Klei Aê Diê Blŭ: Klei Mmuñ Hđăp 150:1
Êlan kliăng: “Bi mni bĕ kơ Yêhôwa!
Bi mni bĕ kơ Aê Diê hlăm adŭ doh jăk Ñu.
Bi mni bĕ klei myang Ñu hlăm adiê.” (Klei Mmuñ Hđăp 150:1).
Klei êmuh ksiêm mĭn: Hlei jing pô kơ klei kkuh mpŭ? Ti anôk kkuh mpŭ kơ Aê Diê? Si ngă thâo săng klei anei jing yuôm snăk? Si hdră êlan drei dôk kkuh mpŭ kơ Aê Diê?
Klei Mmuñ Hđăp 146-150 jing dŭm klei mmuñ doh jăk amâodah klei mmuñ hđăp mmuñ bi mni leh anăn bi ruê̆ hŏng boh blŭ “Halêluya”. Knŏng hjăn sa boh blŭ ngă hlăm Klei Mmuñ Hđăp 150 jing “Bi mni – praise”, yua 13 blư̆, hlăm anăn mâo 10 blư̆ čih hŏng klei mtă brei ngă. Dưi lač Klei Mmuñ Hđăp 150 jing hnơ̆ng dlông hĭn kơ kluôm jih 150 Klei Mmuñ Hđăp, leh anăn hnơ̆ng dlông hĭn kơ jih jang jing boh blŭ “Halêluya”, mblang jing bi mni kơ Yêhôwa. Blŭ mdê, Pô drei kkuh mpŭ jing Aê Diê pô. Klei sĭt nik prŏng hĭn kơ Aê Diê jing Ñu năng kơ drei kkuh mpŭ, leh anăn klei sĭt nik êlam hĭn kơ drei jing Ñu hrih mjing drei pioh kkuh mpŭ kơ Ñu – “phung ƀuôn sang kâo mjing leh kơ kâo pô, čiăng kơ diñu dưi hưn klei bi mni kơ kâo.” (Y‑Êsai 43:21). Kyuanăn, tơdah drei kkuh mpŭ sĭt kơ Aê Diê, drei duah ƀuh klei kñăm čiăng sĭt leh anăn hlŏng lar kơ klei mâo drei ară anei.
Boh klei dleh kơ mnuih kbiă hriê tơdah diñu hngah kơ klei mâo Aê Diê, “Mnuih khŏ lač hlăm ai tiê diñu, “Amâo mâo Aê Diê ôh.” Diñu mâo knuih brŭ, diñu ngă bruă jŭ jhat; amâo mâo sa čô ôh ngă klei jăk” (Klei Mmuñ Hđăp 14:1). Hngah kkuh mpŭ kơ Aê Diê čiăng lač kơ klei bum ală hlăm mngăt leh anăn atăt kơ sa klei hdĭp brŭ rai hlăm mngăt leh anăn klei jhat ƀai kơ knhuah hdĭp mnuih. Drei tuôm bi êmuh mơ̆ drei pô si ngă mâo lu đei mnuih khăng ai tiê, êăt hriêt, amâo mâo klei khăp, ênguôt dhuôt, huĭ hyưt, hŏng kdŏng, ăl krêñ, jhat ƀai, čuôt klih, leh anăn bi rai ñu pô? Klei Mmuñ Hđăp 14:1-3 lač snei kyuadah phung anei amâo kkuh mpŭ sĭt ôh kơ Aê Diê, diñu ka tuôm ôh čuôn kơŭt čiăng đup gưt kơ Aê Diê, ƀuh Ñu hlăm klei guh kơang, khăp čiăng, leh anăn kgŭ dơ̆ng čiăng mmuñ bi mni kơ Aê Diê hŏng klei hơ̆k.
Aê Diê hrih mjing drei pioh čiăng kkuh mpŭ kơ Ñu leh anăn brei kkuh mpŭ kơ Ñu grăp mnĭt mmông hlăm klei hdĭp drei. Brei hdơr nanao klei hrih mjing drei amâo djŏ pioh kkuh mpŭ kơ drei pô ôh, amâodah tui duah klei guh kơang kơ drei pô ôh, amâodah yap drei pô jing ti krah kơ jih jang, ƀiădah pioh čiăng kkuh mpŭ leh anăn mpŭ mni kơ Aê Diê (I Kôrantô 10:31).
Pô čih iêu mthưr brei kkuh mpŭ kơ Aê Diê hlăm “Adŭ doh jăk Ñu”, leh anăn wăt “hlăm adiê” (êlan 1). Brei kkuh mpŭ kơ Aê Diê hlăm jih jang anôk, ti dlông adiê wăt ti gŭ lăn. Klei Aê Diê Blŭ ăt hưn brei thâo asei mlei drei jing sang yang kơ Aê Diê (I Kôrantô 6:19) leh anăn iêu mthưr drei kkuh mpŭ leh anăn mmuñ bi mni kơ Aê Diê hlăm lam leh anăn hŏng asei mlei drei (Rôm 12:1), čiăng lač ti djăp anôk mâo drei, amâo djŏ ôh knŏng bi kdriêl hjăn hlăm Sang Aê Diê leh anăn hŏng klei bhiăn klei đăo ƀiădah hŏng djăp mta bruă drei ngă grăp hruê.
Si ngă drei kkuh mpŭ leh anăn mmuñ bi mni kơ Aê Diê tui si klei Ñu čiăng mơ̆ amâodah ka?
Wah lač: Ơ Khua Yang, jing klei jăk jĭn êdi kơ kâo dưi kkuh mpŭ kơ Aê Diê jing Mtao kơ jih jang mtao, Khua Yang kơ jih jang khua. Kâo myơr klei hdĭp kâo kơ Ih čiăng kluôm jih klei hdĭp kâo dưi mmuñ bi mni kơ Anăn Doh Jăk Ih nanao.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Klei Yăl Dliê 4:24 – 5:10
Kênh Youtube BHKTHN:
