŏ mơ̆ Aê Diê amâo thâo amâodah amâo hdơr ôh klei Y‑Môis akâo wah lač? Amâo djŏ ôh! Aê Diê amâo čiăng hlei pô lŏ mñă wĭt amâodah lač kơ Ñu ngă ya klei ƀiădah Ñu čiăng hmư̆ klei drei wah lač. Wăt tơdah drei ngă soh bi kdơ̆ng hŏng Aê Diê, năng hŏng klei bi kmhal hlăm klei Ñu ngêñ, ƀiădah Aê Diê pap brei leh anăn bi mrâo drei kyua klei khăp leh anăn klei pap Ñu êbeh dlai. Hĭn mơh, Khua Yang Yêsu tŭ leh klei bi kmhal djiê hrô kơ drei leh anăn Ñu dôk wah lač brei kơ phung ƀuôn sang Ñu. Aê Diê čiăng pap brei kơ drei leh anăn kơ pô mkăn sĭt drei jih ai tiê akâo wah lač kơ Ñu pap brei klei soh.
Drei hdơr wah lač kơ ayŏng amai adei hlăm Sang Aê Diê mơ̆?
Wah lač: Kâo bi mni lač jăk kơ Aê Diê kyua knuih doh jăk Ih mñă kơ kâo huĭ kơ klei soh. Kâo bi mni lač jăk kơ Ih kyua knuih klei khăp, klei pap Ih mñă kâo jhŏng nao kơ Khua Yang, akâo kơ Ih pap brei sĭt kâo amâodah ayŏng amai adei kâo ngă soh hŏng Ih.
Dlăng Klei Aê Diê Blŭ hlăm tlâo thŭn: Khua Pô Mtô 5:1‑20; 6:1‑12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
