Nehemis 1:1-10
Nqe cim:
“Thaum kuv hnov dheev txog txhua yam uas hais no kuv cia li zaum ntua quaj. Kuv nyuaj siab thiab quaj tau ob peb hnub tsis noj ib qho mov. Kuv thiaj thov Vajtswv hais tias, “Tus Tswv uas yog Vajtswv tus nyob saum Ntuj!” (Nehemis 1:4).
Lus nug rau sawvdaws xav:
- Nehemis hnov xov txog yam dab tsi thiab nws ua li cas?
- Nehemis ua li cas thaum nws paub txog zaj ntawd?
- Nehemis tau thov Vajtswv li cas thiab thov pab yam dab tsi?
- Peb xav li cas thiab tsimnyog ua dab tsi rau yus haiv neeg?
Nehemis yog ib tug neeg Yudas uas ua nom hauv vajntxwv Ataxawxes uas kav Medes Pawxias tebchaws lub loog. Thaum muaj neeg hauv Yeluxalees mus txog hauv lub nroog Susas, Nehemis maj nroos nug xov txog kev noj nyob hauv nws lub tebchaws. Thaum paub hais tias cov neeg seem thiab rov tim Npanpiloos rov mus raug txomnyem vim lwm tus ua saib tsis taus, lub nroog Yeluxalees tus ntsa yeej pob puas tsus, tej rooj vag loog tsis muaj tus kho, ua rau Nehemis nyuaj siab kawg (nqe 2-3). Nehemis muaj nplooj siab kub lug xav tau rov los kho tus ntsa yeej. Thaum Nehemis xav txog qhov ntawm, tsis yog nws xav rau nws haiv neeg xwb, tiamsis vim nws xav txog ib haiv neeg uas tau Vajtswv xaiv lawm. Haiv neeg ntawd tsis tsimnyog raug lwm haiv neeg txob thuam, yog raug txob thuam yuav ua rau Vajtswv tsis tau ntsejmuag. Yog li ntawd, Nehemis thiaj lis los cuag tus Tswv “…nyuaj siab thiab quaj tau ob peb hnub tsis noj ib qho mov. Kuv thiaj thov Vajtswv…” (nqe 4). Yam xub thawj uas Nehemis ua thaum txhawj txog nws haiv neeg yog txo fwjchim los thov Vajtswv pab rau nws haiv neeg. Nehemis tsis vam khom nws lub meej mom uas nws muaj tiamsis nws xub txav los cuag tus Tswv, thov tus Tswv zam txim pub thiab pab hlub txog nws haiv neeg.
Nehemis cov lus thov Vajtswv pib los ntawm txhawb nqa Vajtswv yog tus muaj fwjchim loj thiab hais txog Vajtswv ua raws li Nws tej lus cogtseg (nqe 5, 6). Ntxiv mus yog Nehemis lees nws thiab nws haiv neeg tej kev txhaum rau Vajtswv (nqe 7-9). Nehemis kuj hais txog tej uas Vajtswv tau ua rau haiv neeg Yudas yav dhau tas los (nqe 10). Thiab qhov kawg yog thov Vajtswv pab nws haiv neeg kom rov vammeej. Nehemis los cuag Vajtswv ntawm qhov uas nws paub Vajtswv yog leejtwg, lees nws thiab nws haiv neeg tej kev txhaum rau Vajtswv, los thov kev hlub thiab kev zam txim ntawm Vajtswv. Nehemis tas siab tas ntsws thov los ntawm; “…niaj hnub niaj hmo thov Koj pab cov tubtxib uas yog haivneeg Yixalayees” (nqe 6). Nehemis ua tau ib tug qauv zoo rau peb xyaum ntawm kev thov Vajtswv pab rau yus haiv neeg. Vajtswv kuj hais rau vajntxwv Xalumoos lawm hais tias: “yog lawv thov Kuv thiab lawv hloov dua siab, tso lawv tej kev phem kev qias tseg, ces kuv yuav nyob saum ntuj mloog lawv tej lus thov, zam txim rau lawv thiab pub lawv lub tebchaws kom rov vammeej dua” (II-Xwmntxeej Vajntxwv 7:14).
Nimno peb sawvdaws cheemtsum muaj cov “Nehemis” nyob hauv Vajtswv lub pawg ntseeg kom nrog txhawj thiab tas siab thov Vajtswv pab rau cov ntseeg txhua tus uas nyob thoob qab ntuj, tshwjxeeb yog yus haiv neeg. Peb lub tebchaws tab tom twb taubhau nrog tej kab mob kis, raug dej nyab thiab ntau yam teebmeem… Kawm xyaum Nehemis tus qauv, nyuaj siab quaj ntsuag, los txo fwjchim lees kev txhaum, yoo mov thov Vajtswv uas yog Tswv ntuj Tswv teb pab yus haiv neeg. Yog peb txawj los txo fwjchim, lees kev txhaum rau Vajtswv thiab taij thov tus Tswv, ces paub tseeb hais tias peb haiv neeg yuav tau txais tus Tswv kev hlub thiab tau txais kev cawm dim.
Peb puas tas siab thov Vajtswv pab peb haiv neeg?
Thov Vajtswv,
Tus Tswv, thov Koj ntuas nyuam yaus kom paub txhawj txog nyuam yaus haiv neeg. Txawm tab tom ua dab tsi thiab nyob lub tebchaws twg los xij, nyuam yaus tas siab thov Koj pab rau nyuam yaus lub tebchaws thiab rau tibneeg thoob qab ntuj. Amees.
T Nyeem Vajluskub hauv peb lub xyoo: II.Xwmtxheej Vajntxwv 18:1-27
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
