Klei Aê Diê Blŭ: Y‑Mathiơ 9:35
Êlan kliăng: “Yêsu hiu hlăm jih jang ƀuôn prŏng ƀuôn điêt, bi hriăm hlăm sang bi kƀĭn…”(Y‑Mathiơ 9:35a).
Klei êmuh ksiêm mĭn: Ya klei yuôm bhăn jing Khua Yang Yêsu hiu hlăm jih jang ƀuôn prŏng ƀuôn điêt? Ya klei yuôm bhăn Ñu bi hriăm hlăm sang bi kƀĭn? Si drei ngă bruă msĕ si Khua Yang Yêsu “hiu hlăm jih jang ƀuôn prŏng ƀuôn điêt, bi hriăm hlăm sang bi kƀĭn” hlăm ênuk anei?
Leh čih lu klei myang Khua Yang Yêsu ngă leh hlăm kdrêč 9, Khua ƀĭng kna Y‑Mathiơ mâo klei klah čŭn đŭt kơ bruă Khua Yang Yêsu ngă ti Galilê hlăm êlan 35. Mơ̆ng anăn drei ƀuh klă dŭm bruă Khua Yang Yêsu ngă leh ti krĭng Galilê.
Tal sa, Khua Yang Yêsu “hiu hlăm jih jang ƀuôn prŏng ƀuôn điêt” hlăm krĭng Galiê. Hluê si pô ksiêm hriăm kơ hƀuê ênuk Josephus, mnuih Yuđa, snăn Galiliê jing sa krĭntg lăn prŏng hŏng lu ƀuôn sang leh anăn ƀuôn prŏng, hnơ̆ng mnuih ƀuôn sang dôk lu, đaŏ tĭng ƀiă êdi hlăm brô tlâo êklăk čô mnuih. Khua ƀĭng kna Y‑Mathiơ čih Khua Yang “hiu hlăm jih jang ƀuôn prŏng ƀuôn điêt” jing Ñu amâo lui ôh bruă mtô mblang Klei Mrâo Mrang Jăk Aê Diê kơ sa ƀuôn điêt ôh hlăm krĭng lăn anei.
Tal dua, Khua Yang Yêsu “bi hriăm hlăm sang bi kƀĭn”. Hlăm ênuk Khua Yang Yêsu, Sang bi kƀĭn phung Yuđa mâo lu snăk. Sĭt lač Khua Yang “bi hriăm” jing Ñu nao hlăm mông bi kƀĭn hlăm Sang bi kƀĭn ti dŭm anôk Ñu nao, kyua phung ƀuôn sang thâo Khua Yang Yêsu jing sa čô Rabi anăn srăng brei Ñu dlăng klei Aê Diê Blŭ leh anăn mblang kơ diñu thâo săng (Y‑Luk 4:16-21). Wăt tơdah bruă Ñu ngă hlăm dŭm hruê hdĭp ti lăn ala lu snăk ƀiădah Khua Yang ăt bi hmô “…hdơr kơ hruê sabat čiăng pioh gơ̆ jing doh jăk” (Klei Kbiă 20:8). Khua Yang Yêsu amâo lač kơ ya mta čiăng amâo nao ôh ti Sang bi kƀĭn hlăm hruê Saƀat, Ñu ba yua djăp mông găl nao kơ Sang bi kƀĭn čiăng dưi dlăng Klei Aê Diê Blŭ leh anăn bi hriăm lu mnuih thâo kơ hdră Aê Diê bi tui. Khua Yang Yêsu ba yua jih klei găl leh anăn hruê mông Ñu mâo ti lăn ala anei čiăng hưn kơ lu mnuih.
Hruê anei, sĭt tlă anăp hŏng lu mta klei hlăm klei hdĭp drei khăng lač kyua “lu đei bruă”, “êmăn đei”, “luč lu hruê mông đei”… snăn amâo dưi nao hriăm ôh klei hriăm Klei Aê Diê Blŭ hlăm aguah knăm kjuh, mông kkuh mpŭ mơ̆ng dŭm êpul, amâodah amâo pioh ôh mnĭt mông dlăng leh anăn hriăm Klei Aê Diê Blŭ hjăn pô. Amâodah năng ai drei hưn ktưn kơ Sang Aê Diê pô kơ kdrăp mnơ̆ng, prŏng siam… ƀiădah drei amâo hiu duah ôh phung ka tuôm hmư̆ Klei Mrâo Mrang Jăk. Lu blư̆ Klei Mrâo Mrang jăk Aê Diê knŏng dôk hlăm Sang Aê Diê, drei dôk guôn pô mkăn nao ti Sang Aê Diê ka mâo ôh hdră ba “Sang Aê Diê” truh kơ pô mkăn. Khua Yang Yêsu thâo Ñu knŏng mâo sa wưng dôk ti lăn anăn Ñu ba yua jih mông anăn, drei ăt knŏng mâo sa wưng bhiâo ti lăn ala, brei drei tui hlue Khua Yang Yêsu ba yua jih hruê mông čiăng hdĭp tŭ dưn leh anăn đru lu mnuih thâo kral Khua Yang.
Phung đaŏ kơ Krist jing phung jing dŏ Krist, drei hlăk mâo bruă ngă msĕ si Krist mơ̆?
Wah lač: Ơ Khua Yang, akâo kơ Ih đru kâo hdơr hruê hdĭp ti lăn kâo mâo knŏng bhiâo. Akâo Ih đru kâo dưi hŏng klei mplư “lu đei bruă” čiăng amâo lăm lui ôh klei găl kkuh mpŭ leh anăn hiu hưn Klei Mrâo Mrang Jăk kơ pô mkăn.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y‑Nêhêmi 9:19-37
Kênh Youtube BHKTHN:
