Khiavdim 31:12-17
Nqe cim:
“Nej yuav tsum muab kuv hnub Xanpataus ua hnub so, rau qhov hnub ntawd yog lub cim rau nej thiab kuv mus ibtxhis, thiab qhia kom nej paub hais tias kuv yog nej tus TSWV, tus uas xaiv nej los ua kuv haivneeg” (Khiavdim 31:13).
Lus nug rau sawvdaws xav:
- So hnub Xanpataus muaj lub ntsiab licas rau cov Yixalayees?
- So hnub Xanpataus ua dabtsi?
- Cov ntseeg niaj hnub nimno so hnub Xanpataus licas?
Ua lub Tsevntaub yog ib teg haujlwm uas poob ntau sijhawm thiab dag zog. Txawm tus Tswv paub hais tias, Nws haivneeg muaj ntau haujlwm yuav ua, los nws tseem qhia kom lawv yuav tsum saib hnub Xanpataus ua hnub dawbhuv. Qhov uas so hnub Xanpataus tseemceeb heev rau cov Yixalayees, ntawd yog lub cim kom lwm haivneeg paub hais tias lawv yog tus Tswv haivneeg uas dawbhuv (nqe 13). Leejtwg tsis so hnub Xanpataus yuav raug txim tuag. Cov Yixalayees yuav tsum hwm hnub Xanpataus zoo li ib txojkev cogtseg ntawm Vajtswv thiab lawv mus ibtxhis. Lawv yuav ua haujlwm rau hnub thiab so hnub xya zoo li tus Tswv tsim lub ntuj, lub ntiajteb thiab txhua tsav yam rau hnub thiab hnub xya Nws so.
Tus Tswv cia Nws haivneeg xyaum 40 xyoo ua haujlwm thiab so raws caijnyoog hauv tiaj nrag suabpuam. Tus Tswv pub rau lawv muaj mov noj, tiamsis Nws tsis cia manas nyob tsheej pawg rau lawv yoojyim khaws. Manas poob saum ntuj los rau hauv av thaum yuav pom kev, thiab yuav yaj thaum hnub tawm tuaj. Manas yuav piam yog tso nyob dhau hnub; tiamsis yog hnub rau khaws ntau dua tseg rau hnub xya ces manas tsis piam. Tus Tswv haivneeg txij tus laus los rau tus hluas yuav tsum sawv ntxov mus khaws manas rau hnub, tiamsis hnub xya lawv yuav tsum so. Yog li ntawd, lawv thiaj tau so kom rov muaj zog thiab muaj sijhawm los nco txog tej uas tus Tswv tau ua pab lawv. Qhov uas hwm hnub Xanpataus kuj yog qhia tshwm kev mloog tus Tswv lus thiab kev ntseeg hais tias tus Tsvw yuav pub txhua yam txaus nkaus rau lawv.
Lub homphiaj tus Tswv tsim tibneeg, yog los tswjkav txhua yam uas Nws tsim tau, txais yuav tej uas Nws pub, thiab tshwjxeeb yog sib raug zoo nrog Nws. Yog tsis muaj hnub so, peb yuav tsis ua neej raws tus Tswv lub homphiaj lawm, lub neej yuav tsis muaj qabhau thiab yim hnub yim txav deb tus Tswv lawm xwb. Tiamsis, nyob rau tiam niaj hnub nimno, yuav so ib hnub tsis yog yoojyim rau qee leej. Yuav kom ua tau qhov no, peb yuav tsum cia tus Tswv ntaus thawj hauv lubneej thiab ntshaw ua raws Nws lub siabnyiam.
Niaj hnub nimno, cov ntseeg tsis so hnub Xanpataus nruj li cov Yixalayees thaum ub lawm, tiamsis yuav tsum coj raws li ntsiab ntawm hnub Xanpataus. Peb so haujlwm thiab pehawm tus Tswv rau Hnub Ib, yog hnub uas Tswv Yexus sawv; ntawd yog sijhawm so thiab siv los sib raug zoo nrog tus Tswv, nrog tsevneeg thiab cov kwvtij ntseeg.
Peb puas so Hnub So raws li tus Tswv siabnyiam lawm tau?
Vajtswv, thov ua Koj tsaug, vim Koj pub nyuam yaus muaj ib hnub so kom nyuam yaus tau los pehawm Koj, nco Koj txiaj ntsig thiab tau txais koj tej zaub mov yug sab ntsujplig. Thov ua Koj tsaug, vim Koj txoj kevcai pab nyuam yaus nyob ze Koj, ua neej muaj qabhau thiab muaj kev kaj siab. Amees.
Nyeem Vajluskub hauv peb lub xyoos: Pajlug 3
Kênh Youtube BHKTHN:
