Klei Aê Diê Blŭ: I Klei Yăl Dliê 14:8-17
Êlan kliăng: “Ƀiădah brei diih duah êlâo hĭn ƀuôn ala mtao Aê Diê leh anăn klei kpă ênô Ñu, leh anăn Ñu srăng thiăm brei kơ diih jih jang mnơ̆ng anăn” (Y‑Mathiơ 6:33).
Klei êmuh ksiêm mĭn: Ya ngă phung Philistin ksŭng hriê bi blah phung ƀuôn sang Israel? Ya bruă mtao Y‑Đawit ngă êlâo hĭn? Ya klei mtao lač tơdah leh bi blah dưi? Ya klei mtao Y‑Đawit ngă hlăk phung roh lŏ ksŭng bi blah tal dua? Si boh tŭ dưn mâo? Ya klei drei hriăm mơ̆ng rup Y‑Đawit bi hmô kơ klei wah lač?
Tơdah phung Philistin hmư̆ kơ mtao Y‑Đawit jing mtao kiă kriê jih jang phung Israel, phung Philistin thâo kral anei jing pô roh diñu snăn diñu ksŭng nao bi blah. Hlăk phung kahan Philistin hriê čiăng plah mă dŏ dô hlăm tlung Rêphaim, bruă tal êlâo hĭn mtao Y‑Đawit ngă jing “êmuh kơ Aê Diê” êlâo kơ čuăn si ngă nao bi blah hŏng Philistin amâodah hơăi? Yêhôwa wĭt lač kơ ñu, nao bi blah yơh kyuadah Ñu srăng jao phung Philistin hlăm kngan ñu (êlan 9-10). leh anăn mtao Y‑Đawit bi blah dưi hŏng phung Philistin. Wăt tơah snăn dưn ñu amâo mâo mgao leh anăn mmiă klei dưi kơ ñu pô ôh, ñu lač klă: “Aê Diê bi rai leh phung roh kâo hŏng kngan kâo” (êlan 11).
Wăt tơdah êjai dôk jing mtao “kiă kriê jih jang phung Israel” hŏng klei dưi leh anăn hŏng phung kahan jhŏng ktang hlăm kngan, mtao Y‑Đawit amâo tuôm knang kơ klei ktang ñu pô amâodah klei ktang mnuih ôh, ƀiădah ñu thâo săng bruă brei ngă êlâo hĭn jing “êmuh kơ Aê Diê”. Klei ñu ngă êlâo hĭn kơ jih jang jing hriê kơ Khua Yang êlâo, tui duah klei ktrâo atăt mơ̆ng Ñu kyuadah ñu đăo knang kơ Khua Yang kluôm dhuôm. Klă sĭt Aê Diê mơak snăk kơ klei anei leh anăn Ñu bi sĭt jih ya klei Ñu lač leh hŏng mtao Y‑Đawit.
Wăt tơdah Y‑Đawit bi blah phung Philistin rai msĕ si êa lip, ƀiădah diñu ăt khăng kŏ amâo kdŭn lui ôh, diñu lŏ nao plah mă hlăm tlung čiăng arưp aram phung Israel (êlan 13). Wăt tơdah sa blư̆ hơ̆k mơak bi blah dưi leh, mtao Y‑Đawit srăng ƀuh djŏ ai ñu leh anăn hmăr mtam nao bi blah hŏng phung Philistin. Ƀiădah hơăi, hŏng knhuah hdĭp kpĭ mjuăt ñu pô hlăm klei wah lač, ñu ăt ngă msĕ si tal êlâo mơh, ñu lŏ hriê “êmuh kơ Aê Diê” sa blư̆ dơ̆ng (êlan 14). Tal anei, Aê Diê ktrâo atăt ñu klă klơ̆ng si klei mprăp kăp bi blah hŏng phung Philistin leh anăn mtao Y‑Đawit gưt ngă kluôm dhuôm tui si klei Aê Diê mtă, wăt tơdah hdră êlan tal anei mdê hĭn hŏng hdră êlan tal êlâo (êlan 15-16). Lŏ sa blư̆, Aê Diê brei mtao Y‑Đawit bi knal klei bi blah dưi tơdah ñu đăo knang leh anăn gưt kơ klei Aê Diê mtă. Klei hing ang Y‑Đawit arăng hmư̆ tar ƀar čar (êlan 17).
Jing sa čô mtao mưng leh mŭt kbiă djiê hdĭp hlăm kdrăn blah, boh nik ară anei, hĭn êjai lŏ mâo phung kahan lu jhŏng ktang hlăm kngan ñu, ƀiădah mtao Y‑Đawit ăt êmuh kơ Aê Diê nanao êlâo kơ ñu čuăn ngă kyuadah ñu đăo knang kơ Aê Diê leh anăn dưm Khua Yang jing mrô sa. Jing klei năng ênguôt êdi kơ phung đăo hruê anei knŏng hriê kơ Khua Yang tơdah duah jih leh amâo lŏ mâo êlan êghaih mkra mkăn ôh. Tui hlue rup bi hmô mtao Y‑Đawit, brei drei êran hriê kơ Khua Yang leh anăn êmuh Ñu êlâo kơ drei čuăn ngă ya mta bruă. Klei anăn jing ai tiê klei mĭn kpĭ mjuăt pô hlăm klei wah lač grăp čô phung đăo.
Si ngă drei tui duah Khua Yang leh anăn êmuh Ñu êlâo hĭn kơ jih jang klei mơ̆?
Wah lač: Ơ Khua Yang, akâo kơ Ih đru kâo kpĭ mjuăt klei hdĭp mngăt hlăm klei wah lač, êlâo hĭn kơ jih jang klei tui duah Ih pô leh anăn mđing hmư̆ klei Ih ktrâo atăt hlăm djăp mta bruă điêt prŏng hlăm klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 20:1-30
Kênh Youtube BHKTHN:
