I-Xwmntxeej Vajntswv 14:8-17
Nqe cim:
“Tiamsis nej yuav tsum xub nrhiav Vajtswv lub Tebchaws thiab ua raws li Vajtswv lub siab nyiam tso, Vajtswv mam muab tej no ntxiv rau nej” (Mathais 6:33).
Lus nug rau sawvdaws xav:
- Vim li cas cov neeg Filitees tuaj tua cov neeg Yudas? Thaum ntawd vajntxwv Daviv ua li cas?
- Tom qab yeej tsam lawm, vajntxwv Daviv hais li cas?
- Vajntxwv Daviv ua li cas thaum nws rov raug cov Filitees rov tuaj tua zaum ob? Thiab xaus zoo li cas?
- Peb kawm tau yam dab tsi ntawm Daviv txog kev thov Vajtswv?
Tom qab hnov xav hais tias Daviv ua cov Yixalayees tus vajntxwv lawm, cov neeg Filitees txawm tuaj puav haiv neeg Yudas tua. Thaum cov Filitees tuaj fuab noj fuab haus txog hauv lub hav Lefayees, tes haujlwm uas Daviv xub ua yog; “nug Vajtswv” ua ntej saib puas tsimnyog mus tua cov Filitees? Vajtswv teb Daviv thiab kom nws cia li mus tua, vim tus Tswv twb mus tua ua ntej lawm (nqe 9-10). Daviv tau mus tua yeej cov Filitees lawm tiag, tiamsis Daviv tsis rov qhuas hais tias yog nws mus tua yeej rog, nws hais tias; “Vajtswv tau siv kuv ob txhais tes tsoo cov yeebncuab tawg ri sua mus ib yam li dej kuav” (nqe 11).
Txawm nyuam qhuav sawv ua “cov Yixalayees tus vajntxwv” muaj fwjchim thiab tubrog nyob haus nws tes, tiamsis vajntxwv tsis vamkhom txog tej uas nws muaj, nws zeem paub meej txog yam yuav tsum ua yog, “mus nug Vajtswv”. Qhov uas Daviv ntshaw tshaj plaws yog mus cuag Vajtswv, thov tus Tswv taw qhia coj nws txoj haukev, vim nws tso siab plhuav rau tus Tswv. Paub tseeb hais tias tus Tswv txaus siab rau qhov uas Daviv ua ntawd thiab ua tiav tej uas tus Tswv tau hais rau Daviv lawm.
Txawm hais tias cov Filitees twb swb Daviv lawm los lawv tsis tau ris siab, lawv tseem fuab noj fuab haus hauv lub hav Lefiyees tuav twv cov Yixalayees (nqe 13). Txawm Daviv nyuam qhuav ntaus yeej tsam, nws txaus peevxwm txhij tubrog mus tua cov Filitees, tiamsis nws tsis ua li ntawd; nws kuj mus cuag Vajtswv li zaum xub thawj uas yog “nug Vajtswv” (nqe 14). Zaum no, Vajtswv taw qhia meej yam uas Daviv yuav tsum ua thiab Daviv ua raws nraim li uas Vajtswv qhia rau nws lawm, txawm ua li Vajtswv qhia tsis thooj li nws xav los xij (nqe 15-16). Ib zaug ntxiv uas Vajtswv pub rau vajntxwv Daviv muaj yeej loj heev thaum nws tso siab plhuav rau tus Tswv thiab ua raws li tus Tswv hais. Tom qab ntawd Daviv lub npe tau nrov ncha moo lug mus rau txhua qhov (nqe 17).
Yog ib tug vajntxwv uas muaj yeej thiab dim kev tuag ntau zaug hauv tshav rog los lawm, thiab ncua sijhawm ntawd Daviv tab tom muaj ib pab tub rog muaj zog hauv tes, tiamsis Daviv yeej mus cuag Vajtswv, nug kom tus Tswv qhia yam yuav tsum ua thiab tso siab plhuav rau tus Tswv los ntawm ua raws li tus Tswv hais. Ib qhov txaus tu siab uas cov ntseeg nimno muaj ntau tus mus nrhiav kev pab kawg kev lawm thiaj los cuag tus Tswv. Xyaum raws vajntxwv Daviv tus qauv zoo, ntawm kev mus cuag Vajtswv thiab thov tus Tswv qhia yus ua ntej yuav ua ib yam dab tsi. Yog peb xyaum tau li ntawd, ces peb tab tom yog ib tus ntseeg uas yoog tau tus cai hauv kev thov Vajtswv.
Peb puas mus cuag Vajtswv thiab nug Nws qhia peb txog txhua yam yuav tsum ua hauv peb lub neej?
Thov Vajtswv,
Tus Tswv, thov pab nyuam yaus yoog tus cai hauv sab ntsujplig ntawm kev los thov Koj, yuav nco ntsoov los cuag Koj ua ntej yuav ua ib yam dab tsi thiab mloog raws li Koj qhia kom ua hauv nyuam yaus lub neej. Amees.
Nyeem Vajluskub hauv peb lub xyoo: II.Xwmtxheej Vajntxwv 20:1-30
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
