Klei Aê Diê Blŭ: Y‑Yêrêmi 29:14-19
Êlan kliăng: “Ƀiădah Kâo gơ̆ Yêhôwa srăng blŭ klei Kâo srăng blŭ, leh anăn klei anăn srăng truh sĭt. Klei anăn amâo srăng lŏ bi krư̆i ôh, ƀiădah truh hlăm ênuk diih yơh, Ơ sang khăng bi kdơ̆ng. Kâo srăng blŭ leh anăn bi truh klei anăn, Yêhôwa Aê Diê lač.” (Y‑Êsêkiêl 12:25).
Klei êmuh ksiêm mĭn: Hlei êpul mnuih Khua pô hưn êlâo Y‑Yêrêmi mâo Aê Diê bi êdah klei bi ƀuh kơ dua bai boh hra bi hmô? Si klei bi sĭt Klei Khua pô hưn êlâo blŭ? Si knuih phung ƀuôn sang Aê Dê ruah hŏng klei Yêhôwa Aê Diê blŭ? Si knuih brei drei mâo ti anăp Klei Aê Diê Blŭ?
Yêhôwa Aê Diê brei Khua pô hưn êlâo Y‑Yêrêmi ƀuh dua bai boh hra dưm ti anăp Sang Aê Diê, sa bai dưm boh hra jăk hĭn msĕ si boh hra akŏ yan, bi bai adôk dưm bai boh hra jhat snăk, jhat tơl amâo dưi ƀơ̆ng ôh (Y‑Yêrêmi 24:1-2). Klei bi ƀuh anei lač kơ dua êpul mnuih: êpul tal sa jing phung hmư̆ klei hưn êlâo mơ̆ng Yêhôwa tŭ ư nao jing hlŭn ti Ƀaƀilôn, bi hmô hŏng boh hra jăk, kyua tui hluê si klei mĭn êđăp ênang mơ̆ng Aê Diê, bruă nao jing hlŭn jing čiăng mâo klei tŭ dưn kơ diñu (Y‑Yêrêmi 24:5), ƀiădah êpul tal dua, bi hmô hŏng bai hoh hra jhat jing phung amâo gưt asăp Aê Diê, gĭr lŏ dôk ti ala čar amâo čiăng nao jing hlŭn, leh anăn msĕ si Klei Aê Diê Bŭ lač “đao gưm, klei ư̆ êpa, leh anăn klei ruă tưp…” (êlan 17). Jih jang klei anăn dưi bi sĭt leh, leh truh wưng Yêhôwa Aê Diê kčah jing kjuh pluh thŭn, Ñu srăng ba phung jing hlŭn lŏ wĭt, leh anăn Ñu “lŏ hrui bi kƀĭn diih mơ̆ng jih jang găp djuê mnuih leh anăn mơ̆ng jih jang anôk Kâo suôt leh diih, leh anăn Kâo srăng lŏ atăt bi wĭt diih kơ anôk mơ̆ng anăn Kâo mă mđuĕ diih leh kơ čar mkăn.” (êlan 14-15).
Wăt tơdah Klei Aê Diê Blŭ hưn klă mngač, ƀiădah phung ƀuôn sang Aê Diê ăt đaŏ kơ klei hưn êlâo luar mơ̆ng phung khua pô hưn êlâo soh. Diñu lŏ lač, klă sĭt Yêhôwa tiŏ nao leh phung khua pô hưn êlâo Ñu ti Ƀaƀilôn (êlan 15), ƀiădah klă sĭt Klei Yêhôwa Blŭ lač leh êlâo êdei jing sa. Ñu lač leh kơ diñu đăm đaŏ ôh kơ klei phung khua pô hưn êlâo soh (êlan 8), leh anăn sa blư̆ dơ̆ng Ñu lŏ mñă wĭt Klei Ñu blŭ leh kơ klei hdĭp mtao leh anăn jih jang phung ƀuôn sang ăt dôk hlăm čar, diñu srăng tuôm hŏng đao gưm, klei ư̆ êpa, klei ruă tưp ngă (êlan 17-18) kyua diñu hngah kơ Klei Aê Diê Blŭ mơ̆ng klei phung khua pô hưn êlâo Aê Diê tiŏ nao leh kơ diñu (êlan 19).
Drei ăt čiăng Aê Diê wĭt lač klei akâo tui si ai tiê drei čang hmăng, ƀiădah Aê Diê thâo ya klei tŭ dưn kơ phung ƀuôn sang Ñu. Klei hriăm mñă kơ grăp čô drei, hngah kơ Klei Aê Diê Blŭ knŏng ba klei jhat kơ asei pô leh anăn jhat msĕ si bai boh hra jhat tơl amâo dưi ƀơ̆ng ôh.
Hŏng jih ai tiê drei đaŏ knang kơ Aê Diê brei klei tŭ dưn kơ pô hluê si Klei Aê Diê Blŭ leh anăn hdră mơ̆ng Ñu mơ̆?
Wah lač: Ơ Aê Diê Sĭt Suôr! Kâo bi mni lač jăk kơ Ih kyua Klei Aê Diê Blŭ mñă kơ drei Yêhôwa gĭr djă pioh Klei Ñu lač leh čiăng bi sĭt, akâo kơ Aê Diê đru kâo amâo dlăng hơaĭ mang ôh ƀiădah mă klei ƀuah mkra leh anăn klei hưn brei răng mơ̆ng Klei Aê Diê Blŭ čiăng amâo tŭ ôh klei bi kmhal kjham kơ hlei pô hngah kơ Klei Aê Diê Blŭ bi hriăm.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 12:12-33
Kênh Youtube BHKTHN:
