Tes Haujlwm 2:42-47
Nqe cim:
“Lawv niaj hnub tuaj kawm tej uas cov timthawj qhia, lawv sib hlub sib pab, lawv koom noj Yexus rooj mov thiab thov Vajtswv ua ke” (nqe 42).
Lus nug rau sawvdaws xav:
– Cov ntseeg Yexus hauv Pawg Ntseeg chiv thawj muaj kev koom licas?
– Lawv ceev rawv txojkev sib koom zoo licas?
– Nuj nqis ntawm qhov uas lawv sib koom yog dabtsi?
– Koj cheemtsum ua dabtsi kom muaj txojkev sib koom tau nyob hauv Pawg Ntseeg?
Peb muaj cuab kav hais tau hais tias ntu Vajluskub no yog ib tug qauv rau cov Pawg Ntseeg kev sib koom. Lukas sau tseg qhov kev sib koom ntawm cov ntseeg Yexus thaum chivthawj yog ib qhov uas zoo kawg nkaus. Lawv hwm tus Tswv, ncaj ncees rau txojkev pehawm, nyiam kawm Vajtswv Txojlus, ua raws nraim li cov timthawj tej lus qhia, sib hlub sib pab, ua rau tus Tswv tau ntsejmuag thiab ua qauv zoo rau lwm tus xyaum.
Ib qho kev zoo uas Pawg Ntseeg chiv thawj muaj yog kev sib koom nyob hauv Pawg Ntseeg. Nyob hauv qhov kev sib koom ntawd, lawv koom noj Yexus rooj mov sib qhia kom nco ntsoov tus Tswv Yexus txojkev tuag txhiv, koom ua ke thov Vajtswv. Txojkev sib koom qhia tawm los ntawm kev koom ua ib lub siab hauv Pawg Ntseeg. Cov ntseeg nyob hauv Pawg Ntseeg chiv thawj muaj “kev koom siab koom ntsws” ib leeg txhawj txog ib leeg tej kev cheemtsum thiab ua qhia tshwm los ntawm qhov “lawv muab lawv tej av thiab tej khoom uas yog lawv tug; muag, thiab muab tej nyiaj ntawd faib rau txhua tus raws li tus uas muaj chaw siv. Lawv niaj hnub mus pehawm Vajtswv hauv lub Tuamtsev, thiab lawv noj Yexus rooj mov thiab noj mov ua ke hauv lawv tej tsev ib lub dhau ib lub, txawm yog muaj ntau muaj tsawg los lawv sawvdaws zoo siab noj. Lawv ua Vajtswv tsaug tsis tseg tsis tu, thiab tej neeg sawvdaws puavleej hwm lawv” (nqe 45-47). Tseeb tiag, ntawm no yog ib daim duab zoo nkauj heev hais txog txojkev sib koom ntawm cov kwvtij koom ntseeg tib tug Tswv nyob hauv Pawg Ntseeg!
Vim yog lawv qhov kev sib koom thiab lub siab ncaj ncees, txhua hnub muaj ntau leej los ntseeg ntxiv coob zuj zus rau hauv Pawg Ntseeg (nqe 47). Yog hais tias Vajtswv cov menyuam hauv cov Pawg Ntseeg nimno muaj kev koom tau zoo ib yam li cov ntseeg thaum chivthawj ces ntseeg siab hais tias yuav qhia tau thiab coj tau ntau leej los ntseeg ntxiv rau hauv Vajtswv Pawg Ntseeg. Tiamsis tu siab ntau muaj ntau lub Pawg Ntseeg tawg ua pab ua pawg vim yog tej kev tsis sib haum nyob hauv cov ntseeg thiab xibhwb, lossis cov ntseeg thiab cov ntseeg ua ke. Yuav ua licas cawm tau lwm tus yog hais tias peb txojkev sib koom hauv Pawg Ntseeg tsis zoo?
Cia kom ceev tau txojkev koom ua ib lub siab, txhua tus ntseeg Yexus yuav tsum kawm xyaum cov ntseeg thaum chivthawj tus qauv: rau siab ntso ua raws li Vajtswv Txojlus, thov Vajtswv ua ke, hwm tus Tswv, hmov tshua txog lwm tus qhov kev cheemtsum thiab txaus siab hlo faib pub rau luag. Txhua tus uas yog Vajtswv cov menyuam yuav tsum ua raws li Timthawj Paulus tej lus qhia:“Nej tsis txhob ua ib yam dabtsi kom zoo rau nej lossis kom neeg qhuas nej xwb; tiamsis nej yuav tsum txo hwjchim thiab ib tug tsis txhob khav hais tias ib tug zoo dua ib tug. Nej tsis txhob xav txog nej xwb, tiamsis nej yuav tsum xav txog lwm tus thiab” (Filipis 2:3-4).
Koj puas tseem tabtom siv zog ua kom muaj txojkev sib raug zoo nrog cov kwvtij vivncaus ntseeg Yexus nyob hauv Pawg Ntseeg thiab?
Thov Vajtswv,
Tus Tswv, thov Koj qhia rau nyuam yaus paub ua kom muaj txojkev sib raug zoo nrog cov kwvtij vivncaus nyob hauv Pawg Ntseeg, thiaj yuav ua tau qauv zoo rau lwm tus pom thiab coj tau lawv los cuag Koj. Amees.
Nyeem Vajluskub hauv peb lub xyoo: Phau Ntawv Nkauj 51
Tshooj Youtube BHKTHN: https://www.youtube.com/c/bhkthn
