Klei Aê Diê Blŭ: Bruă Phung Khua Ƀĭng Kna 2:42-47
Êlan kliăng: “Diñu gĭr hlăm klei hriăm klei phung khua ƀĭng kna mtô, hlăm klei bi mguôp, hlăm klei kjoh kpŭng, leh anăn hlăm klei wah lač.” (Bruă Phung Khua Ƀĭng Kna 2:42).
Klei êmuh ksiêm mĭn: Si hdră hdĭp phung đăo hlăm Phung Sang Aê Diê tal êlâo hĭn? Si diñu djă pioh klei bi mguôp? Ya boh tŭ dưn mâo mơ̆ng klei diñu dôk sĭt suôr? Si drei ngă čiăng djă pioh klei bi mguôp hdơ̆ng găp hlăm Phung Sang Aê Diê?
Dưi lač, trăn Klei Aê Diê Blŭ anei jing jar bi hmô hdră hdĭp kơ Phung Sang Aê Diê. Aê êa drao Y‑Luk hưn mdah leh hdră hdĭp khăng ngă hlăm phung đăo Sang Aê Diê tal êlâo hĭn jing tloh ênoh êdi. Diñu huĭ mpŭ kơ Aê Diê, sĭt suôr hlăm klei bi kƀĭn, khăp kơ Klei Aê Diê Blŭ, jih ai tiê djă pioh klei phung khua ƀĭng kna mtô, thâo bi khăp bi đru hdơ̆ng găp, bi guh kơang kơ Anăn Aê Diê leh anăn ba klei jăk mơak truh kơ lu mnuih.
Sa hlăm lu mta klei êdah kdlưn hĭn hlăm phung đăo Sang Aê Diê tal êlâo jing klei djă pioh klei bi mguôp jăk siam hlăm Phung Sang Aê Diê. Hlăm klei bi khăp bi mguôp anăn, diñu sa ai bi mguôp mbĭt hlăm klei kjoh kpŭng čiăng bi mñă hdơ̆ng găp kơ klei Khua Yang Yêsu săn asei mlei, leh anăn wah lač brei kơ hdơ̆ng găp. Klei bi mguôp jăk siam bi êdah hŏng klei sa ai hlăm Phung Sang Aê Diê. Phung đăo hlăm Sang Aê Diê tal êlâo “mâo ai tiê klei mĭn bi djŏ guôp” sa ai tiê mđing uêñ kơ klei kƀah hdơ̆ng găp leh anăn bi êdah hŏng bruă “čhĭ lăn hma, ngăn drăp diñu, leh anăn bi mbha dŏ anăn kơ jih jang tui si grăp čô kƀah. Grăp hruê diñu bi kƀĭn hlăm sang kkuh mpŭ, leh anăn kjoh kpŭng hlăm sang diñu pô, hŏng ai tiê hơ̆k mơak leh anăn luă gŭ, bi mni kơ Aê Diê leh anăn bi mơak kơ jih jang phung ƀuôn sang” (êlan 45-47). Sĭt yơh anei jing sa pŏk rup siam êdimi kơ klei bi mguôp ti krah phung ayŏng adei sa klei đăo hlăm Phung Sang Aê Diê!
Mơ̆ng klei bi mguôp leh anăn klei diñu dôk sĭt suôr snăn grăp hruê lŏ thiăm lu mnuih mâo klei bi mtlaih mŭt hlăm Phung Sang Aê Diê (êlan 47). Tơdah phung anak Aê Diê hlăm Phung Sang Aê Diê hruê anei dưi djă pioh klei bi mguôp jăk siam msĕ si phung đăo hlăm Phung Sang Aê Diê tal êlâo, sĭt nik ăt srăng dưi hrip ba thiăm lu mnuih mŭt hlăm Phung Sang Aê Diê. Ƀiădah jing klei ênguôt êdi tơdah mâo lu Phung Sang Aê Diê ruh ram kyua klei bi mneh msao ti krah phung anak ƀuôn sang Aê Diê hŏng khua pô mtô amâodah mklăk wĭt, amâodah ti krah hdơ̆ng phung đăo. Si drei dưi bi mtlaih mnuih tơdah amâo mâo ôh klei bi mguôp jăk siam hlăm Phung Sang Aê Diê?
Čiăng dưi djă pioh klei bi mguôp sa ai, grăp čô phung đăo brei tui hriăm klei bi hmô mơ̆ng phung đăo tal êlâo: knŏng djă pioh Klei Aê Diê Blŭ, wah lač hŏng jih ai tiê, huĭ mpŭ kơ Aê Diê, uêñ mĭn kơ klei kƀah hdơ̆ng găp leh anăn kăp kah mbha. Grăp čô anak ƀuôn sang Aê Diê brei ngă tui hlue klei khua ƀĭng kna Y‑Pôl mtô: “Đăm ngă ôh sa mta klei hŏng klei mĭn kơ pô amâodah hŏng klei mgao, ƀiădah hŏng klei luă gŭ brei diih yap phung mkăn jing prŏng hĭn kơ diih pô. Brei grăp čô hlăm phung diih đăm mĭn kơ klei tŭ dưn knŏng kơ ñu pô ôh, ƀiădah mĭn wăt kơ klei tŭ dưn kơ phung mkăn msĕ mơh ” (Philip 2:3-4).
Si ngă drei jih ai tiê dôk răng kriê klei bi mguôp jăk siam hŏng ayŏng amai adei drei hlăm Phung Sang Aê Diê mơ̆?
Wah lač: Ơ Khua Yang, akâo kơ Ih mñă kơ kâo pô brei thâo răng kriê klei bi mguôp hŏng ayŏng amai adei hlăm Phung Sang Aê Diê čiăng kơ mơ̆ng klei anăn dưi ba klei mơak kơ pô mkăn leh anăn đru diñu mâo mmông myun hriê kơ Ih.
Dlăng Klei Aê Diê Blŭ hlăm tlâo thŭn: Klei Mmuñ Hđăp 51:1-19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
