Klei Aê Diê Blŭ: I Kôrantô 15:3-8.
Êlan kliăng: “Arăng dơr Ñu leh, Ñu lŏ hdĭp leh ti hruê tal tlâo, tui si Klei Aê Diê Blŭ čih leh” (I Kôrantô 15:4).
Klei êmuh ksiêm mĭn: Hlei phung dưi ƀuh leh Khua Yang Yêsu kbiă lŏ hdĭp? Bi tuôm hŏng Khua Yang Yêsu kbiă lŏ hdĭp bi mlih leh klei hdĭp Khua ƀĭng kna Y-Pôl si ngă? Ñu bi hriăm phung đaŏ Sang Aê Diê Kôrantô knhuah hdĭp anei hŏng ya hdră kñăm? Si ngă klei hdĭp drei bi mlih leh mâo Khua Yêsu lŏ hdĭp kiă kriê klei hdĭp pô?
Klei Khua Yang Yêsu kbiă lŏ hdĭp guh kơang amâo djŏ jing klei phung khua ƀĭng kna bi mĭn ôh, hlăk êjai mâo phung lač kyua luč klei čang hmăng kơ klei Khua Yang Yêsu djiê ti kyâo bi kal, klei čang hmăng dưi mtlaih leh anăn mkŏ mjing sa ala mtao mrâo amâo dưi hluê ngă anăn diñu mčeh klei Khua Yang Yêsu kbiă lŏ hdĭp msĕ si hdră bi juh pô hjăn leh anăn phung đaŏ kơ Khua Yang. Sĭt nik amâo djŏ snăn ôh. Ƀiădah Khua Yang Yêsu klă sĭt kbiă lŏ hdĭp leh. Phung khua ƀĭng kna rŭng răng ai tiê leh anăn huĭ hyưt leh ƀuh msat huâng, mnal hruôm ăt dôk tinăn leh anăn Khua Yang Yêsu hŏng kđeh asăr bi êdah kơ diñu (Y-Luk 24:39, Y-Yôhan 20:26). Ñu bi êdah hŏng êbeh êma êtuh čô mnuih hlăm sa blư̆ (êlan 6), leh anăn dua čô yuôm bhăn dưi yap tinei jing Y-Yakơ leh anăn Khua ƀĭng kna Y-Pôl. Y-Yakơ jing adei êkei sa amĭ mdê ama hŏng Khua Yang Yêsu (Y-Mathiơ 13:55), ñu amâo đaŏ ôh Khua Yang Yêsu êlâo kơ hruê Ñu kbiă lŏ hdĭp (Y-Yôhan 7:5) ƀiădah êdei kơ anăn ñu đaŏ kơ Khua Yang, mŭt hlăm êpul phung khua ƀĭng kna, leh anăn jing mnuih hing ang hlăm Sang Aê Diê ti Yêrusalem (Bruă Phung Khua Ƀĭng Kna 15:13). Bi kơ Khua ƀĭng kna Y-Pôl jing pô tuôm ngă jhat ktang tĭt kơ phung tui hluê Khua Yang Yêsu (Bruă Phung Khua Ƀĭng Kna 9:1-9) ăt dưi bi tuôm hŏng Khua Yang. Klei bi mlih mơ̆ng sa čô mnuih Pharisi đaŏ sĭt suôr msĕ si Y-Pôl tơdah amâo kyua mơ̆ng klei myang Khua Yang Yêsu Kbiă lŏ hdĭp bi mlih klei hdĭp ñu snăn srăng amâo dưi mblang ôh bi djŏ guôp kơ klei anei. Klei Khua Yang Yêsu djiê, arăng ba dơr leh anăn Ñu lŏ hdĭp jing klei sĭt leh anăn atur knơ̆ng mơ̆ng Klei Mrâo Mrang Jăk. Khua ƀĭng kna Y-Pôl bi hriăm phung đaŏ Sang Aê Diê Kôrantô kơ klei đaŏ yuôm bhăn anei čiăng mkra mđĭ leh anăn hriăm mjuăt klei đaŏ diñu, đru diñu mkra mlih klei hdĭp leh anăn ai tiê ngă bruă djŏ klă hĭn.
Êgao leh giăm dua êbâo thŭn, phung ƀuh ti ală mta bi tuôm hŏng Khua Yang Kbiă lŏ hdĭp djiê leh sơăi, ba dơr leh hlăm lăn dôk guôn hruê Khua Yang Yêsu lŏ hriê, ƀiădah amâo djŏ kyua snăn ôh klei yuôm bhăn anei luč hĕ klei sĭt nik. Mklăk hŏng anăn, klei Khua Yang Yêsu Kbiă Lŏ Hdĭp ăt jing mta phŭn mơ̆ng Klei Mrâo Mrang Jăk kyua klei myang Khua Yang kbiă lŏ hdĭp ăt dôk kiă kriê hlăm klei hdĭp phung mă tŭ Klei Mrâo Mrang Jăk. Pô drei mpŭ amâo djŏ jing sa Aê Diê djiê leh knŏng dôk hjăn hbâo klang hlăm msat ôh, ƀiădah Ñu ară anei dôk hdĭp leh anăn hdĭp hlăm phung drei.
Drei hiu hưn nanao mơ̆ kơ klei Khua Yang Yêsu Krist kbiă lŏ hdĭp?
Ơ Khua Yang Yêsu Pô Hdĭp leh anăn dôk hdĭp hlăm kâo. Kâo bi mni lač jăk kơ Ih kyua klei khăp yuôm bhăn Ih brei leh kơ kâo, Ih djiê leh kyua kâo leh anăn hdĭp leh čiăng brei kơ kâo klei hdĭp mrâo hlăm Ih. Akâo kơ Ih yua klei hdĭp dưi mlih mrâo leh mơ̆ng kâo čiăng mjing klei bi mklă hiu hưn klei djiê leh anăn klei Ih kbiă lŏ hdĭp kơ lu mnuih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 9:22-57
Kênh Youtube BHKTHN:
