Mathais 9:35
Nqe cim:
“Yexus mus txhua nrho hauv tej nroog thiab hauv tej zos. Nws qhuab qhia hauv tej tsev sablaj…” (Mathais 9:35a).
Lus nug rau sawvdaws xav:
- Tswv Yexus mus txhua nrho hauv tej nroog tej zos ua dab tsi?
- Yexus qhia hauv tej tsev sablaj xav qhia txog dab tsi?
- Nimno peb ua li Tswv Yexus “mus txhua nrho tej nroog, tej zos, tej tsev sablaj” zoo licas?
Ib tsoom cov mloog txhua tus,
Tom qab uas sau hais txog ntau yam txujci tseemceeb Tswv Yexus ua hauv tshooj 9, Timthawj Mathais sau zog txog tes haujlwm Tswv Yexus ua ntawm lub xeev Kalilais hauv nqe 35. Los ntawm qhov ntawd qhia peb paub meej txog tej haujlwm uas Tswv Yexus tau ua nyob hauv xeev Kalilais li no:
Tim ib, Tswv Yexus “mus txhua nrho hauv tej nroog thiab hauv tej zos” hauv cheebtsam Kalilais. Raws li tus sau keebkwm Josephus uas yog ib tug neeg Yudais sau tseg, Kalilais yog ib cheebtsam av dav muaj ntau lub zos thiab nroog, muaj tibneeg nyob coob heev, coob kwvlam li peb lab (peb caug pua txhiab) tus tibneeg. Timthawj Mathais sau hais tias “Yexus mus txhua nrho hauv tej nroog thiab hauv tej zos”, txhais tau hais tias Nws mus qhia Txojmoo Zoo uas hais txog Vajtswv lub Tebchaws txhua nrho tej zos loj zos me hauv cheebtsam Kalilais huv tibsi.
Tim ob, Tswv Yexus “qhuab qhia hauv tej tsev sablaj”. Tiam Tswv Yexus nyob, cov neeg Yudais muaj tsev sablaj ntau heev. Thaum hais txog Tswv Yexus “qhuab qhia” txhais tau hais tias yog Nws mus pehawm hauv tej tsev sablaj uas Nws mus txog, vim tej neeg sawvdaws paub hais tias, Tswv Yexus yog ib tug Xibhwb uas paub qhia Vajtswv txoj kevcai, yog li ntawd lawv caw Nws nyeem Vajtswv Txojlus thiab txhais lub ntsiab rau sawvdaws mloog (Lukas 4:16-21). Txawm thaum nyob hauv ntiajteb no muaj haujlwm ntau ua tsis yeej los, tus Tswv tseem ua qauv zoo “nco ntsoov hnub Xanpataus ua hnub tseemceeb” (Khiavdim 20:8). Tswv Yexus tsis vim kev tab kaum haujlwm ntawm kev mus pehawm hauv tej tsev sablaj ntawm hnub Xanpataus. Yexus qee zias txhua lub sijhawm mus hauv tej tsev sablaj nyeem Vajtswv Txojlus thiab qhia kom lwm tus paub Vajtswv txojkev cawm dim. Tswv Yexus siv txhua lub sijhawm, caijnyoog thaum tseem nyob hauv ntiajteb no mus qhia rau ntau tus tibneeg.
Nimno, thaum peb ntsib ntau yam kev nyuaj hauv lub neej xws li “tsis xyeej”, “nkees tsis xis nyob”, “tsis muaj sijhawm” … peb mus koom tsis tau kev kawm Vajluskub, kev pehawm Vajtswv hauv hnubkaj, lossis tus kheej siv tsis tau sijhawm los nyeem thiab kawm Vajluskub…Tej zaum peb tsuas txaus siab rau lub tuamtsev peb mus koom, tej cuabyeej nyob hauv tuam tsev … tiamsis peb ho tsis tawm mus qhia cov neeg uas tsis tau hnov txog Txojmoo Zoo. Ntau zaus Tswv Yexus Txojmoo Zoo tsuas qhia hauv Tuamtsev nkaus xwb, peb tsuas tos luag tuaj hauv Tuamtsev xwb tsis muaj kev npaj coj “Tuamtsev” mus rau lwm tus. Tswv Yexus paub Nws lub caijnyoog nyob hauv ntiajteb no, Yexus siv lub caijnyoog ntawd ua haujlwm muaj nqis, peb kuj muaj ib lub caijnyoog luv luv nyob hauv ntiajteb no, cia li xyaum Tswv Yexus tus qauv siv lub caijnyoog ua neej kom muaj nqis thiab pab kom ntau leej paub txog tus Tswv.
Thov Vajtswv,
Tus Tswv, thov Koj qhia nyuam yaus paub hais tias nyuam yaus lub neej nyob ntiajteb luv kawg li. Thov Koj pab kom nyuam yaus kovyeej tej kev sim siab uas pheej hais tias “tsis xyeej”, kom nyuam yaus paub siv txhua lub sijhawm los pehawm Vajtswv thiab qhia Txojmoo Zoo rau txhua tus tibneeg. Amees.
Ib tsoom cov mloog uas hmov thiab tshua,
Cov ntseeg Yexus yog Yexus Khetos tus neeg, peb puas tabtom ua zoo li Yexus Khetos ua?
Nyeem Vajluskub hauv peb lub xyoo: Nehemis 9:19-37
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
