Klei Aê Diê Blŭ: Y‑Yêrêmi 29:20-23
Êlan kliăng: “Kyuadah diñu ngă leh klei mluk hlăm čar Israel, diñu tlĕ piu leh hŏng mô̆ phung riêng gah diñu, leh anăn diñu blŭ leh klei luar hlăm anăn Kâo klei Kâo amâo tuôm mtă kơ diñu ôh. Kâo yơh jing pô thâo klei anăn, leh anăn Kâo jing pô hưn bi sĭt,” Yêhôwa lač.” (Y‑Yêrêmi 29:23).
Klei êmuh ksiêm mĭn: Hlei anăn phung dua čô Yêhôwa lač anăn? Ya klei soh diñu ngă? Si klei bi kmhal Yêhôwa pioh kơ diñu? Si bruă drei ngă leh hriăm klei hriăm anei?
Dua čô Yêhôwa lač anăn jing Y‑Ahap anak êkei Y‑Kôlaya leh anăn Y‑Sêdêkia anak êkei Y‑Maseya. Dua čô anei amâo djŏ jing phung mtao kơ phung ƀuôn sang Yuđa ôh ƀiădah knŏng mâo anăn msĕ đuč, kyua Mtao Y‑Ahap jing anak êkei Mtao Y‑Ômri (I Bruă Mtao 16:28), leh anăn Mtao Y‑Sêdekia jing anak êkei mtao Y‑Jôsia (I Klei Yăl Dliê 3:15). Dua čô anei dưi lač hlăm trăn Klei Aê Diê Blŭ anei jing phung khua pô hưn êlâo soh mjhua anăn Yêhôwa čiăng blŭ klei luar jing amâo djŏ ôh klei Aê Diê brei blŭ, amâo djŏ snăn ôh diñu lŏ “Kyuadah diñu ngă leh klei mluk hlăm čar Israel, diñu tlĕ piu leh hŏng mô̆ phung riêng gah diñu” (êlan 23). Klei bi kmhal kơ diñu jing klei djiê ti gŭ kngan Mtao Y‑Neƀukatnetsar. Klei jhat hĭn jing klei djiê diñu lŏ mñă wĭt mñă nao msĕ si klei tăm pah (êlan 22).
Tơdah sa čô mnuih amâo huĭ mpŭ kơ Aê Diê snăn klă sĭt amâo mâo ôh sa klei soh diñu amâo jhŏng ngă. Yua mgưt Anăn Aê Diê jing sa klei soh kjham snăk leh anăn klă sĭt srăng tŭ klei bi kmhal jih klei djiê ƀiădah dua khua pô hưn êlâo soh Y‑Ahap leh anăn Y‑Sêdêkia amâo huĭ ôh leh jhŏng ngă soh kơ Anăn Yêhôwa, lŏ ngă lu klei soh ti krah phung ƀuôn sang Aê Diê. Anăn jing mta phŭn ngă kơ diñu tŭ klei bi kmhal jing klei djiê ti anăp lu mnuih čiăng bi hmô kơ grăp čô mnuih.
Drei hmư̆ leh klei hưn brei răng hlăm hruê knhal tuč grăp čô mnuih brei hưn jih bruă pô ngă leh hlăk êjai dôk hlăm kđeh (II Kôrantô 5:10), ƀiădah klei hưn brei răng anăn ăt kăn dưi gang drei ngă soh hŏng Aê Diê, mklă wĭt lu blư̆ drei ăt ngă “klei mluk” ti krah phung ƀuôn sang Aê Diê (êlan 23) kyua mĭndah pô dưi “mdăp mơ̆ng Yêhôwa” (Y‑Êsai 19:15). Klei Aê Diê Blŭ mñă kơ drei Yêhôwa jing Aê Diê Bŏ Hŏng Klei Myang, Ñu thâo djăp mta klei drei ngă leh wăt hlăm klei mĭn hlăm ai tiê drei, “Êlâo kơ êlan kâo blŭ, nĕ anei, Ơ Yêhôwa, Ih thâo leh klei kâo srăng blŭ anăn” (Klei Mmuñ Hđăp 139:4). Aê Diê jing “Pô thâo leh anăn hưn bi sĭt” klei srăng bi kdơ̆ng hŏng phung drei tơdah čiăng ngă soh. Brei drei răng kơ klei Aê Diê mtă leh hlăm Klei Aê Diê Blŭ.
Drei mâo mơ̆ ya klei drei mdăp kơ Yêhôwa? Mâo mơ̆ ya klei drei čiăng mkra mlih čiăng bi mơak kơ Aê Diê?
Wah lač: Ơ Khua Yang Aê Diê Pô Myang hĭn! Kâo bi mni lač jăk kơ Ih lač leh kơ kâo, Aê Diê jing pô thâo leh anăn hưn bi sĭt djăp mta klei kâo ngă leh wăt tơdah bi êdah amâodah mdăp, đru kâo thâo răng klei hdĭp kpă ênô ti anăp Aê Diê, kmhal klei soh sĭt ngă soh čiăng Aê Diê pap brei.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 12:12-33
Kênh Youtube BHKTHN:
