Phau Ntawv Nkauj 150:1
Nqe cim:
Cia li qhuas tus Tswv!
Cia li qhuas Vajtswv hauv nws lub Tuamtsev!
Cia li qhuas nws lub zog loj zog nchav saum ntuj ceebtsheej!
Lus nug rau sawvdaws xav:
- Leejtwg yog tus uas yuav tsum pehawm Vajtswv?
- Kev pehawm Vajtswv nyob rau qhov chaw twg?
- Vim licas qhov kev zeem paub no tseemceeb kawg li?
- Peb tabtom pehawm Vajtswv licas?
Phau Ntawv Nkauj 146-150 yog tej zaj nkauj dawbhuv lossis tej zaj nkauj qhuas tus Tswv vim puavleej pib thiab xaus los ntawm lo lus “Haleluyas!”. Nyob hauv Phau Ntawv Nkauj 150 tsuas muaj tib lo lus hais ntsig txog kev ua haujlwm xwb, ntawd yog “qhuas”, tau siv hais 13 zaug nyob rau hauv, muaj 10 zaug tau siv zoo li lus samhwm kom yuav tsum ua. Hais tau hais tias Phau Ntawv Nkauj 150 yog tshooj siab tshajplaws ntawm tagnrho 150 tshooj nkauj, thiab qhov siab tshajplaws ntawd yog “Haleluyas”, uas txhais hais tias “qhuas tus Tswv”. Muab ua lwm seem lus los hais, mas Tus uas peb pehawm ntawd yeej yog Vajtswv ntag. Qhov tseeb uas loj tshajplaws hais txog Vajtswv, ntawd yog Nws tsimnyog tau peb pehawm; thiab qhov tseeb uas tob tshajplaws hais txog peb tibneeg, ntawd yog peb tau tsim los pehawm Nws – “Lawv yog haivneeg uas kuv tsim tseg ua kuv tug, lawv yuav hu nkauj qhuas kuv!” (Yaxayas 43:21). Vim li ntawd, thaum peb pehawm Vajtswv tiag tiag, ces peb nrhiav pom lub homphiaj uas tseeb meej thiab nyob mus ibtxhis ntawm peb txojkev tshwmsim los ua neeg.
Tibneeg tej teebmeem tshwmsim thaum lawv tsis lees paub hais tias muaj Vajtswv, “Cov neeg ruam pheej xav hais tias, “Yeej tsis muaj Vajtswv li!” Lawv txhua tus puavleej yog neeg txhaum, lawv ua phem ua qias tsis muaj ib tug ua zoo li.” (Phau Ntawv Nkauj 14:1). Qhov uas tsis kam pehawm Vajtswv qhia tshwm txog lawv kev dig muag sab ntsujplig, ua rau lawv lubneej raug puastsuaj sab ntsujplig thiab sab nqaij tawv huv tibsi. Puas muaj tej zaug twg uas peb rov nug tus kheej hais tias vim licas muaj ntau tug neeg muaj lub siab tawv, ua ntsej muag dub txig, tsis txawj sib hlub, niaj hnub nyuaj siab, txhawj ntshai, chawj chim, qia dub, thiab rov tua lawv tus kheej? Phau Ntawv Nkauj 14:1-3 teb hais tias twb yog vim lawv tsis pehawm Vajtswv tiag tiag, lawv tsis txo hwjchim tabmeeg Nws, lawv thiaj tsis saib pom Nws lub tshwjchim, nws txojkev hlub, thiab tsis los hu nkauj qhuas Nws.
Peb tshwmsim los ua neej nyob yog los pehawm Vajtswv thiab yuav tsum pehawm Vajtswv txhua sijhawm hauv peb lubneej. Yuav tsum nco ntsoov hais tias peb tau Vajtswv tsim tsis yog tsim los pehawm peb tus kheej, lossis nrhiav koobmeej rau peb tus kheej, lossis saib yus tseemceeb dua; tiamsis peb tau tsim yog tsim los pehawm thiab qhuas Vajtswv (I.Kauleethaus 10:31).
Tus sau nqe nkauj no nqua hu hais tias, cia li los pehawm tus Tswv hauv “Nws lub Tuamtsev”, thiab “saum ntuj ceebtsheej” (nqe 1). Yuav tsum pehawm tus Tswv txhua qhov chaw, tsis hais saum ntuj ceebtsheej thiab hauv lub ntiajteb huv tibsi. Vajluskub kuj qhia peb paub hais tias peb lub cev yog Vajtswv lub Tuamtsev (I.Kauleethaus 6:19); thiab peb tau nqua hu los pehawm Vajtswv thiab qhuas Nws dhau los ntawm peb lub cev (Loos 12:1), txhais tau hais tias pehawm Vajtswv txhua qhov chaw uas peb tshwm ntsej muag, tsis yog tsuas pehawm hauv tuamtsev thiab dhau kev dhau cai xwb, tiamsis tseem yuav tsum pehawm dhau los ntawm peb tes haujlwm txhua hnub thiab.
Peb puas pehawm thiab qhuas tus Tswv raws li nws lub siabnyiam lawm tau?
Thov Vajtswv:
Tus Tswv, zoo siab kawg nkaus thaum nyuam yaus tau los pehawm Vajtswv tus uas yog Vajntxwv ntawm tej vajntxwv, tus Tswv ntawm tej tswv. Nyuam yaus thov fij nyuam yaus lubneej rau Koj kom xwv tagnrho nyuam yaus lubneej tau los qhuas Koj Lub npe uas Dawbhuv. Amees.
Nyeem Vajluskub hauv peb lub xyoo: I.Xwmtxheej Vajntxwv 4:24-5:10
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
